БОЛАЖОНЛАРНИНГ КАТТА БУВИЖОНИ

Инсон эсини таниган кунидан бошлаб, ширин орзулар оғушида яшайди. Ўзи танлаган йўналиши бўйича шунчаки фаолият юритишни эмас, балки касбий жиҳатдан етукликка эришишга, эл-юртга манзур ишлар қилишга интилади. Лекин кўнгилдагидай иш шароитларини яратиш, ўзи танлаган соҳада фаолият юритиб, халқ ҳурмати, эътирофига сазовор бўлиш ҳаммага ҳам насиб этавермайди. Бунинг учун инсонда кучли билим ва салоҳият, тажриба ва ташаббускорлик сифатлари мужассам бўлмоғи, қолаверса, ана шу билим ва салоҳиятини амалиётга татбиқ этишга қодир, касбий жиҳатдан етук бўлмоғи талаб этилади.

Сайёрахон Жумамуродова, гарчи  оддий ишчи оиласида дунёга келган бўлса-да, эсини таниган куниданоқ ўқитувчи бўлиш орзуси билан яшаб, шу орзулари оғушида улғайди. Ўзи каби ўйинқароқ  болаларни атрофига йиғиб, “мактаб-мактаб” ўйинини ташкиллаштирар, ташкил этган “мактаб”ининг “ўқитувчи”си  ҳам ўзи бўларди.

Болаликдаги беғубор орзулари кейинчалик унинг ҳаёти мазмунига айланди, 40-сонли мактабнинг 8-синфини фақат аълога, имтиёзли шаҳодатнома билан тугатган Сайёрахон 1987 йилда Тошкент педагогика билим юртига суҳбат асосида ўқишга қабул қилинди. Мазкур ўқув даргоҳини ҳам фақат аълога, имтиёзли, бошланғич синф ўқитувчиси ва куни узайтирилган гуруҳ тарбиячиси мутахассислиги бўйича тугатган Сайёрахон илк меҳнат фаолиятини 1991 йилда ўзи таълим олган 40-сонли мактабда бошланғич синф ўқитувчиси лавозимида ишлашдан бошлади.

Қайси соҳада бўлишидан қатъий назар, иқтидорли, билимдон ва ташаббускор мутахассислар ҳамиша қадрланади. Сайёрахон ўзининг педагогик фаолияти давомида, 2009 йилда “Йилнинг энг яхши фан ўқитувчиси” кўрик-танловининг туман босқичи ғолиби, 2010 йилда Қорақалпоғистон миқёсида “Болага дўстона муносабат мактаби” лойиҳаси тренери, 2012 йилда Ўзбекистон Республикаси Халқ таълими Вазирлиги ва "Ўзбекистон" телеканали ҳамкорлигида ташкил этилган “Ўйла, изла, топ” интеллектуал танловида ўз гуруҳи билан иштирок этиб, 3-ўрин соҳибаси, Ўзбекистон Республикаси ХТВнинг фахрий ёрлиғи, Ўзбекистон Республикаси Халқ таълими аълочиси, “Ўзбекистон Республикаси Мустақиллигининг 25 йиллиги” эсдалик нишонлари соҳибаси бўлди.

Бундан ташқари, у 40-сонли мактаб директорининг маънавий-маърифий ишлар бўйича ўринбосари лавозимида фаолият юритган даврида, 2014-2015 йилларда “Энг фидойи ўқитувчи”, мактаб жамоаси эса “Янгиликка интилувчи мактаб жамоаси”, “Энг яхши безатилган мактаб” йўналишларида ғолиб деб топилди ва соҳа вазирликлари томонидан қимматбаҳо совғалар билан тақдирланди.

“Йил аёли” Қорақалпоғистон Республикаси танловининг фаол иштирокчиси ва совриндори сифатида умумтаълим мактабларида, қишлоқ ва маҳаллаларда маънавий-маърифий тадбирлар, ёш оилалар аъзолари билан самимий мулоқот тадбирларини ташкиллаштирди. Айниқса, у 40-сонли мактаб ўқувчилари иштирокида ҳар ойда бир марта масъул ўқитувчи билан биргаликда “Заминнинг боласи” информацион дастурини тайёрлаб, Амударё телевидениеси орқали эфирга бериб, серқирра фаолият соҳибаси сифатида машҳурликка эришди. Унинг жисмоний тарбия фани ўқитувчиларини қайта тайёрлаш бўйича тренер сифатидаги фаолияти ҳам таҳсинга лойиқ. Чунки С.Жумамуродова бир неча йил давомида жисмоний тарбия фани ўқитувчиларидан иборат бир неча гуруҳларга инновацион лойиҳалар асосида машғулотлар ўтиб,  Қорақалпоғистон Республикаси миқёсида тренерлар тайёрлади.

40-сонли мактаб директорининг маънавий-маърифий ишлар бўйича ўринбосари сифатида мактаб ўқувчилари орасида китобхонлик муҳитини юқори даражага  кўтарди ва “Китобхон мактаб” Республика танловида 40-сонли мактаб китобхонлари 1-ўринни эгалладилар.

