Fidoyi mehnati bilan el-yurt nazariga tushgan fermer

Amudaryo tumanining Xolimbeg ovulida fidoyi mehnati bilan el-yurt nazariga tushgan fermerlar talaygina. Ham xalq ehtiyoji, ham mahalladoshlari ehtiyoji uchun zarur boʻlgan kundalik oziq-ovqat mahsulotlarini yetishtirish, ichki bozordan tashqari, qoʻshni tumanlar bozorlarini sarxil mahsulotlar bilan taʼminlashda hududdagi koʻptarmoqli fermer xoʻjaliklarining hissasi katta.

Ovuldagi “Rajab-Japaq” fermer xoʻjaligiga Qurolboy Japaqov rahbarlik qiladi. Xoʻjalik yerlarining asosiy qismiga, yaʼni 23 gektariga paxta ekilib, har yili shartnomaviy rejalar oshirib ado etiladi. Bundan tashqari, 11 gektar maydondagi kuzgi bugʻdoy, 8 gektar mevazor bogʻ ham xoʻjalikning haqiqiy ziroatchilik fabrikasiga aylangan.

Joriy dehqonchilik yilida 11 gektar yerdagi kuzgi bugʻdoydan 28 tonna hosil olindi. Shartnomaviy rejadan tashqari yetishtirilgan 15 tonna bugʻdoy fermer xoʻjaligi omboriga toʻkildi va pudratchi dehqonlar ham moʻl-koʻl gʻalla hosilidan bahramand boʻlishdi. Paxtachilik, gʻallachilik va bogʻdorchilik yoʻnalishlarini yuqori daromadli sohaga aylantirishda 44 nafar pudratchi dehqonlarning xizmatlari katta.

Xoʻjalik hududidagi ekinlarni agrotexnika qoidalariga muvofiq parvarishlash, vaqtida sugʻorish, oziqlantirish ishlari meʼyorida olib borilgani uchun fermer xoʻjaligida dehqonchilik ishlarini yuritishda umuman muammo yoʻq. Qolaversa, xoʻjalik ixtiyoridagi texnika vositalaridan samarali foydalanish orqali ekinlar parvarishini yuqori sifatda amalga oshirishga erishilmoqda.

Ayni paytda fermer xoʻjaligi tasarrufida 2 ta T-28, 2 ta TTZ, 1 ta MTZ-80 rusumli traktorlar mavjud. Shu bois, yerlarni haydash, gʻoʻza qator oralariga ishlov berish, yetishtirilgan hosilni yigʻishtirib olish va omborlarga tashish kabi ishlarda qiyinchilik yoʻq hisobi.

Fermer xoʻjaligi pudratchi dehqonlari joriy yilgi kuzgi bugʻdoydan boʻshagan yerlarga takroriy ekin ekib, yuqori hosil yetishtirishning ham hadisini olishgan. Bugʻdoydan boʻshagan yerlarga ekilgan 1 gektar mosh, 1 gektar soya ekinlari allaqachon unib chiqib, dastlabki agrotexnik tadbirlar boshlab yuborildi. Shuningdek, bugʻdoy hosilidan boʻshagan yerlarning 2 gektariga sabzi, yana 1 gektar piyoz ekish uchun tayyorlab qoʻyildi. 23 gektar yerdagi gʻoʻza nihollari baravj rivojlanib, birinchi suvdan keyin sogʻlom hosil nishonalari soni kun sayin ortmoqda.

Xoʻjalikning bogʻdorchilik tarmogʻi ham yil sayin serdaromad sohaga aylanib borayotganidan pudratchi dehqonlar mamnun. 2017-yilda tashkil etilgan 8 gektarlik bogʻda Oʻzbekiston iqlimiga mos 8 ming tupdan ziyod eng sara mevali daraxtlar mavjud. Uch yildan beri oʻz hosilini bera boshlagan mevazor bogʻning oʻzidan har gektar hisobiga 8 mln. soʻmdan, yiliga 64 mln. soʻm daromad olayotganidan nafaqat el-u yurt va fermer xoʻjaligi raisi Qurolboy Japaqov, balki xoʻjalik ishchilari ham birday manfaatdor.

Ayni kunlarda “Rajab-Japaq” fermer xoʻjaligi dalalarida gʻoʻza nihollarini qondirib sugʻorish, takroriy ekinlarni begona oʻtlardan tozalash, mineral va mahalliy oʻgʻitlar bilan oziqlantirish kabi agrotexnik tadbirlar amalga oshirilmoqda. Gʻoʻza parvarishi bilan birga ekinlar parvarishi ham sifatli amalga oshirilmoqda.

Robiya YOʻLDOShEVA.