Ijtimoiy xodim mahalla ahlining tayanchiga aylandi

Mamlakatimizda olib borilayotgan kuchli ijtimoiy siyosatning eng asosiy maqsadi avvalo, har bir fuqaroning hayotdan rozi boʻlib yashashini taʼminlash, ehtiyojmand qatlamlarni har tomonlama qoʻllab-quvvatlash hamda ularning jamiyatda mustahkam oʻrin topishiga koʻmaklashishdan iboratdir. Bu borada tashkil etilgan “Inson” ijtimoiy xizmatlar markazlari joylarda xalq bilan davlat oʻrtasidagi eng muhim va ishonchli koʻprikka aylanib ulgurdi. Ushbu markazlarning masʼuliyatli va sharafli vazifalarini yelkasiga olgan ijtimoiy xodimlar har kuni koʻplab oilalarning dardiga darmon boʻlib, ularning muammolarini bartaraf etish yoʻlida tinimsiz mehnat qilmoqdalar.

Ana shunday fidoyi kasb egalaridan biri – Amudaryo tumani “Inson” ijtimoiy xizmatlar markazining Boʻston mahallasiga biriktirilgan ijtimoiy xodimi Javohir Rajabovdir. U 2024-yilning sentyabr oyidan buyon mazkur mahalla fuqarolar yigʻinida ijtimoiy xodim sifatida sermahsul faoliyat olib bormoqda.

Bugungi kunda Boʻston mahallasida jami 1703 ta oila istiqomat qiladi va ulardagi aholi soni 4603 nafarni tashkil etadi. Mazkur hududda yashovchi 158 nafar nogironligi boʻlgan shaxslar, Ijtimoiy himoya yagona reyestriga kiritilgan 146 ta oila hamda vasiylik va homiylikka olingan 13 nafar voyaga yetmagan bolalar doimiy ravishda ijtimoiy xodimning diqqat markazida boʻlib kelmoqda. Bu toifadagi fuqarolarning hayot sifatini yaxshilash, ularni jamiyatga toʻlaqonli integratsiya qilish va ijtimoiy yakkalanib qolishlarining oldini olish maqsadida tizimli ishlar yoʻlga qoʻyilgan.

Xususan, Javohir Rajabovning bevosita tashabbusi va amaliy harakatlari bilan harakatlanishida nuqsoni boʻlgan yoki oʻzgalar koʻmagiga muhtoj 9 nafar nogironligi boʻlgan shaxslarga maxsus hassalar, 2 ta oddiy nogironlik aravachasi hamda 1 ta zamonaviy elektron yuritmali aravacha yetkazib berildi. Shu bilan birga, harakat tayanch tizimida muammosi boʻlgan fuqarolar uchun 4 ta tirsakli qoʻltiq tayoq, eshitish qobiliyati pasaygan insonlar uchun 3 ta eshitish moslamasi hamda 2 ta kattalar uchun oyoq protezi ajratilishi taʼminlandi.

Bundan tashqari, oʻzgalar parvarishiga muhtoj boʻlgan yolgʻiz keksalar hamda ogʻir turdagi nogironligi boʻlgan shaxslarning hayot tarzini sifatli ijtimoiy xizmat koʻrsatish orqali yaxshilash maqsadida mahalladagi 3 ta 1-guruh nogironligi boʻlgan shaxslarga rasmiy ravishda qarovchilar biriktirildi. Mazkur qarovchilarga mehnat qonunchiligiga asosan ish staji yuritilmoqda. Bu orqali nafaqat nogironligi boʻlgan shaxslarning kundalik ehtiyojlari qondirilmoqda, balki ularga gʻamxoʻrlik qilayotgan insonlarning ham ijtimoiy hamda mehnat huquqlari mustahkam kafolatlanmoqda.

Shu oʻrinda, oilalarning moddiy farovonligini oshirish yoʻnalishida qilingan ishlarga ham alohida toʻxtalib oʻtish joiz. Hozirgi kunda mahalladagi ehtiyojmand qatlamni moliyaviy jihatdan qoʻllab-quvvatlash maqsadida 135 ta oila muntazam ravishda bolalar nafaqasi, 11 ta oila esa davlat tomonidan belgilangan moddiy yordam pullarini olib kelmoqda. Shuningdek, tibbiy-ijtimoiy ekspertiza xulosalariga asosan mahallaning 3 nafar fuqarosiga nogironlik guruhi tayinlanishida ham ijtimoiy xodim bevosita yaqindan koʻmak koʻrsatdi. Qolaversa, mahallada yashovchi yordamga muhtoj 65 nafar fuqaroning roʻyxatlari shakllantirilib, ularga elektr energiyasi va tabiiy gaz uchun kompensatsiya pullari toʻlab berildi.

Jamiyatning eng nozik va ogʻriqli nuqtalaridan biri boʻlgan oilaviy kelishmovchilik hamda zoʻravonlik holatlarining oldini olish borasida ham mahallada samarali mexanizm yaratilgan. Jumladan, hududda istiqomat qiluvchi, tazyiq va zoʻravonlikdan jabrlangan 3 nafar ayol-qizlarga oʻz vaqtida zarur yordam koʻrsatildi. Ushbu jarayonda mahallaning xotin-qizlar faoli hamda “Inson” ijtimoiy xizmatlar markazining malakali psixologlari bilan yaqindan hamkorlik oʻrnatilib, jabrlangan ayollarga kompleks psixologik maslahatlar berildi.

Bugungi kunning ijtimoiy xodimi mahalla ahlining chinakam yaqin koʻmakchisiga aylanib ulgurgan. Amalga oshirilayotgan bu kabi xayrli va savobli ishlar inson qadrini ulugʻlash, hech bir fuqaroni eʼtibordan chetda qoldirmaslikdek ulugʻvor maqsadlarga xizmat qilmoqda. Oʻz fuqarolarining dardiga malham boʻla oladigan, ularning ijtimoiy farovonligini taʼminlashni ustuvor vazifa deb biladigan davlatning kelajagi esa albatta buyuk boʻladi.