Ижтимоий ходим маҳалла аҳлининг таянчига айланди

Мамлакатимизда олиб борилаётган кучли ижтимоий сиёсатнинг энг асосий мақсади аввало, ҳар бир фуқаронинг ҳаётдан рози бўлиб яшашини таъминлаш, эҳтиёжманд қатламларни ҳар томонлама қўллаб-қувватлаш ҳамда уларнинг жамиятда мустаҳкам ўрин топишига кўмаклашишдан иборатдир. Бу борада ташкил этилган “Инсон” ижтимоий хизматлар марказлари жойларда халқ билан давлат ўртасидаги энг муҳим ва ишончли кўприкка айланиб улгурди. Ушбу марказларнинг масъулиятли ва шарафли вазифаларини елкасига олган ижтимоий ходимлар ҳар куни кўплаб оилаларнинг дардига дармон бўлиб, уларнинг муаммоларини бартараф этиш йўлида тинимсиз меҳнат қилмоқдалар.

Ана шундай фидойи касб эгаларидан бири – Амударё тумани “Инсон” ижтимоий хизматлар марказининг Бўстон маҳалласига бириктирилган ижтимоий ходими Жавоҳир Ражабовдир. У 2024 йилнинг сентябрь ойидан буён мазкур маҳалла фуқаролар йиғинида ижтимоий ходим сифатида сермаҳсул фаолият олиб бормоқда.

Бугунги кунда Бўстон маҳалласида жами 1703 та оила истиқомат қилади ва улардаги аҳоли сони 4603 нафарни ташкил этади. Мазкур ҳудудда яшовчи 158 нафар ногиронлиги бўлган шахслар, Ижтимоий ҳимоя ягона реестрига киритилган 146 та оила ҳамда васийлик ва ҳомийликка олинган 13 нафар вояга етмаган болалар доимий равишда ижтимоий ходимнинг диққат марказида бўлиб келмоқда. Бу тоифадаги фуқароларнинг ҳаёт сифатини яхшилаш, уларни жамиятга тўлақонли интеграция қилиш ва ижтимоий яккаланиб қолишларининг олдини олиш мақсадида тизимли ишлар йўлга қўйилган.

Хусусан, Жавоҳир Ражабовнинг бевосита ташаббуси ва амалий ҳаракатлари билан ҳаракатланишида нуқсони бўлган ёки ўзгалар кўмагига муҳтож 9 нафар ногиронлиги бўлган шахсларга махсус ҳассалар, 2 та оддий ногиронлик аравачаси ҳамда 1 та замонавий электрон юритмали аравача етказиб берилди. Шу билан бирга, ҳаракат таянч тизимида муаммоси бўлган фуқаролар учун 4 та тирсакли қўлтиқ таёқ, эшитиш қобилияти пасайган инсонлар учун 3 та эшитиш мосламаси ҳамда 2 та катталар учун оёқ протези ажратилиши таъминланди.

Бундан ташқари, ўзгалар парваришига муҳтож бўлган ёлғиз кексалар ҳамда оғир турдаги ногиронлиги бўлган шахсларнинг ҳаёт тарзини сифатли ижтимоий хизмат кўрсатиш орқали яхшилаш мақсадида маҳалладаги 3 та 1-гуруҳ ногиронлиги бўлган шахсларга расмий равишда қаровчилар бириктирилди. Мазкур қаровчиларга меҳнат қонунчилигига асосан иш стажи юритилмоқда. Бу орқали нафақат ногиронлиги бўлган шахсларнинг кундалик эҳтиёжлари қондирилмоқда, балки уларга ғамхўрлик қилаётган инсонларнинг ҳам ижтимоий ҳамда меҳнат ҳуқуқлари мустаҳкам кафолатланмоқда.

Шу ўринда, оилаларнинг моддий фаровонлигини ошириш йўналишида қилинган ишларга ҳам алоҳида тўхталиб ўтиш жоиз. Ҳозирги кунда маҳалладаги эҳтиёжманд қатламни молиявий жиҳатдан қўллаб-қувватлаш мақсадида 135 та оила мунтазам равишда болалар нафақаси, 11 та оила эса давлат томонидан белгиланган моддий ёрдам пулларини олиб келмоқда. Шунингдек, тиббий-ижтимоий экспертиза хулосаларига асосан маҳалланинг 3 нафар фуқаросига ногиронлик гуруҳи тайинланишида ҳам ижтимоий ходим бевосита яқиндан кўмак кўрсатди. Қолаверса, маҳаллада яшовчи ёрдамга муҳтож 65 нафар фуқаронинг рўйхатлари шакллантирилиб, уларга электр энергияси ва табиий газ учун компенсация пуллари тўлаб берилди.

Жамиятнинг энг нозик ва оғриқли нуқталаридан бири бўлган оилавий келишмовчилик ҳамда зўравонлик ҳолатларининг олдини олиш борасида ҳам маҳаллада самарали механизм яратилган. Жумладан, ҳудудда истиқомат қилувчи, тазйиқ ва зўравонликдан жабрланган 3 нафар аёл-қизларга ўз вақтида зарур ёрдам кўрсатилди. Ушбу жараёнда маҳалланинг хотин-қизлар фаоли ҳамда “Инсон” ижтимоий хизматлар марказининг малакали психологлари билан яқиндан ҳамкорлик ўрнатилиб, жабрланган аёлларга комплекс психологик маслаҳатлар берилди.

Бугунги куннинг ижтимоий ходими маҳалла аҳлининг чинакам яқин кўмакчисига айланиб улгурган. Амалга оширилаётган бу каби хайрли ва савобли ишлар инсон қадрини улуғлаш, ҳеч бир фуқарони эътибордан четда қолдирмасликдек улуғвор мақсадларга хизмат қилмоқда. Ўз фуқароларининг дардига малҳам бўла оладиган, уларнинг ижтимоий фаровонлигини таъминлашни устувор вазифа деб биладиган давлатнинг келажаги эса албатта буюк бўлади.