“ЮСУФ ЭШОН БОБО” ЖОМЪЕ МАСЖИДИДА 25 НАФАР АМУДАРЁЛИКНИ ҲАЖ САФАРИГА ЖЎНАТИШ МАРОСИМИ ЎТКАЗИЛДИ

Ер юзининг барча қитъаларидаги мусулмонлар шу муқаддас ойда Ҳаж зиёратига бориб, Ислом динидаги бешинчи аркон амалларини адо этишади. Дарҳақиқат, муборак сафарга бориш, табаррук Каъбатуллоҳни тавоф қилиш ҳар бир мўмин-мусулмоннинг нияти, орзусидир.

 Бутун дунёга ташвиш келтирган коронавирус пандемияси сабабли Ҳаж зиёратига бориш маълум муддатга тўхтаб қолган эди, жорий йилдан яна улуғ сафарга йўллар очилди.

Шу йил 24 июнь куни Манғит шаҳрида жойлашган “Юсуф Эшон бобо” жомъе масжидида ҳамюртларимизни муборак Ҳаж сафарга жўнатиш билан боғлиқ кузатув маросими бўлиб ўтди.

Унда Маҳалла ва нуронийларни қўллаб-қувватлаш бўлими ҳамда туман ҳокимлиги масъуллари, шунингдек, зиёратчилар ва уларнинг яқинлари иштирок этишди.

Ҳаяжонли дамларда Яратганнинг байти сари йўл олаётган, орзулари ушалган ҳамюртларимиз эсон-омон муборак қадамжоларни зиёрат қилиб келишни сўраб, хайрли дуолар қилишган бўлса, кузатишга чиққан яқинлари Каъбатуллоҳга бориш уларга ҳам насиб этишини дилларига тугишди.

Таъкидлаш жоизки, Президентимизнинг алоҳида эътибори ва ғамхўрлиги натижасида минглаб ватандошларимиз ўз фарзларини эмин-эркин бажариш бахтига эришмоқда. Бу борада уларга давлатимиз томонидан жуда катта амалий ёрдам кўрсатилмоқда, қулай шароит яратиб берилмоқда.

Квоталар пандемиядан аввалгига қараганда қарийб 4 минг нафар, яъни 52 фоизга кўпайди. Албатта, Ўзбекистон аҳолисига берилган имкониятлар, инсон қадрини улуғлашга қаратилган изчил сиёсатнинг ёрқин самараси бўлди.

Айтиш керакки, Ҳаж фарзини адо этиш учун ҳаж сафарига отланишнинг ўз тартиб-қоидалари бор. Бу борада 2017 йилда Ўзбекистон Pеспубликаси Вазирлар Маҳкамасининг “Ҳаж” ва “Умра” тадбирларини ташкил этиш ва ўтказиш тартиби тўғрисидаги Низомга ўзгартириш ва қўшимчалар киритиш бўйича тегишли қарори қабул қилинган эди.

Унга кўра, туманимизда ҳам Ҳаж сафарига отланишни ният қилган фуқароларнинг номзодларини саралаб олиш учун маҳалларда ишчи гуруҳлар тузилди. Бу йилги Ҳаж мавсуми арафасида бу бўйича тузилган ишчи гуруҳлар томонидан 25 нафар зиёратчилар номзоди саралаб олиниб, туман ишчи гуруҳига тақдим этилди. Туман ишчи гуруҳи томонидан ҳар бир номзод билан белгиланган тартиб-қоидалар асосида суҳбат ўтказилганидан сўнг, улар ҳаж сафарига юборишга тавсия этилди.

“Юсуф Эшон бобо” жомъе масжидида бўлиб ўтган кузатиш маросимида бўлғуси ҳожиларга зиёрат давомида Макка ва Мадина шаҳарларида барча шароитларга эга меҳмонхоналар хизмат кўрсатиб, тажрибали ишчи гуруҳ ва малакали шифокорлар ҳамроҳлик қилиши ва бошқалар тўғрисида маълумотлар бериб ўтилди.

Маълум қилинишича, зиёратчилар Мадина шаҳрида «Масжиди Набавий»дан 100 метр узоқликда жойлашган 5 юлдузли «Зам-зам Пуллман» ва «Краун Плаза» меҳмонхоналарида, Макка шаҳрида эса «Аброж ал-Ҳидоя» меҳмонхонасида истиқомат қилади. Зиёратчилар меҳмонхонадан ташқари, Мино-Муздалифа-Арафот манзилларида ҳам уч маҳал иссиқ овқат ҳамда бепул тиббий хизмат билан таъминланади.

Бўлғуси ҳожи бобо ва ҳожи оналарга эсон-омон Аллоҳ йўлидаги фарзларини адо этиб қайтишларини, зиёратлари қабул бўлишини тилаб қоламиз.

Туман ҳокимлигининг Ахборот хизмати.