Хавфсиз муҳит яратиш йўлида: Қўриқлаш хизматининг амалий натижалари

Жамиятда тинчлик ва осойишталикни таъминлаш, фуқароларнинг хавфсизлигини кафолатлаш ҳамда ҳуқуқ-тартиботни мустаҳкамлаш ҳар қандай тараққиётнинг энг асосий пойдевори ҳисобланади. Бугунги кунда мамлакатимизда жиноятчиликнинг барвақт олдини олиш, ҳуқуқбузарликлар профилактикасини мутлақо янги босқичга олиб чиқиш мақсадида тизимли ва кенг кўламли ислоҳотлар амалга оширилмоқда. Айниқса, бу борадаги ишларни бевосита қуйи бўғин, яъни маҳалла даражасида ташкил этиш, ҳар бир ҳудуднинг ўзига хос хусусиятларидан келиб чиққан ҳолда манзилли чора-тадбирларни белгилаш давлатимиз сиёсатининг устувор йўналишларидан бирига айланди. Бу мураккаб ва масъулиятли жараёнда ички ишлар органлари, хусусан, қўриқлаш хизмати бўлинмаларининг ўрни ҳамда иштироки беқиёсдир.

Ўзбекистон Республикаси Президентининг 2026 йил 5 январь кунги “Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилган қўшимча чора-тадбирлар тўғрисида”ги Қарори бу борадаги ишларни янада жадаллаштириш учун муҳим дастуриламал ва ҳуқуқий асос бўлиб хизмат қилмоқда.

Мазкур ҳужжатнинг асосий моҳияти аҳоли яшаш жойларида криминоген вазиятни соғломлаштириш, фуқароларнинг ҳаёти, соғлиғи ва мол-мулки дахлсизлигини ишончли ҳимоя қилиш ҳамда жамоат тартибини сақлашнинг энг замонавий, самарали механизмларини амалиётга кенг татбиқ этишдан иборатдир. Ушбу қарор ижросини таъминлаш юзасидан жойлардаги масъул идоралар томонидан аниқ мақсадга йўналтирилган чора-тадбирлар изчил равишда олиб борилмоқда.

Хусусан, Қорақалпоғистон Республикаси Ички ишлар вазирлиги ҳузуридаги Қўриқлаш хизматининг тарғибот ишлари бўйича белгиланган махсус иш режасига асосан, Амударё тумани Ички ишлар бўлими ҳузуридаги Қўриқлаш хизмати томонидан 2026 йил давомида туман маҳаллаларида хавфсиз муҳитни яратиш бўйича кенг қамровли тадбирлар амалга оширилмоқда. Асосий мақсад – ҳуқуқбузарликларнинг барвақт олдини олиш тизими самарадорлигини янада ошириш ва аҳолининг ҳуқуқий маданиятини юксалтиришдир. Шу мақсадда, Амударё тумани Ички ишлар бўлими ҳузуридаги Қўриқлаш хизматининг 1-сонли техник қўриқлаш маркази бошлиғи Элёр Юсупов ва бошқа малакали ходимлар иштирокида маҳалла ҳудудларида хатлов жараёнлари ўтказилди ҳамда объектларнинг ҳимояланганлик даражаси ўрганилди.

Жорий йилнинг 12 май куни ушбу профилактик тадбирлар доирасида навбатдаги тарғибот учрашуви ташкил этилди. Тумандаги Олмазор маҳалласи ҳудудида жойлашган Амударё тумани Мактабгача ва мактаб таълим бўлими ходимлари билан ўтказилган очиқ мулоқот давомида соҳа мутахассислари томонидан замонавий қўриқлаш хизматининг ўзига хос афзалликлари, энг сўнгги техник имкониятлари ва унинг кундалик хавфсизликни таъминлашдаги аҳамияти ҳаётий мисоллар ёрдамида батафсил тушунтириб берилди. Ташкилотлар вакилларига юқори технологик воситалар ёрдамида мулк дахлсизлигини асрашда профессионал ёндашувнинг нечоғлик муҳим ва фойдали эканлиги етказилди.

Олиб борилган мақсадли ва таъсирчан тарғибот-ташвиқот ишлари ўз натижасини берди. Тушунтириш ишлари якунига кўра, фуқаролар ва тадбиркорларда ўз хавфсизлигига бўлган эътибор янада ортиб, улар томонидан аниқ амалий қадамлар ташланди. Жумладан, олиб борилган тарғиботлар натижасида тумандаги Куюк кўпир овули ҳудудидан жами 7 та, Хитой овули ҳудудидан эса 6 та турли йўналишдаги тадбиркорлик объектлари, шунингдек, 2 та фуқаро хонадони замонавий “Ташвиш” тугмаси орқали марказлаштирилган қўриққа олинди. Бунинг натижасида ушбу объектларнинг, хусусий мулкларнинг ва у ердаги инсонларнинг тўлақонли хавфсизлиги сутканинг исталган вақтида ишончли тарзда таъминланишига эришилди.

Жиноятчиликни жиловлаш ва ҳуқуқбузарликларнинг олдини олишга қаратилган бу каби тизимли саъй-ҳаракатлар халқимизнинг тинч ва фаровон ҳаёт кечириши, тадбиркорларнинг эса эртанги кунга ишонч билан хотиржам фаолият юритиши учун энг муҳим кафолат бўлиб хизмат қилмоқда.