ЁЗ МАВСУМИДА АҲОЛИНИНГ ЧЎМИЛИШ ПАЙТИДА СУВГА ЧЎКИШИНИНГ ОЛДИНИ ОЛИШ БЎЙИЧА ЎҚУВ МАШҚИ ЎТКАЗИЛДИ

Ёз фаслининг юқори ҳароратли, иссиқ кунларининг ҳам ўз гашти бор. Бундай дамларда соя-салқинларда дам олиш, сувда чўмилишни кўпчилик орзиқиб кутади. Бироқ айнан шундай жараёнларда хавфсизлик қоидаларига амал қилинмаслиги – кўпгина кўнгилсизликларни келтириб чиқаради.

Ўтган йилларда содир бўлган сувда чўкиш ҳолатларига назар ташласак, сабаблари оддийгина: ҳали сузишни яхши ўрганмаган болаларнинг оқим тез ва суви чуқур ҳавзаларда чўмилиши, ёш болаларнинг эҳтиётсизлик оқибатида сувга тушиб кетиши ва ҳоказолар. Айрим ҳолларда эси-ҳуши жойида, ёши катта одамларнинг ҳам белгиланмаган сув ҳавзаларида чўмилиш вақтида эҳтиётсизлиги оқибатида оқиб кетиши ҳолатлари содир бўлган.

Жорий йил ёз келиб, кунлар исиши билан турли каналларда, сув ҳавзаларида Амударёнинг оқим паст ҳудудларида аҳоли чўмилишни бошладилар. Бундай вақтларда уларнинг ҳаёти хавфсиз, дея оламизми? Афсуски йўқ!

Шу йилнинг 27 май куни Амударёнинг Қипчоқ шаҳарчаси ҳудудидан оқиб ўтувчи қисми соҳилида жорий йил ёз мавсумида аҳолининг сувда чўкиши билан боғлиқ бахтсиз ҳодисаларнинг олдини олиш юзасидан ўқув- машғулоти ўтказилди.

Тадбирда туман ҳокимлиги, Фавқулодда вазиятлар бўлими, миллий гвардия ходимлари, ҳудуддаги овул, маҳалла, шаҳарча фуқаролар йиғинлари раислари, профилактика инспекторлари, тиббиёт ходимлари ва аҳоли иштирок этдилар.

Ўқув машғулотида йиғилганларга туман Фавқулодда вазиятлар бўлими ходими Бекзод Тажибоев ёз мавсумида аҳолининг сувда чўкиши билан боғлиқ бахтсиз ҳодисаларнинг олдини олиш борасида овул, маҳалла фуқаролар йиғинлари масъуллари, Мактабгача ва умумий ўрта таълим муассасалари раҳбарлари, ота-оналар зиммасидаги амалга оширилиши лозим бўлган вазифалар хусусида маъруза қилди. Шунингдек, чўмилишга рухсат этилмаган акваторияларда чўмилиш, спиртли ичимлик истеъмол қилган ҳолда чўмилиш, ёш болаларнинг катта ёшли оила аъзолари иштирокисиз чўмилиши оқибатида содир бўлиши мумкин бўлган бахтсиз ҳодисаларнинг олдини олишга ҳар бир фуқаро масъул эканлигини таъкидлади. Аҳолининг чўмилиш мавсумида сув ҳавзаларида хавфсизликни таъминлаган ҳолда кичик ҳажмли кемалардан тўғри фойдаланиш қоидаларини кенг тушунтирди.

Шундан сўнг ота-она қаровисиз белгиланмаган ҳудудда сувга чўмилиб, оқиб кетаётган ўсмирни қутқариш амалиёти кўрсатиб берилди. Ўсмирни фавқулодда вазиятлар бўлими ходимлари сувдан олиб чиқишиб,замбилда соҳил ичкарисига етказишди ва гавдасини зарур ҳолатга келтириб, чўкиш пайтида ютган сувларини қайд қилдиришди. Шошилинч етиб келган “Тез тиббий ёрдам” бўлими ходимлари ўсмирга биринчи тиббий ёрдам кўрсатишди. Аслида бу тайёрланган ўқув машғулоти бўлса-да, таъқиқланган жойда чўмилишнинг оқибатини тўла ифодалаб бера олди.

Ёши улуғлар “ўт балосидан, сув балосидан ўзинг асрагайсан”, дея дуо қилишлари бежиз эмас.

Бунингдек кўнгилсизликларнинг олдини олишда кенг жамоатчилик, ота-она назорати ва турли усуллар билан тарғибот олиб бориш лозимлиги юзасидан Тўлқин овул фуқаролар йиғини раиси Рашид Абдуғалиев, Чойкўл овул фуқаролар йиғини раиси Бекзод Айтеков, Уйшин маҳалла фуқаролар йиғини раиси Рустам Ражабовлар ўз фикр-мулоҳазаларини билдирдилар. Шунингдек, туманимизнинг турли ҳудудларида мавжуд сув ҳавзаларининг чўмилиш таъқиқланган жойларига махсус белгилар қўйилиши лозимлигини таъкидладилар.

Инсон ҳаёти – бебаҳо. Уни беъмани орзу-ҳаваслар йўлида хатарга қўйиш, таъқиқланган жойларда чўмилиб, ўзини кўз-кўз қилиш мумкин эмас. Чунки инсон ҳаётга бир мартагина келишини унутмайлик.

Ойгул РАЖАБОВА.