YoRQIN ISTEʼDOD SOHIBASI

Isteʼdod qachon uygʻonadi? Uni oʻzimiz anglagan kunimiz qalbimizda nelar kechadi? Atrofimizdagi insonlarchi, ular koʻz oldida kamol topayotgan isteʼdod gʻunchasini qanday qabul qiladi? Agar samimiyat ustun boʻlsa, isteʼdodning baxti! Aksincha boʻlsa, bu isteʼdod egasi oʻzingizmi, boshqami... yorugʻlik koʻrmay soʻnadi va qayta uygʻonmogʻi dargumon.

Ammo bizning mamlakatimizda har qanday isteʼdod egasi, ming shukurki, samimiyat va mehr ardogʻiga musharraf.

Tumandagi 35-sonli maktabning 10-sinf oʻquvchisi Barno Samandarova tahririyatga ilk ijod namunalarini olib kelganida 5-sinf oʻquvchisi  edi. Oʻz ustida ishlashdan, oʻqib-oʻrganishdan aslo charchamaydigan Barnoxon allaqachon oʻz tengqurlari orasida iqtidorli ijodkor, jamoatchi va tashkilotchi, islohotchi va bilimdon oʻquvchi, bir necha kitoblarning muallifi – oʻz uslubiga ega shoira sifatida tanildi. B.Samandarovaning “Ilk parvozim”, “Mehr”, “Faxrimsan, Amudaryom”, "Qalb soʻzi"  kitoblari chop etilib, muxlislari kitob javonlaridan munosib joy olgan.

B.Samandarova – maktabda aʼlochi, jamoatchi oʻquvchi, qolaversa, Xalqaro YuNISEF tashkilotining U-Report loyihasi volontyori, Qoraqalpogʻiston Respublikasi “Qizlar ovozi” madaniyat va sanʼat klubi koordinatori, “Jayxun ilhomlari” NNT bilan hamkorlikdagi “Qalb tugʻyonlari” loyihasi tashkilotchisi sifatida hamisha faol harakatda.

Bugungi kunda bu yosh ijodkor qizning joʻshqin ovozi, nafis sheʼriyati Amudaryo tumani, Qoraqalpogʻiston va Oʻzbekiston sarhadlaridan ham oʻtib, baralla yangramoqda. Xususan, Oʻzbekiston Respublikasi Oliy va oʻrta maxsus taʼlim vazirligi huzuridagi Maʼnaviyat va maʼrifat markazi homiyligida chop etilgan Oʻzbekiston ijodkor yoshlarining  “Hilol” toʻplamining 2-soni uchta, 113-116-sahifalari Barno Samandarovaning ijodiga bagʻishlangan. Shuningdek, Rossiya Federatsiyasining Sankt-Peterburg shahrida, 2022-yilda Xalqaro antalogiya (“Mejdunarodnaya antalogiya”) seriyasida chop etilgan “XXI vek: Molodyoj novogo Oʻzbekistana” kitobidan ham Barno Samandarovaning ijodi uchun maxsus sahifalar ajratilib, uning sheʼrlari rus tilida chop qilingan.

Yosh va iqtidorli ijodkor uchun 2022-yil yana bir quvonchli voqeani hadya etdi. Joriy yilning avgust oyida “Best Publication” Xalqaro ilmiy tadqiqotlar markazi tomonidan MDH davlatlari miqyosida oʻtkazilgan “Tashabbuskor islohotchi” tanlovida qatnashib, gʻolib boʻldi va tanlov tashkilotchilari tomonidan “Tashabbuskor islohotchi” koʻkrak nishoni va "Renessans davri: ilmiy tadqiqotlar yetakchisi" xalqaro ilmiy-amaliy tanlovi va Xalqaro konferentsiyada faol ishtiroki uchun mazkur tanlovning ham koʻkrak nishoni bilan taqdirlandi.

Tinib-tinchimas ijodkor qizning har bir kuni bir ezgu orzu yoʻlidagi intilish, yorugʻ niyatlar sari dadil qadamlar bilan boshlanadi. Ijod, oʻqib-oʻrganish sari intilaveradi. Ana shu intilishlarda vatanparvarlik, xalqparvarlik gʻoyalari va Yangi Oʻzbekistonni bunyod etish yoʻlidagi goʻzal orzulari haqida shijoat bilan soʻzlayveradi. Oʻz sheʼrlari, joʻshqin tuygʻulari bilan adabiyot davralariga tobora yaqin boʻlib borayotgan Barnoxonning isteʼdodi shakllanishi esa uning ana shu ezgu xislatlari, mehnatkashligi va samimiyligi, oldinga dadil intilishdan toʻxtamasligidan. Zero, isteʼdod ham, yorqin orzular ham ezgulik yoʻlidagi dadil intilish va sabr-matonatga yoʻgʻrilgan mehnat mahsulidir.

Robiya YOʻLDOShEVA.