ҚИШЛОҚ КЎЧАЛАРИ ОБОД БЎЛМОҚДА
Юрт гўзал бўлса, унда яшаш ҳам мароқли. Юртнинг чиройига-чирой қўшадиган омиллардан бири эса бу, албатта, йўллардир. Ҳар қандай фаслда ҳам ўзининг гўзаллигини йўқотмайдиган, текис йўллар кўзимизни қувонтиради. Амударё туманида шундай йўллар кундан-кунга кўпайиб, энг чекка қишлоқларнинг кўчалари ҳам тобора ободонлашиб бормоқда.
Холимбег қишлоғи Амударё туманининг энг чекка ҳудудида, қардош Туркманистон Республикаси билан чегара қисмида жойлашган бўлиб, қишлоқ билан туман марказини боғловчи масофа 35-40 километрни ташкил қилади. Холимбегликлар туман марказига келишлари учун Холимбег ва Қиличбой ОФЙ оралиғидаги олис масофани ё автомобилда ёки яёв босиб ўтишларига тўғри келади. Икки қишлоқни бир-бирига туташтирувчи йўл нафақат анчайин олис, шу билан бирга нотекис ҳам. Айниқса, Холимбег, Афшона ва Тўмарис номли марказий кўчалар қаровсизликдан ўнқир-чўнқир, ҳар қандай йўловчининг тинкасини қуритиб, автомобиллар қатнови учун қийинчилик туғдирарди. Амударё туман ҳокимлиги ва Холимбег ОФЙ масъуллари, қолаверса, овул фаолларининг саъй-ҳаракатлари туфайли яқинда овулнинг марказий учта кўчаси – Холимбег, Афшона, Тўмарис номли кўчаларида текислаш, тиклаш-таъмирлаш ишлари бошлаб юборилди.
Таъмирлаш ишлари бошлаб юборилган, Холимбег ОФЙнинг Холимбег, Афшона ҳамда Тўмарис номли кўчаларининг бугунги қиёфаси тамоман ўзгарган. Кўчалар кун сайин файзли, киши диққатини тортадиган даражада чиройли қиёфа касб этмоқда. Мазкур овул ҳудудидаги марказий кўчалар сирасига кирадиган Холимбег, Тўмарис ва Афшона номли кўчаларни таъмирлаш-тиклаш ишларини Файзулла Ибрагимов раҳбарлигидаги “Аралводстрой” МЧЖ йўл қурувчи бригадаси ишчилари амалга оширмоқда.
Мазкур МЧЖ тендер ғолиби сифатида кўчаларнинг қанчалик таъмирталаб эканлигини аниқлаган ҳолда қурилиш-таъмирлаш ишларини сифатли олиб боришмоқда.
Овулдаги мазкур учта кўчада таъмирлаш-тиклаш ишларини амалга ошириш мақсадида 264 миллион сўмлик маблағ ажратилиб, лойиҳа-смета ҳужжатлари асосида “Аралводстрой” масъулияти чекланган жамияти томонидан текислаш, шағал-тош ётқизиш ва асфальтлаш ишлари олиб борилмоқда.
Кундан-кунга қиёфаси ўзгариб, тобора гўзаллашиб бораётган Холимбег, Афшона ва Тўмарис номли кўчаларда истиқомат қилувчи аҳоли ҳам ҳудудни ободонлаштириш, кўкаламзорлаштириш ишларида фаол иштирок этишмоқда. Холимбег ОФЙ раиси Зарифбой Олламов раҳбарлигида кўчалар бўйларини турли хас-чўплардан, бегона ўтлардан тозалаш, дарахтларга шакл бериш, кўчалар четларидаги ариқчаларни тоза сақлаш. Гул кўчатлари экиш каби ишларни ҳамжиҳатлик билан амалга оширишмоқда.
Холимбегликлар учун овулнинг ҳар бир қарич ери азиз. Шу боис, кун сайин ободонлашиб, кўркам қиёфа касб этаётган равон кўчалар файзидан аҳоли мамнун. Зеро, аҳолининг ҳаётдан рози бўлиб яшашларини таъминлашга қаратилган ҳар қандай эзгу иш, аввало, юрт тараққиётига қўшилган муносиб ҳиссадир.
Барно САМАНДАРОВА, газетанинг жамоатчи мухбири.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
