IChKI KOʻChALARNING TUPROQ YOʻLLARIGA QUM-ShAGʻAL ARALAShMASI YoTQIZILMOQDA

Oʻzbekiston Respublikasi Vazirlar Mahkamasining “Qoraqalpogʻiston Respublikasi hududlarini ijtimoiy-iqtisodiy rivojlantirish, qulay biznes muhitini yaratish, innovatsion texnologiyalarni joriy etish va infratuzilmalar bilan taʼminlanganlik darajasini yanada yaxshilash orqali aholi farovonligini oshirishning qoʻshimcha chora-tadbirlari toʻgʻrisida”gi Qarori respublika hududida aholi farovonligini oshirish, ularga munosib turmush va mehnat sharoitini yaratishga muhim poydevori boʻlib xizmat qilmoqda.

Qarorda respublikada mavjud imkoniyatlardan samarali foydalanish, tadbirkorlikni qoʻllab-quvvatlash, aholi bandligini taʼminlash, ularning daromadlarini oshirish chora-tadbirlari belgilab berilgan. Shuningdek, yer va suv resurslaridan samarali foydalanish orqali qishloq xoʻjaligi mahsulotlari yetishtirishni koʻpaytirish, hududning investitsiya va ishbilarmonlik muhitini yaxshilash, yoshlarning ilgʻor tashabbuslarini qoʻllab-quvvatlash, taʼlim sohasiga qoʻshimcha imkoniyatlar va inson kapitali rivojini yangi bosqichga koʻtarishga shart-sharoit yaratish boʻyicha qator vazifalar belgilangan.

Qarorga muvofiq Qoraqalpogʻiston Respublikasining tuman va shaharlari obodonlashtirish boshqarmalari tarkibida tuman va shahar hokimliklariga qarashli Ichki yoʻllarni taʼmirlash uchastkalarini tashkil etish, ular tomonidan tuproq yoʻllarni bosqichma-bosqich qum-shagʻalli yoʻllarga oʻtkazish ham asosiy vazifalardan qilib qoʻyilgan.

Qaror ijrosini taʼminlash borasida oʻtgan davr ichida amalga oshirilgan saʼy-harakatlar tumanimiz aholisiga munosib turmush sharoitlari yaratilishiga zamin boʻldi desak, adashmagan boʻlamiz.

Qarorning birgina bandi, yaʼni – tuman va shaharlar tasarrufidagi ichki tuproq yoʻllarni qum-shagʻal yoʻllarga aylantirish ishlariga joriy yilning oʻzida 42 mlrd. 348 million soʻm pul ajratildi va 24 kilometr tuproqli ichki yoʻllar taʼmirlanishi rejalashtirilgan.

Shu kungacha Mangʻit shahrining Oybek mahallasidagi 11 ta – Oʻrikzor, Uchqun, Bodomzor, Umid, Gʻafur Gʻulom, Qoraqalpogʻiston, Oybek, Hamkorlik, Naqshinkor, Bunyodkor-2 koʻchalariga hamda Oʻrta koʻchaning 4,59 kilometr qismiga qum-shagʻal yotqizildi. Doʻstlik mahallasining Nizomiy, Doʻstlik-1, Doʻstlik-2 koʻchalarining 1 kilometr qismiga, Farovon mahallasining ichki yoʻllarining 3,48 kilometr qismiga qum-shagʻal yotqizish koʻzda tutilgan.

Shuningdek, Boʻston mahallasining Gulzor-1, Gulzor-2 koʻchalari, Zafarshon, Uzumzor, Uzumzor-1, Qoʻshchigʻir-1 koʻchalarining ichki yoʻllariga qum-shagʻal yotqizildi. Oq oltin, Fidokor, Yoshlik, Sh.Rashidov, Boʻston, Binokor, Nurafshon-2 koʻchalarida esa ishlar davom ettiriladi. Gulzor mahallasining Avaz Oʻtar koʻchalari, Yangiobod mahallasining Abdulla Avloniy 1-, 3-, 5-koʻchalarini ham taʼmirlash koʻzda tutilgan. Durunki mahallasi boʻyicha esa 5,2 kilometr ichki tuproq yoʻllarga qum-shagʻal yotqizilib, tartibga keltirildi.

Yoʻllar obodligi – el quvonchi. Axir qay manzilga otlansak ham yoʻllardan boramiz. Tekis, ravon qulay yoʻllar esa uzogʻimizni yaqin qiladi.

Hukumatimizning “Qoraqalpogʻiston Respublikasi hududlarini ijtimoiy-iqtisodiy rivojlantirish, qulay biznes muhitini yaratish, innovatsion texnologiyalarni joriy etish va infratuzilmalar bilan taʼminlanganlik darajasini yanada yaxshilash orqali aholi farovonligini oshirishning qoʻshimcha chora-tadbirlari toʻgʻrisida”gi Qaroriga muvofiq respublikamizda, tumanimizda amalga oshirilayotgan saʼy-harakatlar koʻlamli juda keng. Bu kabi xayrli ishlar zamirida aholiga qulayliklar yaratish, xalqimiz turmush farovonligini yanada yaxshilashdek ezgu maqsadlar mujassam.

Oygul RAJABOVA.