ЁШЛАРГА ТАЯНЧ БЎЛАЁТГАН ЕТАКЧИ

Ёшларни тадбиркорликка жалб қилиш, уларнинг бандлигини таъминлаш бугунги куннинг долзарб масалаларидан бири саналади. Уларнинг муаммоларини тизимли ўрганиш, маҳалланинг ўзида бевосита ҳал этиш, таълим муассасаларида маънавий-маърифий ва тарбиявий ишларнинг самарадорлигини янада ошириш ишларида ёшлар етакчиларининг фаолияти муҳим ўрин тутади.

Холимбег овулида истиқомат қилаётган 7119 нафар аҳолининг 2105 нафарини ёшлар ташкил қилади. Овул ҳудудида учта мактаб мавжуд. Ўқувчиларнинг вақтини мазмунли ташкил қилишда ёшлар етакчиси Қувондиқ Ўразметов томонидан маънавий-маърифий тадбирлар, спорт ўйинлари  доимий равишда ўтказиб келинади. Қувондиқ бу лавозимда шу йилнинг 21 январидан буён фаолият кўрсатиб келмоқда. Ёшлар етакчисига маҳалла ёшларидан шу кунга қадар 110 та мурожаат келиб тушган. Шундан 96 та мурожаат маҳалланинг ўзида бевосита ҳал қилинган. Қолган қисми кўриб чиқилиши учун юқори масъул ташкилотларга юборилган.

Маҳалла аҳли асосан деҳқончилик ва чорвачилик билан шуғулланади. Ёшларнинг аксарияти эса бошқа шаҳарларда, қурилиш соҳасида ишлаб келарди. Қ.Ўразметов ёрдами билан 70 нафар ёш 10 йил муддатга 25 сотихдан ижарага ер олиб, оиласи бағрида меҳнат қилмоқда. Шунингдек, яна юзлаб ёшларнинг мавсумий бандлиги таъминланган. Ишнинг кўзини билган деҳқон ёшлар йил давомида мўл ҳосил етиштириб, яхши даромадга эга бўлаётганлигидан хурсанд.

Субсидия асосида икки нафар ёшга иссиқхона қуриб берилди. Улар полиз экинлари етиштириш орқали ҳамёнбоп нархларда ички бозорларимизни сифатли кундалик маҳсулотлар билан таъминламоқда. Юнус Турсунбоев эса 66 млн. сўм имтиёзли кредит олиб, иссиқхона фаолиятини янада кенгайтирди. У 10 йил муддатга 25 сотих ерни ижара олган.

– Ёшларнинг ота-онаси, оиласи бағрида бўлиб, меҳнат қилишига имконият яратиш, кўмаклашиш менинг асосий мақсадим. Муҳими, улар бошқа ҳудудларда ишлаб қийналишмайди. Ёшларнинг бандлигини таъминлаш орқали ҳар хил нохуш ҳолатларнинг олдини олишимиз мумкин, –дейди Қувондиқ Ўразметов.

Маҳалла ёшларининг 78 нафари ҳар хил йўналишларда олий таълим муассасаларида таҳсил олишади. Етакчи тавсияси билан 4 нафар кам таъминланган оила фарзандларига тўлов-шартнома пулининг 30 фоизи Ёшлар ишлари агентлиги томонидан тўлаб берилди. Шунингдек, бир нафар йигитнинг ҳарбий хизмат шартнома пули 100 фоиз тўланишида ёрдам берилди. Унинг саъй-ҳаракатлари билан 78 нафар ёш «Ёшлар дафтари»дан чиқарилди.

Етакчи Қ.Ўразметов келгусида маҳалла ҳудудида болалар учун минифутбол майдончаси қурилишини мақсад қилган.  

Ватан фидойи инсонларнинг меҳнати билангина равнақ топади. Ёшлар таянчига айланган Қувондиқ Ўразметовнинг хайрли ишларида муваффақият тилаб қоламиз.

Шоҳзод Қурбонбоев.