Нафосат ва истеъдод маскани: 9-сонли болалар мусиқа ва санъат мактаби ёшларни санъат оламига етакламоқда

Мамлакатимизда ёш авлоднинг маънавий дунёқарашини юксалтириш, уларни миллий ва умуминсоний қадриятлар руҳида тарбиялаш, иқтидор ва истеъдодларини рўёбга чиқариш ҳамда бўш вақтларини мазмунли ташкил этиш доимий эътибор марказидаги масала саналади. Бу борада жойлардаги болалар мусиқа ва санъат мактаблари ўзига хос маънавият маскани сифатида алоҳида ўрин тутади. Ана шундай таълим муассасаларидан бири — Амударё туманидаги 9-сонли болалар мусиқа ва санъат мактаби бўлиб, у узоқ йиллардан буён туман ёшларининг ижодий ва маънавий камолотига салмоқли ҳисса қўшиб келмоқда.

Мазкур мактаб фаолиятининг илдизлари 1968 йилга бориб тақалади. Ўша йилда ташкил этилган таълим даргоҳи дастлаб мусиқа соҳасида иқтидорли болаларни тарбиялашга ихтисослашган бўлса, кейинчалик ўз фаолиятини кенгайтириб, санъатнинг турли йўналишларини қамраб олди. 1990 йилда мактаб биноси қайта қурилиб, у Ҳамза номидаги мусиқа мактаби сифатида фаолият юрита бошлади. Мамлакатимизда маданият ва санъат соҳасига қаратилаётган доимий эътибор натижасида 2015 йилда мактабда кенг кўламли реконструкция ишлари амалга оширилиб, замонавий ўқув хоналари, машқ заллари ва ижодий муҳитга эга шарт-шароитлар яратилди. Бугунги кунда мактаб биноси ўқувчиларнинг ҳар томонлама ривожланишлари ва сифатли таълим олиб, мусиқа ҳамда санъат сирларини пухта эгаллашлари учун барча талабларга жавоб беради.

Айни пайтда мактабда ўқув жараёни ўнта асосий йўналиш бўйича ташкил этилган. Хусусан, фортепиано, халқ чолғулари, эстрада чолғулари, анъанавий хонандалик, бахшичилик, тасвирий санъат, хореография, эстрада хонандалиги, анъанавий ижро ҳамда амалий санъат йўналишлари болаларда ижодий тафаккур ва эстетик дидни шакллантиришга хизмат қилмоқда. 2025–2026 ўқув йилида мактабнинг 1-синфига 44 нафар янги ўқувчи қабул қилинган бўлиб, жорий йил сентябрь ҳолатига кўра, таълим олувчиларнинг умумий сони 206 нафарни ташкил этади. Шундан 146 нафари мусиқа, 60 нафари эса санъат йўналишларида таҳсил олмоқда.

Ёш авлодга мусиқа ва санъат сир-асрорларини ўргатиш мақсадида мактабда 36 нафар малакали педагог фаолият юритмоқда. Уларнинг 19 нафари олий маълумотли, 17 нафари эса махсус мусиқа ва санъат коллежларини тамомлаган тажрибали мутахассислардир. Педагогларнинг касбий маҳоратини мунтазам ошириб боришга ҳам алоҳида эътибор қаратилади. Улар тасдиқланган режа-жадваллар асосида мусиқа соҳаси педагогларини қайта тайёрлаш ва малакасини ошириш марказида,  санъат мактаб-интернатлари ва бошқа муассасаларда билим ва тажрибаларини ошириб қайтмоқдалар.

Мактаб жамоаси нафақат таълим жараёнида, балки маънавий-маърифий ҳаётда ҳам фаол иштирок этиб келмоқда. Жорий ўқув йилининг биринчи ярим йиллигида Мустақиллик байрами, 1 октябрь — Ўқитувчи ва мураббийлар куни, Давлат тили байрами, Конституция куни ҳамда Янги йил байрами муносабати билан ўтказилган тадбирларда ўқитувчи ва ўқувчилар тайёрлаган концерт дастурлари кенг жамоатчиликка тақдим этилди. Айниқса, ёшларни ватанпарварлик ва ижодий фикрлаш руҳида тарбиялашга қаратилган “Янги йил саргузашти” номли театрлашган саҳнавий концерт дастури тумандаги умумтаълим мактаблари ўқувчилари ва мактабгача таълим ташкилотлари тарбияланувчиларида катта таассурот қолдирди.

Шунингдек, 12–31 январь кунлари “Театр йўналиши ойлиги” доирасида ўтказилаётган тадбирлар ҳам ўқувчилар учун катта ижодий мактаб бўлмоқда. Ойлик доирасидаги тадбирларда 34-сонли маданият марказининг “Жайҳун мўъжизаси” анъанавий саҳна цирк халқ жамоаси бадиий раҳбари Қудрат Матсафоев, 40-сонли “Аму садоси” маданият маркази драма тўгараги раҳбари Мирсаид Қодиров ҳамда Ўзбекистон Давлат санъат ва маданият институти Нукус филиали талабаси Анвар Ўринбоевлар иштирокида маҳорат дарслари ўтказилмоқда. Мазкур учрашувларда ўқувчилар театр санъатининг тарихи, саҳна маданияти ва устоз санъаткорлар ижоди ҳақида қимматли билимларга эга бўлмоқдалар.

Айни кунларда эса мактабнинг иқтидорли ўқувчилари Халқ чолғулари йўналиши бўйича Республика кўрик-танловига қизғин тайёргарлик кўрмоқда. Шу билан бирга, мактаб жамоаси ҳудудни ободонлаштириш, кўкаламзорлаштириш ишларида ҳам фаол қатнашиб, таълим даргоҳи атрофини янада гўзал ва намунавий масканга айлантиришга ўз ҳиссасини қўшиб келмоқда.

Хулоса қилиб айтганда, Амударё туманидаги 9-сонли болалар мусиқа ва санъат мактаби ёш авлодни маънавий етук, ижодкор ва ўз миллий қадриятларига садоқатли қилиб тарбиялашда муҳим ўрин тутаётган нуфузли таълим маскани ҳисобланади. Кўп йиллик бой тажриба, замонавий ўқув шароитлари ҳамда малакали педагоглар жамоаси мактаб фаолияти самарадорлигини янада оширмоқда. Таълим жараёнида мусиқа ва санъатнинг турли йўналишлари бўйича берилaётган билимлар ўқувчиларда эстетик дид, ижодий тафаккур ва мустақил фикрлаш кўникмаларини шакллантиришга хизмат қилмоқда.

Шу билан бирга, мактабда ташкил этилаётган маънавий-маърифий тадбирлар, саҳнавий чиқишлар, маҳорат дарслари ва ижодий учрашувлар ёшларни ватанпарварлик, жамоавийлик ва миллий ифтихор руҳида тарбиялашга катта ҳисса қўшмоқда. Туманимиз марказидаги ушбу маънавият маскани яна неча-неча йиллар давомида ёшлар келажаги, маданият ва санъат тараққиёти йўлида мустаҳкам пойдевор вазифасини ўташи шубҳасиз.