ИЧКИ КЎЧАЛАРНИНГ ТУПРОҚ ЙЎЛЛАРИГА ҚУМ-ШАҒАЛ АРАЛАШМАСИ ЁТҚИЗИЛМОҚДА

Ўзбекистон Республикаси Вазирлар Маҳкамасининг “Қорақалпоғистон Республикаси ҳудудларини ижтимоий-иқтисодий ривожлантириш, қулай бизнес муҳитини яратиш, инновацион технологияларни жорий этиш ва инфратузилмалар билан таъминланганлик даражасини янада яхшилаш орқали аҳоли фаровонлигини оширишнинг қўшимча чора-тадбирлари тўғрисида”ги Қарори республика ҳудудида аҳоли фаровонлигини ошириш, уларга муносиб турмуш ва меҳнат шароитини яратишга муҳим пойдевори бўлиб хизмат қилмоқда.

Қарорда республикада мавжуд имкониятлардан самарали фойдаланиш, тадбиркорликни қўллаб-қувватлаш, аҳоли бандлигини таъминлаш, уларнинг даромадларини ошириш чора-тадбирлари белгилаб берилган. Шунингдек, ер ва сув ресурсларидан самарали фойдаланиш орқали қишлоқ хўжалиги маҳсулотлари етиштиришни кўпайтириш, ҳудуднинг инвестиция ва ишбилармонлик муҳитини яхшилаш, ёшларнинг илғор ташаббусларини қўллаб-қувватлаш, таълим соҳасига қўшимча имкониятлар ва инсон капитали ривожини янги босқичга кўтаришга шарт-шароит яратиш бўйича қатор вазифалар белгиланган.

Қарорга мувофиқ Қорақалпоғистон Республикасининг туман ва шаҳарлари ободонлаштириш бошқармалари таркибида туман ва шаҳар ҳокимликларига қарашли Ички йўлларни таъмирлаш участкаларини ташкил этиш, улар томонидан тупроқ йўлларни босқичма-босқич қум-шағалли йўлларга ўтказиш ҳам асосий вазифалардан қилиб қўйилган.

Қарор ижросини таъминлаш борасида ўтган давр ичида амалга оширилган саъй-ҳаракатлар туманимиз аҳолисига муносиб турмуш шароитлари яратилишига замин бўлди десак, адашмаган бўламиз.

Қарорнинг биргина банди, яъни – туман ва шаҳарлар тасарруфидаги ички тупроқ йўлларни қум-шағал йўлларга айлантириш ишларига жорий йилнинг ўзида 42 млрд. 348 миллион сўм пул ажратилди ва 24 километр тупроқли ички йўллар таъмирланиши режалаштирилган.

Шу кунгача Манғит шаҳрининг Ойбек маҳалласидаги 11 та – Ўрикзор, Учқун, Бодомзор, Умид, Ғафур Ғулом, Қорақалпоғистон, Ойбек, Ҳамкорлик, Нақшинкор, Бунёдкор-2 кўчаларига ҳамда Ўрта кўчанинг 4,59 километр қисмига қум-шағал ётқизилди. Дўстлик маҳалласининг Низомий, Дўстлик-1, Дўстлик-2 кўчаларининг 1 километр қисмига, Фаровон маҳалласининг ички йўлларининг 3,48 километр қисмига қум-шағал ётқизиш кўзда тутилган.

Шунингдек, Бўстон маҳалласининг Гулзор-1, Гулзор-2 кўчалари, Зафаршон, Узумзор, Узумзор-1, Қўшчиғир-1 кўчаларининг ички йўлларига қум-шағал ётқизилди. Оқ олтин, Фидокор, Ёшлик, Ш.Рашидов, Бўстон, Бинокор, Нурафшон-2 кўчаларида эса ишлар давом эттирилади. Гулзор маҳалласининг Аваз Ўтар кўчалари, Янгиобод маҳалласининг Абдулла Авлоний 1-, 3-, 5-кўчаларини ҳам таъмирлаш кўзда тутилган. Дурунки маҳалласи бўйича эса 5,2 километр ички тупроқ йўлларга қум-шағал ётқизилиб, тартибга келтирилди.

Йўллар ободлиги – эл қувончи. Ахир қай манзилга отлансак ҳам йўллардан борамиз. Текис, равон қулай йўллар эса узоғимизни яқин қилади.

Ҳукуматимизнинг “Қорақалпоғистон Республикаси ҳудудларини ижтимоий-иқтисодий ривожлантириш, қулай бизнес муҳитини яратиш, инновацион технологияларни жорий этиш ва инфратузилмалар билан таъминланганлик даражасини янада яхшилаш орқали аҳоли фаровонлигини оширишнинг қўшимча чора-тадбирлари тўғрисида”ги Қарорига мувофиқ республикамизда, туманимизда амалга оширилаётган саъй-ҳаракатлар кўламли жуда кенг. Бу каби хайрли ишлар замирида аҳолига қулайликлар яратиш, халқимиз турмуш фаровонлигини янада яхшилашдек эзгу мақсадлар мужассам.

Ойгул РАЖАБОВА.