QIShLOQ KOʻChALARI OBOD BOʻLMOQDA

Yurt goʻzal boʻlsa, unda yashash ham maroqli. Yurtning chiroyiga-chiroy qoʻshadigan omillardan biri esa bu, albatta, yoʻllardir. Har qanday faslda ham oʻzining goʻzalligini yoʻqotmaydigan, tekis yoʻllar koʻzimizni quvontiradi. Amudaryo tumanida shunday yoʻllar kundan-kunga koʻpayib, eng chekka qishloqlarning koʻchalari ham tobora obodonlashib bormoqda.
Xolimbeg qishlogʻi Amudaryo tumanining eng chekka hududida, qardosh Turkmaniston Respublikasi bilan chegara qismida joylashgan boʻlib, qishloq bilan tuman markazini bogʻlovchi masofa 35-40 kilometrni tashkil qiladi. Xolimbegliklar tuman markaziga kelishlari uchun Xolimbeg va Qilichboy OFY oraligʻidagi olis masofani yo  avtomobilda yoki yayov bosib oʻtishlariga toʻgʻri keladi. Ikki qishloqni bir-biriga tutashtiruvchi yoʻl nafaqat anchayin olis, shu bilan birga notekis ham. Ayniqsa, Xolimbeg, Afshona va Toʻmaris nomli markaziy koʻchalar qarovsizlikdan oʻnqir-choʻnqir, har qanday yoʻlovchining tinkasini quritib, avtomobillar qatnovi uchun qiyinchilik tugʻdirardi. Amudaryo tuman hokimligi va Xolimbeg OFY masʼullari, qolaversa, ovul faollarining saʼy-harakatlari tufayli yaqinda ovulning markaziy uchta koʻchasi – Xolimbeg, Afshona, Toʻmaris nomli koʻchalarida tekislash, tiklash-taʼmirlash ishlari boshlab yuborildi.
Taʼmirlash ishlari boshlab yuborilgan, Xolimbeg OFYning Xolimbeg, Afshona hamda Toʻmaris nomli koʻchalarining bugungi qiyofasi tamoman oʻzgargan. Koʻchalar kun sayin  fayzli, kishi diqqatini tortadigan darajada chiroyli qiyofa kasb etmoqda. Mazkur ovul hududidagi markaziy koʻchalar sirasiga kiradigan Xolimbeg, Toʻmaris va Afshona nomli koʻchalarni taʼmirlash-tiklash ishlarini Fayzulla Ibragimov rahbarligidagi “Aralvodstroy” MChJ yoʻl quruvchi brigadasi ishchilari amalga oshirmoqda.
Mazkur MChJ tender gʻolibi sifatida koʻchalarning qanchalik taʼmirtalab ekanligini aniqlagan holda qurilish-taʼmirlash ishlarini sifatli olib borishmoqda.
Ovuldagi mazkur uchta koʻchada taʼmirlash-tiklash ishlarini amalga oshirish maqsadida 264 million soʻmlik mablagʻ ajratilib, loyiha-smeta hujjatlari asosida “Aralvodstroy” masʼuliyati cheklangan jamiyati tomonidan tekislash, shagʻal-tosh yotqizish va asfaltlash ishlari olib borilmoqda.
Kundan-kunga qiyofasi oʻzgarib, tobora goʻzallashib borayotgan Xolimbeg, Afshona va Toʻmaris nomli koʻchalarda istiqomat qiluvchi aholi ham hududni obodonlashtirish, koʻkalamzorlashtirish ishlarida faol ishtirok etishmoqda. Xolimbeg OFY raisi Zarifboy Ollamov rahbarligida koʻchalar boʻylarini turli xas-choʻplardan, begona oʻtlardan tozalash, daraxtlarga shakl berish, koʻchalar chetlaridagi ariqchalarni toza saqlash. Gul koʻchatlari ekish kabi ishlarni hamjihatlik bilan amalga oshirishmoqda.
Xolimbegliklar uchun ovulning har bir qarich yeri aziz. Shu bois, kun sayin obodonlashib, koʻrkam qiyofa kasb etayotgan ravon koʻchalar fayzidan aholi mamnun. Zero, aholining  hayotdan rozi boʻlib yashashlarini taʼminlashga qaratilgan har qanday ezgu ish, avvalo, yurt taraqqiyotiga qoʻshilgan munosib hissadir.

Barno SAMANDAROVA, gazetaning jamoatchi muxbiri.