Nafosat va isteʼdod maskani: 9-sonli bolalar musiqa va sanʼat maktabi yoshlarni sanʼat olamiga yetaklamoqda

Mamlakatimizda yosh avlodning maʼnaviy dunyoqarashini yuksaltirish, ularni milliy va umuminsoniy qadriyatlar ruhida tarbiyalash, iqtidor va isteʼdodlarini roʻyobga chiqarish hamda boʻsh vaqtlarini mazmunli tashkil etish doimiy eʼtibor markazidagi masala sanaladi. Bu borada joylardagi bolalar musiqa va sanʼat maktablari oʻziga xos maʼnaviyat maskani sifatida alohida oʻrin tutadi. Ana shunday taʼlim muassasalaridan biri — Amudaryo tumanidagi 9-sonli bolalar musiqa va sanʼat maktabi boʻlib, u uzoq yillardan buyon tuman yoshlarining ijodiy va maʼnaviy kamolotiga salmoqli hissa qoʻshib kelmoqda.

Mazkur maktab faoliyatining ildizlari 1968-yilga borib taqaladi. Oʻsha yilda tashkil etilgan taʼlim dargohi dastlab musiqa sohasida iqtidorli bolalarni tarbiyalashga ixtisoslashgan boʻlsa, keyinchalik oʻz faoliyatini kengaytirib, sanʼatning turli yoʻnalishlarini qamrab oldi. 1990-yilda maktab binosi qayta qurilib, u Hamza nomidagi musiqa maktabi sifatida faoliyat yurita boshladi. Mamlakatimizda madaniyat va sanʼat sohasiga qaratilayotgan doimiy eʼtibor natijasida 2015-yilda maktabda keng koʻlamli rekonstruktsiya ishlari amalga oshirilib, zamonaviy oʻquv xonalari, mashq zallari va ijodiy muhitga ega shart-sharoitlar yaratildi. Bugungi kunda maktab binosi oʻquvchilarning har tomonlama rivojlanishlari va sifatli taʼlim olib, musiqa hamda sanʼat sirlarini puxta egallashlari uchun barcha talablarga javob beradi.

Ayni paytda maktabda oʻquv jarayoni oʻnta asosiy yoʻnalish boʻyicha tashkil etilgan. Xususan, fortepiano, xalq cholgʻulari, estrada cholgʻulari, anʼanaviy xonandalik, baxshichilik, tasviriy sanʼat, xoreografiya, estrada xonandaligi, anʼanaviy ijro hamda amaliy sanʼat yoʻnalishlari bolalarda ijodiy tafakkur va estetik didni shakllantirishga xizmat qilmoqda. 2025–2026 oʻquv yilida maktabning 1-sinfiga 44 nafar yangi oʻquvchi qabul qilingan boʻlib, joriy yil sentyabr holatiga koʻra, taʼlim oluvchilarning umumiy soni 206 nafarni tashkil etadi. Shundan 146 nafari musiqa, 60 nafari esa sanʼat yoʻnalishlarida tahsil olmoqda.

Yosh avlodga musiqa va sanʼat sir-asrorlarini oʻrgatish maqsadida maktabda 36 nafar malakali pedagog faoliyat yuritmoqda. Ularning 19 nafari oliy maʼlumotli, 17 nafari esa maxsus musiqa va sanʼat kollejlarini tamomlagan tajribali mutaxassislardir. Pedagoglarning kasbiy mahoratini muntazam oshirib borishga ham alohida eʼtibor qaratiladi. Ular tasdiqlangan reja-jadvallar asosida musiqa sohasi pedagoglarini qayta tayyorlash va malakasini oshirish markazida,  sanʼat maktab-internatlari va boshqa muassasalarda bilim va tajribalarini oshirib qaytmoqdalar.

Maktab jamoasi nafaqat taʼlim jarayonida, balki maʼnaviy-maʼrifiy hayotda ham faol ishtirok etib kelmoqda. Joriy oʻquv yilining birinchi yarim yilligida Mustaqillik bayrami, 1-oktyabr — Oʻqituvchi va murabbiylar kuni, Davlat tili bayrami, Konstitutsiya kuni hamda Yangi yil bayrami munosabati bilan oʻtkazilgan tadbirlarda oʻqituvchi va oʻquvchilar tayyorlagan kontsert dasturlari keng jamoatchilikka taqdim etildi. Ayniqsa, yoshlarni vatanparvarlik va ijodiy fikrlash ruhida tarbiyalashga qaratilgan “Yangi yil sarguzashti” nomli teatrlashgan sahnaviy kontsert dasturi tumandagi umumtaʼlim maktablari oʻquvchilari va maktabgacha taʼlim tashkilotlari tarbiyalanuvchilarida katta taassurot qoldirdi.

Shuningdek, 12–31-yanvar kunlari “Teatr yoʻnalishi oyligi” doirasida oʻtkazilayotgan tadbirlar ham oʻquvchilar uchun katta ijodiy maktab boʻlmoqda. Oylik doirasidagi tadbirlarda 34-sonli madaniyat markazining “Jayhun moʻʼjizasi” anʼanaviy sahna tsirk xalq jamoasi badiiy rahbari Qudrat Matsafoyev, 40-sonli “Amu sadosi” madaniyat markazi drama toʻgaragi rahbari Mirsaid Qodirov hamda Oʻzbekiston Davlat sanʼat va madaniyat instituti Nukus filiali talabasi Anvar Oʻrinboyevlar ishtirokida mahorat darslari oʻtkazilmoqda. Mazkur uchrashuvlarda oʻquvchilar teatr sanʼatining tarixi, sahna madaniyati va ustoz sanʼatkorlar ijodi haqida qimmatli bilimlarga ega boʻlmoqdalar.

Ayni kunlarda esa maktabning iqtidorli oʻquvchilari Xalq cholgʻulari yoʻnalishi boʻyicha Respublika koʻrik-tanloviga qizgʻin tayyorgarlik koʻrmoqda. Shu bilan birga, maktab jamoasi hududni obodonlashtirish, koʻkalamzorlashtirish ishlarida ham faol qatnashib, taʼlim dargohi atrofini yanada goʻzal va namunaviy maskanga aylantirishga oʻz hissasini qoʻshib kelmoqda.

Xulosa qilib aytganda, Amudaryo tumanidagi 9-sonli bolalar musiqa va sanʼat maktabi yosh avlodni maʼnaviy yetuk, ijodkor va oʻz milliy qadriyatlariga sadoqatli qilib tarbiyalashda muhim oʻrin tutayotgan nufuzli taʼlim maskani hisoblanadi. Koʻp yillik boy tajriba, zamonaviy oʻquv sharoitlari hamda malakali pedagoglar jamoasi maktab faoliyati samaradorligini yanada oshirmoqda. Taʼlim jarayonida musiqa va sanʼatning turli yoʻnalishlari boʻyicha berilayotgan bilimlar oʻquvchilarda estetik did, ijodiy tafakkur va mustaqil fikrlash koʻnikmalarini shakllantirishga xizmat qilmoqda.

Shu bilan birga, maktabda tashkil etilayotgan maʼnaviy-maʼrifiy tadbirlar, sahnaviy chiqishlar, mahorat darslari va ijodiy uchrashuvlar yoshlarni vatanparvarlik, jamoaviylik va milliy iftixor ruhida tarbiyalashga katta hissa qoʻshmoqda. Tumanimiz markazidagi ushbu maʼnaviyat maskani yana necha-necha yillar davomida yoshlar kelajagi, madaniyat va sanʼat taraqqiyoti yoʻlida mustahkam poydevor vazifasini oʻtashi shubhasiz.