Фидойи меҳнати билан эл-юрт назарига тушган фермер

Амударё туманининг Холимбег овулида фидойи меҳнати билан эл-юрт назарига тушган фермерлар талайгина. Ҳам халқ эҳтиёжи, ҳам маҳалладошлари эҳтиёжи учун зарур бўлган кундалик озиқ-овқат маҳсулотларини етиштириш, ички бозордан ташқари, қўшни туманлар бозорларини сархил маҳсулотлар билан таъминлашда ҳудуддаги кўптармоқли фермер хўжаликларининг ҳиссаси катта.

Овулдаги “Ражаб-Жапақ” фермер хўжалигига Қуролбой Жапақов раҳбарлик қилади. Хўжалик ерларининг асосий қисмига, яъни 23 гектарига пахта экилиб, ҳар йили шартномавий режалар ошириб адо этилади. Бундан ташқари, 11 гектар майдондаги кузги буғдой, 8 гектар мевазор боғ ҳам хўжаликнинг ҳақиқий зироатчилик фабрикасига айланган.

Жорий деҳқончилик йилида 11 гектар ердаги кузги буғдойдан 28 тонна ҳосил олинди. Шартномавий режадан ташқари етиштирилган 15 тонна буғдой фермер хўжалиги омборига тўкилди ва пудратчи деҳқонлар ҳам мўл-кўл ғалла ҳосилидан баҳраманд бўлишди. Пахтачилик, ғаллачилик ва боғдорчилик йўналишларини юқори даромадли соҳага айлантиришда 44 нафар пудратчи деҳқонларнинг хизматлари катта.

Хўжалик ҳудудидаги экинларни агротехника қоидаларига мувофиқ парваришлаш, вақтида суғориш, озиқлантириш ишлари меъёрида олиб борилгани учун фермер хўжалигида деҳқончилик ишларини юритишда умуман муаммо йўқ. Қолаверса, хўжалик ихтиёридаги техника воситаларидан самарали фойдаланиш орқали экинлар парваришини юқори сифатда амалга оширишга эришилмоқда.

Айни пайтда фермер хўжалиги тасарруфида 2 та Т-28, 2 та ТТЗ, 1 та МТЗ-80 русумли тракторлар мавжуд. Шу боис, ерларни ҳайдаш, ғўза қатор ораларига ишлов бериш, етиштирилган ҳосилни йиғиштириб олиш ва омборларга ташиш каби ишларда қийинчилик йўқ ҳисоби.

Фермер хўжалиги пудратчи деҳқонлари жорий йилги кузги буғдойдан бўшаган ерларга такрорий экин экиб, юқори ҳосил етиштиришнинг ҳам ҳадисини олишган. Буғдойдан бўшаган ерларга экилган 1 гектар мош, 1 гектар соя экинлари аллақачон униб чиқиб, дастлабки агротехник тадбирлар бошлаб юборилди. Шунингдек, буғдой ҳосилидан бўшаган ерларнинг 2 гектарига сабзи, яна 1 гектар пиёз экиш учун тайёрлаб қўйилди. 23 гектар ердаги ғўза ниҳоллари баравж ривожланиб, биринчи сувдан кейин соғлом ҳосил нишоналари сони кун сайин ортмоқда.

Хўжаликнинг боғдорчилик тармоғи ҳам йил сайин сердаромад соҳага айланиб бораётганидан пудратчи деҳқонлар мамнун. 2017 йилда ташкил этилган 8 гектарлик боғда Ўзбекистон иқлимига мос 8 минг тупдан зиёд энг сара мевали дарахтлар мавжуд. Уч йилдан бери ўз ҳосилини бера бошлаган мевазор боғнинг ўзидан ҳар гектар ҳисобига 8 млн. сўмдан, йилига 64 млн. сўм даромад олаётганидан нафақат эл-у юрт ва фермер хўжалиги раиси Қуролбой Жапақов, балки хўжалик ишчилари ҳам бирдай манфаатдор.

Айни кунларда “Ражаб-Жапақ” фермер хўжалиги далаларида ғўза ниҳолларини қондириб суғориш, такрорий экинларни бегона ўтлардан тозалаш, минерал ва маҳаллий ўғитлар билан озиқлантириш каби агротехник тадбирлар амалга оширилмоқда. Ғўза парвариши билан бирга экинлар парвариши ҳам сифатли амалга оширилмоқда.

Робия ЙЎЛДОШЕВА.