Тўлқин овулида "Обод қишлоқ" дастурига мувофиқ 9 миллиард 370 млн. сўмлик қурилиш-таъмирлаш, ободонлаштириш ишлари амалга оширилади

Мамлакатимизда кейинги йилларда ҳудудларни ободонлаштириш, кўкламзорлаштириш орқали фуқароларнинг яшаш шароитларини яхшилаш, турмуши сифатини оширишга эътибор кучаймоқда. Бунда “Обод қишлоқ” дастури муҳим ўрин тутаяпти. Дастурга мувофиқ ҳудудларда транспорт инфратузилмаси, муҳандислик-коммуникация тармоқлари ҳамда ижтимоий соҳа объектларида қурилиш ва ободонлаштириш ишлари билан бирга хизмат кўрсатиш шоҳобчалари ташкил этилиб, аҳолининг турмуш шароитини яхшилашга хизмат қилувчи кўпгина чора-тадбирлар амалга оширилаяпти.

Тўлқин овули ҳам жорий йилда “Обод қишлоқ” дастури доирасида амалга оширилаётган ишлар туфайли ўзгача қиёфа касб этмоқда. Овулда дастурга мувофиқ 9 миллиард 370 млн. сўмлик қурилиш-таъмирлаш, ободонлаштириш ишларини амалга ошириш режалаштирилган.

24-сонли мактабгача таълим ташкилоти биносини мукаммал таъмирлаш, электр таъминотини яхшилаш мақсадида 3,3 километрлик линия тортиш ва 3 та трансформатор пунктини ўрнатиш, табиий газ таъминотини яхшилаш мақсадида 4,4 километрлик линия тортиб, 19 та газ тақсимлаш пунктларини таъмирлаш режалаштирилмоқда. Шунингдек, 4 та ичимлик суви иншоотини янгидан қуриш, 80 дона тунги ёритгичлар ўрнатиш, 4 километрлик алоқа тармоқларини тортиш, 4 та чиқинди контейнерларини ўрнатиш, 7 та тадбиркорлик объектларини қуриш ва 80 та аҳоли уй-жойларини таъмирлаш ишлари ҳам шулар жумласидандир.

Ҳозирги кунда “Темир бетон” масъулияти чекланган жамияти қурувчилари 24-сонли мактабгача таълим ташкилоти биносини мукаммал таъмирлаш ишларини поёнига етказиш арафасида. Қолган объектларда ҳам ишлар қизғин давом эттирилаяпти.

Йўллар – халқимиз турмуш тарзи қандайлигини кўрсатувчи омиллардан биридир. Текис, равон йўллар барча йўловчиларга ҳам завқ бағишлайди, ҳам кўзлаган манзилларига эсон-омон, хуш кайфиятда етиб боришини таъминлайди.

Тўлқин овулида дастур доирасида 11 километрлик ички йўллар таъмирланиши режалаштирилгани аҳолини жуда қувонтирган эди. Боиси, болалар мактабга қатнашида, кичкинтойларни боғчаларга олиб бориш-олиб келиш, ишга қатнашда йўллар носозлигидан улар анча азият чекишаётган эди.

Таъмирланадиган йўлларнинг 0,6 километрига шу кунгача режага кўра бетон қоплама ётқизиш ишлари якунланди. Бу ишни “Арал Гидро Строй” масъулияти чекланган жамияти йўлсозлари адо этишди.

Шунингдек, Шукрона, Бойсун-2, Бойсун-3, Боғонали, Боғонали-1, Боғонали-2, Қадрият-4, Хосият, Эътиқод-2, Эътиқод-3 кўчаларининг 5,8 километр қисмини жорий таъмирлаш ишлари давом эттирилмоқда.

Юрт шамоли, Шабнам-2, Кулобод-2, Кулобод-3, Қадрият-2, Шабнам, Меҳридил, Камолот, Ҳилол кўчаларининг 5,2 километр қисмини жорий таъмирлаш ишлари тугалланди.

Қурилиш ишларини “Беруний туман йўллардан фойдаланиш” унитар корхонаси йўлсозлари амалга оширмоқдалар. Шуниси эътиборлики, заҳира маблағлари ҳисобидан овулнинг Турон, Маърифатчилар, Қувонч кўчаларининг 1,77 километр қисмининг жорий таъмирланаётгани овул аҳолисига улкан қулайлик яратади.

“Янги Ўзбекистонда эл азиз, инсон азиз!” Бу ғоя юртимизда амалга оширилаётган барча янгиланишлар, ўзгаришлар, бунёдкорликларда ўз ифодасини топмоқда.

Ойгул РАЖАБОВА.