Шукроналик!
Мусаффо осмон, осуда тонглар, болаларнинг шўх-шодон кулгулари, бешикда алланинг овозидан ором олиб ухлаётган гўдаклар. – Яратганнинг бизга инъом этган энг буюк неъмати шу эмасми? Йилнинг 4 фасли тенг келувчи жаннатмакон юртимизда айни ёз чилласи. Тиниб-тинчимас амударёликлар куннинг ҳароратини писанд қилмай ўз юмушлари билан банд. Кимлардир кўчасини ободонлаштираётган, кимдир томорқасидан биринчи ҳосилни олиб, иккинчисини экишга киришган, кимлардир бозор расталарида ўз боғида етиштирилган ноз-неъматларни сотиб, даромад топмоқда. Болалар эса ёзги таътилдан завқ олиб, сув тўла ариқларда чўмилишмоқда.
Бугун ишдан қайтаётганимда ушбу манзараларнинг гувоҳи бўлар эканман, беихтиёр ҳаёлимга “шукроналик” деган сўз келди. Ер юзида бизнинг юртдаги каби тинчлик, фаровонлик, тўкинчиликда яшашни истаётган инсонлар камми? Аммо баъзи юртдошларимиз борки, шукр қилиш ўрнига фақат нолийдилар. Инсон қўлидаги неъматларга шукур қилcа, неъматлари янада зиёда бўлади. Аксинча, нолиш, инкор қилиш билан эса қўлидаги шу неъмат ҳам йўққа чиқади, дейишади. Бу билан борига шукр қилиб, йўғига кўниб яшайвериш керак, демоқчи эмасман. “Олма пиш, оғзимга туш” деган билан иш битмайди. “Ҳаракатда – баракат”, дейди доно халқимиз. Лекин минг афсуски, давлат идораларига арз қилиб борувчи фуқароларимизнинг кўпчилиги бола нафақасининг вақтида пластик карталарига тушмаётгани, маҳалласида бир соат чироқ ўчиб қолгани, соғлигида муаммолар борлиги, уйи давлат томонидан таъмирлаб берилмаганидан нолишиб, мурожаат қиладилар. Мана шундай ҳолатларни кўрганимда, “Эй инсон, 32 мучанг соғ-саломат-ку, бошқалар сингари ҳалол ишлаб, меҳнат қил. Давлатга боқиманда бўлиб яшашдан не наф? Қачонганча шу алфозда давом этмоқчисан?” деб айтгим келади. Ахир ҳаммаси инсоннинг ўз қўлида-ку!
Дунёга таниқли миллиардерлар Alibaba Group асосчиси Jack Ma, иккита қўли ва ривожланмай қолган оёқлари билан машҳурликка эришган Ник Вуйчичлар ҳам оддий оила фарзандлари бўлган. Бугунги ҳавас қилгулик ҳаётларига етиб келгунларича улар қанча меҳнат ва машаққатларни босиб ўтмаган деб ўйлайсиз? Амударёда ҳам мана шундай жасорат тимсоллари кўплаб топилади.
Аммо беш бармоқ баробар бўлмаганидек, юқоридаги каби арзимаган сабаблар учун олтиндан қиммат вақтини фақатгина нолиш, норозилик кайфиятида ўтказиб юборувчи юртдошлармиз ҳам афсуски, топилади. Шу хил тоифадаги ҳамюртларимизга юзланмоқчиман:
– Ҳаёт, тинчлик деб аталмиш бебаҳо неъматларнинг қадрига етинг. Бу дунёга келганимизнинг ўзи катта бахт. Фикр-у хаёлингизни гўзалликлар безасин. Меҳнат қилиб, роҳат топинг. Энг ширин нон ўз қўлингиз билан топган нонингиздир.
Фотима Эшимбетова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