Ўз педагогик фаолиятини мактабгача таълим-тарбия соҳасида давом эттириш ниятида 2019 йилнинг 1 март санасидан бошлаб, “Аму қуёши” нодавлат МТТга раҳбарлик қилаётган Сайёрахон Жумамуродова ҳамон изланишда. Унинг ўз ҳаёт тарзи учун белгилаб олган мезони, доимий амал қиладиган эзгу шиори бор: “Ҳаёт карвонида бир зум тўхтама, олдинга интилишдан чарчама, ана шунда халқ учун ва ўзинг учун кўнгилли шароитлар ярата оласан!” Ана шу мезонлар асосида иш юритишга, яшашга интилган Сайёрахон азиз халқи ва ўз орзуларини рўёбга чиқариш йўлида эзгу қадам ташлади.

Муассасада яратилган шарт-шароитлар, юқори малакали педагог кадрлар салоҳияти, жамоадаги ўзаро меҳр-оқибат, миллий-маънавий муҳитнинг соғломлиги боис, фарзандларини “Аму қуёши” МТТга беришни хоҳловчилар сафи йил сайин ошди. 100 нафар тарбияланувчини ўз бағрига олган МТТда айни пайтда халқимизнинг ширин-шакар ўғил-қизлари тарбияланмоқда. Кичкинтойларга замон талаблари даражасида таълим-тарбия бериш учун муассасада барча шароитлар яратилган. Хусусан, тарбияланувчилар ўз лаёқатлари, қолаверса, ота-оналарининг хоҳиш-истакларига кўра, инглиз ва рус тили тўгаракларига жалб этилган. Уларга 11 нафар малакали педагог ходимлар таълим-тарбия беришади. Педагог ходимларнинг 3 нафари олий, 8 нафари ўрта махсус маълумотга эга етук мутахассислардир. Шунингдек, 6 нафар техник ходимлар меҳнати туфайли муассасада озода ва саришта муҳит яратилган.

Алоҳида иқтидорли болаларнинг қизиқишлари ва ота-оналарининг, хоҳиш-истакларига кўра, Динора Қурбониёзова раҳбарлигида шартнома асосида қизалоқлар учун гимнастика тўгараги ва ўғил болалар учун Хурсанд Мадраҳимов раҳбарлигида каратэ тўгараклари фаолияти йўлга қўйилган.

Муассасада турли байрам саналари муносабати билан катта, ўрта ва иккита кичик гуруҳ тарбияланувчилари орасидан алоҳида қобилиятли болалардан иборат гуруҳлар тузилиб, “Заковатли болалар” танловлари ўтказиб келинади ва болажонлар ўзлари ўрганган куй-қўшиқларни мароқ билан ижро этадилар. Ҳатто Шаҳрам Абдуллаев, Беҳзоджон Очилбоев, Шарифбой Арслонбеков каби жажжи ашулачилар ўз ижролари билан Амударё телевидениеси орқали чиқишлар қилишди. “VUNDERKIND.uz” болалар журналида “Аму қуёши” нодавлат МТТ тарбияланувчилари эришаётган ютуқлар ҳақида махсус репортаж ёритилиб, таълим-тарбия жараёнига юқори баҳо берилди.

Ақлли, билимдон 2 нафар фарзанднинг меҳрибон онаси, 3 нафар ширин невараларнинг бувижониси, 100 нафар “Аму қуёши” нодавлат МТТ тарбияланувчиларининг катта бувижони С.Жумамуродованинг режалари, дилига тугиб қўйган эзгу орзулари кўп. У муассасада тарбияланиб, 2023-2024 ўқув йилида 1-синфга борадиган болалар учун 25 ўринли яна бир гуруҳ ташкил этиш ниятида.

– Бу гуруҳ ишлайдиган ота-оналар учун қулай шароит яратиш имконини беради, – дейди Сайёрахон галдаги режалари ҳақида сўзларкан. – Болалар мактабдан чиққач, МТТда дам олишлари, овқатланиб, спорт билан шуғулланишлари мумкин бўлади. Муҳими, ота-оналари хотиржам бўлишади.

Бундан ташқари, Сайёрахон шартнома асосида ҳар бирида 20-25 боладан иборат ментал арифметика, шахмат тўгараклари фаолиятини йўлга қўйишни, шунингдек, ривожланишда, айниқса,  нутқида муаммолари бор болалар учун дефектология йўналишида 20-25 болага таълим-тарбия беришга мўлжалланган қўшимча гуруҳ ташкил этишни режалаштирган.

– Агар дефектология йўналиши бўйича гуруҳ фаолиятини йўлга қўйсак, ривожланишида нуқсони бор фарзандлари бўлган ота-оналар учун қулайликлар яратган бўламиз, – давом этади Сайёрахон. – Яна бир муҳим жиҳати, муассасамиз шаҳримиз марказида жойлашган. Ҳатто туманнинг чекка ҳудудларидан ҳам болаларни қабул қилиш имконияти мавжуд.

Сайёрахон ўз ҳаёт тарзи учун белгилаб олган мезонларга кўра, олдинга интилишдан, янги-янги ғояларини рўёбга чиқариш йўлида изланишдан асло тўхтамайди. Чунки фаолиятидаги бир лаҳзалик сукунат инсон учун бир неча ой, балки бир неча йиллик тараққиётга тўсиқ бўлишини у жуда яхши билади. Фақат олдинга интилиб яшаш эса "Аму қуёши” нодавлат МТТ тарбияланувчиларининг катта бувижони учун янги ютуқлар сари йўл очаверади.

Робия ЙЎЛДОШЕВА.