Мудофаага кўмаклашувчи “Ватанпарвар” ташкилоти ўқув спорт-техника клублари спортчилари ўртасида ёзги биатлон мусобақалари ўтказилди

Ўзбекистон Республикаси Мудофаасига кўмаклашувчи “Ватанпарвар” ташкилоти тасарруфидаги ўқув спорт-техника клуби спортчилари ўртасида ҳар йили анъанавий тарзда ўтказилиб келинаётган ёзги биатлон спорт мусобақаларида энг кучли, жисмонан ва ақлан етук спортчилар ўзаро куч синашадилар.

Ўзбекистон Республикаси Мудофаасига кўмаклашувчи "Ватанпарвар" ташкилоти Қорақалпоғистон республикаси Кенгашининг 2024 йил 1 мартдаги 17-сонли буйруғига асосан Жорий йилнинг 4 март куни Амударё туманида ёшлар ўртасида “Ёзги биатлон” спорт мусобақаси бўлиб ўтди.

Қорақалпоғистон Республикаси Кенгашининг 2024 йилги иш режасига кўра, Шуҳрат Камолов хотирасига бағишланган Қорақалпоғистон кубоги спорт мусобақасида Ўзбекистон Республикаси Мудофаасига кўмаклашувчи "Ватанпарвар" ташкилоти Қорақалпоғистон Республикаси Кенгаши тасарруфидаги ўқув спорт-техника клуби жамоалари иштирок этдилар.

Мусобақада Қорақалпоғистон Республикаси туманларидан 8та жамоа иштирок этишди. Эрталаб соат 10:00да тантанали равишда бошланган мусобақа майдонида барча жамоалар саф тортиб туришди. Тадбирни ташкилотнинг Қорақалпоғистон республикаси Кенгаши раиси Қуатбай Разбеков очиб берди ва спортчиларга омад тилади.

Мусобақа шартига кўра, иштирок этаётган жамоаларнинг ҳар бир аъзоси 3000 метрга югуриши ва оралиқда бир марта тик турган ҳолатда, кейинги айланани югуриб ўтиб, ётган ҳолатда ҳаво милтиғидан нишонларга ўқ отишни амалга оширдилар. Агарда берилган 5 та ўқдан нишонларга кам тегизилса, шунча марта белгиланган жарима айланасини қўшимча равишда югуриб ўтдилар.

Бу йилги ёзги биатлон спорт мусобақалари ҳар галгидан эртароқ бошланди ва иштирокчи жамоалар мусобақани ўтказиш бўйича тасдиқланган Низом билан олдиндан таништирилди. Шу билан бирга мусобақанинг намунавий шартлари асосида пухта тайёргарлик кўришлари учун ўзлари аъзо бўлган ўқув спорт-техника клублари томонидан зарур шароитлар яратилди. 110 нафардан зиёд спортчи-ёшлар иштирок этган мусобақа иштирокчилар учун ҳам, томошабинлар учун ҳам ниҳоятда қизиқарли таассуротларга бой бўлди.

Шу билан бирга мазкур мусобақада туманлардаги ўқув спорт-техника клублари томонидан ёшларни ватанпарварлик руҳида тарбиялаш, уларнинг жисмонан бақувват, маънан етук инсонлар сифатида шаклланишларини таъминлашга қаратилган маънавий-маърифий тарбиявий ишларнинг ҳолатига ҳам алоҳида эътибор қаратилди. Хусусан, кучли, эпчил, айниқса, мерганлик қобилиятига эга ёшларнинг чиқишлари, спортчи маданиятига амал қилишлари ҳам инобатга олинди.

Мусобақа курашларга бой, қизиқарли тарзда ўтди. Барча жамоалар ғолиб чиқиш учун ҳаракат қилдилар. Мусобақа якунида яхши натижалар кўрсатган жамоалар ғолиб ва совриндорлар қаторидан ўрин олдилар. Унга кўра, ёзги биатлон бўйича энг кучли жамоалар аниқланди. Амударё туман ўқув спорт-техника клуби жамоасига 1-ўрин, 2-ўрин Беруний туман ўқув спорт-техника клуби жамоасига, 3-ўрин эса Қораўзак туман ўқув спорт-техника клуби жамоасига насиб этди.

Мусобақа якунида ўғил боллалар ўртасида яхши натижалар кўрсатган спортчилар ҳам аниқланди. Унга кўра, иштирокчилардан Беҳруз Бахтияров 1-ўрин, Зафар Қодиров 2-ўрин, Жасурбек Давлетбоев 3-ўрин соҳиблари бўлдилар.

Шунингдек, мусобақада яхши натижалар кўрсатган спортчи қизлардан Чарос Ўразбоева 1-ўрин, Шоҳида Базарбоева 2-ўрин, Шоҳида Сабирова 3-ўрин соҳибалари бўлишди.

Тадбир якунида ғолиб жамоа ва шахсий биринчиликка эришган спортчиларга “Ватнпарвар” ташкилоти томонидан дипломлар ва эсдалик совғалари топширилди.

Робия ЙЎЛДОШЕВА.