Toʻlqin ovulida "Obod qishloq" dasturiga muvofiq 9 milliard 370 mln. soʻmlik qurilish-taʼmirlash, obodonlashtirish ishlari amalga oshiriladi

Mamlakatimizda keyingi yillarda hududlarni obodonlashtirish, koʻklamzorlashtirish orqali fuqarolarning yashash sharoitlarini yaxshilash, turmushi sifatini oshirishga eʼtibor kuchaymoqda. Bunda “Obod qishloq” dasturi muhim oʻrin tutayapti. Dasturga muvofiq hududlarda transport infratuzilmasi, muhandislik-kommunikatsiya tarmoqlari hamda ijtimoiy soha obʼektlarida qurilish va obodonlashtirish ishlari bilan birga xizmat koʻrsatish shohobchalari tashkil etilib, aholining turmush sharoitini yaxshilashga xizmat qiluvchi koʻpgina chora-tadbirlar amalga oshirilayapti.

Toʻlqin ovuli ham joriy yilda “Obod qishloq” dasturi doirasida amalga oshirilayotgan ishlar tufayli oʻzgacha qiyofa kasb etmoqda. Ovulda dasturga muvofiq 9 milliard 370 mln. soʻmlik qurilish-taʼmirlash, obodonlashtirish ishlarini amalga oshirish rejalashtirilgan.

24-sonli maktabgacha taʼlim tashkiloti binosini mukammal taʼmirlash, elektr taʼminotini yaxshilash maqsadida 3,3 kilometrlik liniya tortish va 3 ta transformator punktini oʻrnatish, tabiiy gaz taʼminotini yaxshilash maqsadida 4,4 kilometrlik liniya tortib, 19 ta gaz taqsimlash punktlarini taʼmirlash rejalashtirilmoqda. Shuningdek, 4 ta ichimlik suvi inshootini yangidan qurish, 80 dona tungi yoritgichlar oʻrnatish, 4 kilometrlik aloqa tarmoqlarini tortish, 4 ta chiqindi konteynerlarini oʻrnatish, 7 ta tadbirkorlik obʼektlarini qurish va 80 ta aholi uy-joylarini taʼmirlash ishlari ham shular jumlasidandir.

Hozirgi kunda “Temir beton” masʼuliyati cheklangan jamiyati quruvchilari 24-sonli maktabgacha taʼlim tashkiloti binosini mukammal taʼmirlash ishlarini poyoniga yetkazish arafasida. Qolgan obʼektlarda ham ishlar qizgʻin davom ettirilayapti.

Yoʻllar – xalqimiz turmush tarzi qandayligini koʻrsatuvchi omillardan biridir. Tekis, ravon yoʻllar barcha yoʻlovchilarga ham zavq bagʻishlaydi, ham koʻzlagan manzillariga eson-omon, xush kayfiyatda yetib borishini taʼminlaydi.

Toʻlqin ovulida dastur doirasida 11 kilometrlik ichki yoʻllar taʼmirlanishi rejalashtirilgani aholini juda quvontirgan edi. Boisi, bolalar maktabga qatnashida, kichkintoylarni bogʻchalarga olib borish-olib kelish, ishga qatnashda yoʻllar nosozligidan ular ancha aziyat chekishayotgan edi.

Taʼmirlanadigan yoʻllarning 0,6 kilometriga shu kungacha rejaga koʻra beton qoplama yotqizish ishlari yakunlandi. Bu ishni “Aral Gidro Stroy” masʼuliyati cheklangan jamiyati yoʻlsozlari ado etishdi.

Shuningdek, Shukrona, Boysun-2, Boysun-3, Bogʻonali, Bogʻonali-1, Bogʻonali-2, Qadriyat-4, Xosiyat, Eʼtiqod-2, Eʼtiqod-3 koʻchalarining 5,8 kilometr qismini joriy taʼmirlash ishlari davom ettirilmoqda.

Yurt shamoli, Shabnam-2, Kulobod-2, Kulobod-3, Qadriyat-2, Shabnam, Mehridil, Kamolot, Hilol koʻchalarining 5,2 kilometr qismini joriy taʼmirlash ishlari tugallandi.

Qurilish ishlarini “Beruniy tuman yoʻllardan foydalanish” unitar korxonasi yoʻlsozlari amalga oshirmoqdalar. Shunisi eʼtiborliki, zahira mablagʻlari hisobidan ovulning Turon, Maʼrifatchilar, Quvonch koʻchalarining 1,77 kilometr qismining joriy taʼmirlanayotgani ovul aholisiga ulkan qulaylik yaratadi.

“Yangi Oʻzbekistonda el aziz, inson aziz!” Bu gʻoya yurtimizda amalga oshirilayotgan barcha yangilanishlar, oʻzgarishlar, bunyodkorliklarda oʻz ifodasini topmoqda.

Oygul RAJABOVA.