“Keksalar maslahati guruhi” aʼzolari, sport murabbiylari va yosh sportchilar ishtirokida uchrashuv boʻlib oʻtdi

Mamlakatimizda sport sohasini rivojlantirishga qaratilayotgan eʼtibor va ragʻbat tufayli sportning olimpiya turlari boʻyicha shugʻullanuvchi yoshlar safi yil sayin oshib bormoqda. Bugungi kunda boks, dzyu-do, kurash, oʻzbek jang sanʼati, badiiy gimnastika, qilichbozlik, tennis sporti bilan shugʻullanuvchi yoshlar turli xalqaro musobaqalarda Vatanimiz bayrogʻini baland koʻtarib, gʻoliblik pillapoyalaridan tobora munosib joy olishayotgani xalqimizga quvonch va iftixor bagʻishlaydi.

Sportchilarimiz erishayotgan bunday yutuqlarda, albatta, ularni tarbiyalab, voyaga yetkazgan ota-onalarining, jismoniy jihatdan yetuk va kuchli sportchilar sifatida shakllanishlarida hamda qiziqish va intilishlarini qoʻllab-quvvatlashda sport murabbiylarining xizmatlari katta. Shu bois, turli nufuzli musobaqalarda gʻoliblikka erishgan sportchilarning ota-onalari va sport murabbiylari bilan uchrashuvlar oʻtkazish, ularni moddiy va maʼnaviy ragʻbatlantirishga alohida eʼtibor qaratiladi.

Bu borada Amudaryo tumanida sportchi-yoshlar va ularning ota-onalari, murabbiylari ishtirokida oʻtkazilayotgan maʼnaviy-maʼrifiy tadbirlar ham eʼtiborga munosib. Xususan, joriy yilning 26-sentyabr sanasida Amudaryo tuman Maktabgacha va maktab taʼlimi boʻlimi tasarrufidagi 82-sonli umumtaʼlim maktabi faollar zalida boʻlib oʻtgan “Keksalar maslahati guruhi” aʼzolari, sport murabbiylari va yosh sportchilar ishtirokidagi uchrashuvda ham mamlakatimizda sportga va sportchilarga qaratilayotgan eʼtibor, yaratilgan shart-sharoitlar, imkoniyatlar mamnuniyat bilan eʼtirof etildi.

Uchrashuvga taklif etilgan Tokio va Parij olimpiadalarining ishtirokchisi, koʻplab xalqaro musobaqalarning gʻolib va sovrindori, dzyu-do sporti boʻyicha Oʻzbekiston terma jamoasi aʼzosi Sharofaddin Boltaboyevning oila aʼzolariga jahon sport arenalarida Vatanimiz sharafini munosib himoya qilishga qodir farzandni tarbiyalab, voyaga yetkazishgani uchun Amudaryo tuman hokimi tomonidan minnatdorchilik izhor etilib, tuman hokimining Tashakkurnomasi taqdim qilindi.

Shuningdek, uchrashuv davomida oʻzbek jang sanʼati boʻyicha jahon chempionatida mamlakatimiz va tumanimiz shaʼnini munosib tarzda himoya qilib, 2ta oltin, 1ta kumush, 4ta bronza medallariga sazovor boʻlgan yosh sportchilar erishgan yutuqlar mamnuniyat bilan eʼtirof etildi. Sportning para yengil atletika yugurish turi boʻyicha faxrli 2-oʻrin sohibi Nursulton Sariboyev, para stol tennis turi boʻyicha “Besh tashabbus olimpiadasi” musobaqalarida 1-oʻrinni egallagan Shahzoda Rahmatullayeva hamda ularning murabbiylari Amudaryo tuman hokimining Tashakkurnomasi va esdalik sovgʻalari bilan taqdirlandilar.

Uchrashuv yakunida “Keksalar maslahati guruhi” aʼzolari, hoji onalar hamda nuroniy hoji otalar, Amudaryo tumanidan yetishib chiqqan taniqli sportchilarning oila aʼzolariga, shuningdek, yosh sportchilarga va ularning murabbiylariga oʻzlari shugʻullanayotgan sport yoʻnalishlarida yanada yangi muvaffaqiyatlarga erishishlarida omadlar tiladilar.

Ravshan Bahromov.