ТУМАНИМИЗ АҲОЛИСИГА ТЕЛЕКОММУНИКАЦИЯ ХИЗМАТИ КЎРСАТИШ АҲВОЛИ НАЗОРАТ ҚИЛИНДИ
Ҳозирги даврда ҳаётимизни ахборот-коммуникацион технологияларисиз тасаввур этишимиз қийин. Барча соҳаларда бўлгани каби мазкур соҳада ҳам узлуксиз ислоҳотлар олиб борилаётир. Натижада аҳолига сифатли телекоммуникация хизматлари кўрсатилишига эришилаётир. Бу борадаги ишларнинг сифати, линия кабель хўжалиги аҳволи Рақамли технологиялар вазирлиги Қорақалпоғистон Республикаси ҳудудий сектори ва “Ўзкомназорат” инспекцияси Қорақалпоғистон Республикаси ҳудудий бўлими томонидан мунтазам назорат қилиниб борилмоқда. Шунингдек, хизматлар сифатини ошириш мақсадида эски мис кабеллар ўрнига шиша толали кабеллар ўрнатилаётир.
Ўзбекистон Республикаси Президентининг тегишли Қарорига асосан “Ўзкомназорат” инспекцияси Қорақалпоғистон Республикаси ҳудудий бўлими ходимлари томонидан бу ишларнинг суръати, сифатли бажарилиши, янгидан қурилаётган инфраструктура объектларида телекоммуникация тармоқларини тортиш жараёнида белгиланган қоидаларга амал қилиниши таъминланишига оид кўпгина чора-тадбирлар амалга оширилаётир.
Яқинда шу мақсадда бўлим ходимлари Амударё тумани “Гулзор” маҳалласи ҳудудида қурилаётган қўп қаватли турар жой биноларини бориб кўрди. Қурувчиларга мазкур турар жой биноларида телекоммуникация объектларини ўрнатиш учун тегишли майдонлар ва инфратузилмаларнинг ажратилишини, бинолар ичида телефония, маълумотлар узатиш ва интернет тармоқлари, кабель телевидения ва эфир телевидениясини жамоавий қабул қилиш тизимлари, шунингдек, «хавфсиз уй» ва қўриқлаш сигнализацияси кабелларини ўтказиш учун паст токли кабель шахталарини сифатли ўрнатиш юзасидан тарғибот ва ташвиқот ишлари олиб борилди.
Ўрганиш жараёнида қўп қаватли турар жой биноларни барпо этаётган қурилиш ташкилотлари масъулларига Ўзбекистон Республикаси Президентининг махсус Қарори талаблари ва шаҳарсозлик нормаларида белгиланган талаблар тушунтирилди унга амал қилиш лозимлиги юзасидан топшириқлар берилди.
Шуни унутмаслик лозимки, кўрсатилаётган телекоммуникация хизматларининг узлуксиз ва сифатли ишлашида магистрал оптик толали алоқа линияларининг тўғри эксплутация қилиниши ҳам муҳим жиҳатлардан бири ҳисобланади. Бу борада ҳам телекоммуникация операторларининг линия кабел хўжаликлари ва иншоотларининг хавфсизлиги ва бутунлигини таъминлаш бўйича амалга ошираётган ишлари кўздан кечирилди.
2022 йил бошидан шу кунга қадар Қорақалпоғистон Республикаси ҳудудида жами 22 маротоба магистрал оптик толали алоқа линияларида узилишлар кузатилди. Шунинг 7 таси ўғирлик сабабли содир бўлган бўлса, қолганларида жисмоний ва юридик шахсларнинг эҳтиётсизлиги ҳамда рухсатсиз ерда қазиш ишларини амалга оширганлиги сабабли содир бўлган.
Ўзбекистон Республикаси Вазирлар Маҳкамасининг тегишли қарори билан “Телекоммуникация линиялари ва иншоотларини муҳофаза қилиш қоидалари” тасдиқланган. Мазкур қоида билан кабель ва ҳаво коммуникациялари учун шу коммуникациялар бўйлаб ўтган, ер ости кабель трассасидан ёки ҳаво линияларининг чекка симларидан ҳар қайси томондан 2 метр масофадаги тўғри чизиққа параллель равишда белгиланган ер участкасидан иборат муҳофаза ҳудуд белгиланган. Алоқа коммуникациялари трассаларидаги муҳофаза ҳудудлар ва очиқ жойлар доирасида ушбу коммуникациялар эгаларининг ёзма равишдаги розилигисиз 30 сантиметрдан ортиқ чуқурликда ҳар қандай қурилиш, ер қазиш, монтаж ва портлатиш ишлари, қишлоқ хўжалиги далаларида қишлоқ хўжалиги зарурати учун ерни юмшатиш, шунингдеқ суғориш тармоқларини тозалашни амалга ошириш, хўжалик уйлари ва бошқа иншоотлар барпо этиш, дарахтлар экиш, дала шийпонларини жойлаштириш, чорва моллари боқиш, материаллар, ем-хашак ва ўғитларни тўплаб қўйиш, гулханлар ёқиш, ўқ отиш майдонлари ташкил қилиш таъқиқланади. Ушбу қоида талабларини бузган шахслар Ўзбекистон Республикасининг “Маъмурий жавобгарлик тўғрисида”ги Кодексининг тегишли моддаларига асосан жавобгарликка тортилиши мумкин.
“Ўзкомназорат” инспекцияси Қорақалпоғистон Республикаси ҳудудий бўлими ходимлари томонидан 2022 йил бошидан шу кунга қадар жами 9 нафар шахсларга нисбатан “Телекоммуникация линиялари ва иншоотларини муҳофаза қилиш қоидалари” талабларини бузганлиги учун Маъмурий жавобгарлик тўғрисидаги Кодекснинг 154-моддаси 1-қисмига асосан жазолар қўлланилган. Кўриниб турибдики, қарс икки қўлдан чиқади деганларидай, аҳолининг сифатли телекоммуникация хизматларидан фойдаланиши кўп жиҳатдан уларнинг ўзларига ҳам боғлиқ. Назорат тадбири давомида бу ҳақда фуқароларга кенг тушунтиришлар берилди.
Ойгул Ражабова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
