ЁРҚИН ИСТЕЪДОД СОҲИБАСИ
Истеъдод қачон уйғонади? Уни ўзимиз англаган кунимиз қалбимизда нелар кечади? Атрофимиздаги инсонларчи, улар кўз олдида камол топаётган истеъдод ғунчасини қандай қабул қилади? Агар самимият устун бўлса, истеъдоднинг бахти! Аксинча бўлса, бу истеъдод эгаси ўзингизми, бошқами... ёруғлик кўрмай сўнади ва қайта уйғонмоғи даргумон.
Аммо бизнинг мамлакатимизда ҳар қандай истеъдод эгаси, минг шукурки, самимият ва меҳр ардоғига мушарраф.
Тумандаги 35-сонли мактабнинг 10-синф ўқувчиси Барно Самандарова таҳририятга илк ижод намуналарини олиб келганида 5-синф ўқувчиси эди. Ўз устида ишлашдан, ўқиб-ўрганишдан асло чарчамайдиган Барнохон аллақачон ўз тенгқурлари орасида иқтидорли ижодкор, жамоатчи ва ташкилотчи, ислоҳотчи ва билимдон ўқувчи, бир неча китобларнинг муаллифи – ўз услубига эга шоира сифатида танилди. Б.Самандарованинг “Илк парвозим”, “Меҳр”, “Фахримсан, Амударём”, "Қалб сўзи" китоблари чоп этилиб, мухлислари китоб жавонларидан муносиб жой олган.
Б.Самандарова – мактабда аълочи, жамоатчи ўқувчи, қолаверса, Халқаро ЮНИСЕФ ташкилотининг U-Report лойиҳаси волонтёри, Қорақалпоғистон Республикаси “Қизлар овози” маданият ва санъат клуби координатори, “Жайхун илҳомлари” ННТ билан ҳамкорликдаги “Қалб туғёнлари” лойиҳаси ташкилотчиси сифатида ҳамиша фаол ҳаракатда.
Бугунги кунда бу ёш ижодкор қизнинг жўшқин овози, нафис шеърияти Амударё тумани, Қорақалпоғистон ва Ўзбекистон сарҳадларидан ҳам ўтиб, баралла янграмоқда. Хусусан, Ўзбекистон Республикаси Олий ва ўрта махсус таълим вазирлиги ҳузуридаги Маънавият ва маърифат маркази ҳомийлигида чоп этилган Ўзбекистон ижодкор ёшларининг “Ҳилол” тўпламининг 2-сони учта, 113-116-саҳифалари Барно Самандарованинг ижодига бағишланган. Шунингдек, Россия Федерациясининг Санкт-Петербург шаҳрида, 2022 йилда Халқаро анталогия (“Международная анталогия”) сериясида чоп этилган “XXI век: Молодёжь нового Ўзбекистана” китобидан ҳам Барно Самандарованинг ижоди учун махсус саҳифалар ажратилиб, унинг шеърлари рус тилида чоп қилинган.
Ёш ва иқтидорли ижодкор учун 2022 йил яна бир қувончли воқеани ҳадя этди. Жорий йилнинг август ойида “Best Publication” Халқаро илмий тадқиқотлар маркази томонидан МДҲ давлатлари миқёсида ўтказилган “Ташаббускор ислоҳотчи” танловида қатнашиб, ғолиб бўлди ва танлов ташкилотчилари томонидан “Ташаббускор ислоҳотчи” кўкрак нишони ва "Ренессанс даври: илмий тадқиқотлар етакчиси" халқаро илмий-амалий танлови ва Халқаро конференцияда фаол иштироки учун мазкур танловнинг ҳам кўкрак нишони билан тақдирланди.
Тиниб-тинчимас ижодкор қизнинг ҳар бир куни бир эзгу орзу йўлидаги интилиш, ёруғ ниятлар сари дадил қадамлар билан бошланади. Ижод, ўқиб-ўрганиш сари интилаверади. Ана шу интилишларда ватанпарварлик, халқпарварлик ғоялари ва Янги Ўзбекистонни бунёд этиш йўлидаги гўзал орзулари ҳақида шижоат билан сўзлайверади. Ўз шеърлари, жўшқин туйғулари билан адабиёт давраларига тобора яқин бўлиб бораётган Барнохоннинг истеъдоди шаклланиши эса унинг ана шу эзгу хислатлари, меҳнаткашлиги ва самимийлиги, олдинга дадил интилишдан тўхтамаслигидан. Зеро, истеъдод ҳам, ёрқин орзулар ҳам эзгулик йўлидаги дадил интилиш ва сабр-матонатга йўғрилган меҳнат маҳсулидир.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
