Маданият бўлими биносида Ички ишлар вазирлигининг ашула ва рақс ансамбли томонидан хайрия концерти ўтказилди

Ўзбекистон Республикаси Ички ишлар вазирининг тегишли буйруғига асосан тасдиқланган махсус режа доирасида айни кунларда мамлакатимиз бўйлаб вазирлик тасарруфидаги ашула ва рақс ансамблининг хайрия концерт дастурлари ўтказилмоқда. Ушбу тадбирлар орқали ватан ҳимояси йўлида фидокорона хизмат қилиб ҳалок бўлган ёки ногирон бўлиб қолган ички ишлар органлари ходимларининг оилаларини моддий ва маънавий қўллаб-қувватлаш, шу билан бирга жамоатчиликка ватанпарварлик, ҳамжиҳатлик ва дўстлик туйғуларини сингдириш мақсад қилинган.

Шу каби тадбирларнинг навбатдагиси жорий йилнинг 18 апрель куни Амударё тумани Маданият бўлими биносида ташкил этилди. Унда ички ишлар тизими фахрийлари, хизмат бурчини адо этиш вақтида ҳалок бўлган ёки жароҳат олиб, ногирон бўлиб қолган ходимларнинг оила аъзолари, маҳаллий аҳоли, фаол ёшлар ва санъатсеварлар иштирок этди.

Концерт дастурида Ўзбекистонда хизмат кўрсатган артист, ИИВ Маданият саройи раҳбари, подполковник Учқун Тиллаев бошчилигидаги ансамбль аъзолари томонидан юксак ижро маҳорати тақдим этилди. Халқимиз севган сўз усталари — Ўткир Муҳаммадхўжаев ва Зокир Очилдиев, хонандалар — Гўзал Жуманиёзова (Дилсўз), Улуғбек Холиқов, Суҳроббек Ҳамдамов ҳамда Нурали Шукуруллаевлар ижросидаги куй-қўшиқлар томошабинларга юксак кайфият улашди.

Ушбу хайрия тадбири орқали тинчлик ва осойишталикни таъминлаш йўлида ўз ҳаётини фидо қилган мард инсонларнинг хотираси яна бир бор эъзозланди, уларнинг оилаларига ҳурмат ва ғамхўрлик намоён этилди.

Тадбирнинг асосий мақсадларидан бири — халқ ва ҳуқуқни муҳофаза қилувчи органлар ўртасида маънавий боғланишни мустаҳкамлаш, жамиятда ҳамжиҳатлик, бағрикенглик ва юрт тақдирига дахлдорлик туйғусини юксалтиришдан иборат. Бу эса маданият ва санъат воситасида амалга оширилаётгани билан аҳамиятлидир.

Таъкидлаш жоизки, санъат ва маданият ёш авлодни ватанпарварлик руҳида тарбиялашда, миллий қадриятларга ҳурмат руҳини шакллантиришда беқиёс тарбиявий аҳамият касб этади. Ансамбль фаолияти айнан шу мақсадларга қаратилган бўлиб, жамоа ҳар йили мамлакатимизнинг турли ҳудудларига гастроль сафарларини уюштириб, кенг жамоатчиликни ижодий намуналари билан хурсанд этиб келмоқда.

Айниқса, олис ва чекка ҳудудларда ўтказилаётган концерт дастурлари аҳоли учун том маънода маънавий байрамга айланмоқда. Бадиий сўз усталари ва маҳоратли хонандаларнинг чиқишлари халқимиз қалбига Ватанга муҳаббат ва садоқат туйғусини сингдириши билан алоҳида аҳамият касб этади.

Мазкур хайрия концертлари санъат орқали жамиятда юксак маънавий муҳитни шакллантириш, одамлар ўртасида дўстлик ва биродарлик ришталарини мустаҳкамлашга хизмат қилмоқда. Шу билан бирга, маданият ва санъатни оммалаштириш ва жамиятнинг турли қатламлари ўртасида ҳамжиҳатлик муҳитини янада кучайтиришга ёрдам бермоқда.

Ашула ва рақс ансамбли томонидан бундай концертлар мамлакатимизнинг бошқа шаҳар ва қишлоқларида ҳам давом эттириляпти. Бу эса ички ишлар органлари фаолиятининг инсонпарварлик ва маънавиятни юксалтириш борасидаги муҳим жиҳатларини яққол намоён этмоқда.

У.Ўрозалиев, туман ИИБ бошлиғининг ўринбосари, подполковник.