МАНҒИТНИНГ ЧЕМПИОН ЎҒЛОНИ

Ҳаётда улкан ютуқларни қўлга киритган ёшлар ҳақида эшитганимизда, албатта, ҳаммамиз ҳавас қиламиз-у, бу натижалар замирида уларнинг қанчадан-қанча машаққатли меҳнатлари борлигини ўйламаймиз. Ҳа, ҳаётда инсон ўз тенгқурларидан илгарилаб кетиши учун ўз олдига аниқ мақсад қўйиб, шу йўлда интилмоғи, сабр-бардош билан меҳнат қилмоғи лозим.

Буни яқиндагина Миллий паралимпия қўмитаси, Спортни ривожлантириш вазирлиги ва Ёшлар ишлари агентлиги ҳамкорлигида ўтказилган “Беш ташаббус паралимпиядаси”нинг республика босқичида фаол иштирок этиб, махсус совға, сертификат билан тақдирланиб келган Ҳасанбой Ҳайитбоев ҳаёти мисолида ҳам кўришимиз мумкин.

Дурунки маҳалласида яшовчи, 2001 йилда туғилган Ҳасанбой Ҳайитбоев оилада тўртинчи фарзанд, кенжатой. У 56-сонли мактабда аъло баҳоларга ўқиши жараёнида туман Спорт мактабининг Чордара маҳалласида жойлашган базасидаги стол тенниси гуруҳи машғулотларига қатнади. Бу ерда унга тренер Ҳамида Ражабова ушбу спорт турининг ўйин қоидалари, техникасини эринмай ўргатди. Стол тенниси бўйича илк натижаларга эришганида Ҳасанбой ҳали мактаб бошланғич синф ўқувчиси эди. У турли байрамлар муносабати билан, спорт мактаблариаро ўтказилган мусобақаларда соғлом тенгдошлари билан даврага чиқиб, ўзининг чаққонлигини, кучлилигини намойиш этиб, олган дипломлари, совғалари талайгина.

Ҳасанбойнинг асосий мақсади ахборот технологиялари соҳасида олий маълумот олиш, малакали мутахассис бўлиб етишиш эди. Шу боис, бир неча йил спорт машғулотларига ҳам қатнамай, олийгоҳга киришга тайёргарлик кўрди. Бироқ талаба бўлиш насиб этмади. Бу билан Ҳасанбой келажаги учун режалаган орзуларидан чекинмади, теннис машғулотларига қайтди ва сабр-чидам билан шуғулланишни давом эттирди. Интилишлари эса  бесамар кетмади. Натижада “Беш ташаббус паралимпиадаси”нинг қуйи босқичларида ғолибликни қўлга киритиб, Республика босқичида куч синашишга муваффақ бўлди.

Мусобақанинг 1 июль куни Нукус шаҳрида бўлиб ўтган Қорақалпоғистон Республикаси босқичида 16-30 ёш оралиғидаги 17 нафар ногиронлиги бўлган ёшлар ўзаро куч синашдилар. Ғолиблик туманимиз вакили Ҳасанбой Ҳайитбоевга насиб қилди. Бу натижага у осонлик билан эришгани йўқ.

– Шу куни мураббийим Ҳамида опанинг машғулотлар жараёнида ўргатган теннис спорти техникаси, усулларининг беллашувга чиққандаги аҳамияти нечоғлик улкан эканлигини чуқур англадим. Устозимга ҳурматим ошди. Ўзбекистон босқичида кучли ҳаяжон панд бериб қўйди. Насиб қилса, кейинги йил, албатта, Ўзбекистон чемпиони бўламан, – дейди Ҳасанбой ўзига ишонч билан.

У айни кунларда теннис бўйича машғулотларга қатнашиш билан бирга, олийгоҳга ўқишга киришга ҳам қизғин тайёргарлик кўраяпти. Имкониятим чекланган, деб қўл қовуштириб ўтиришни ўзига эп кўрмай, икки йилча олдин этик-дўзга шогирд тушди ва бу ҳунарни бинойидай ўрганиб олди ва ишлаб, даромад ҳам топаяпти.

Ҳасанбой Ҳайитбоев билан суҳбатлашган киши беихтиёр ана шундай иродали, кўнгли тоза, машаққатлардан чўчимайдиган, иқтидорли фарзандни тарбиялаб вояга етказган ота-онасига таҳсин айтгиси келади.

Биз чин кўнгилдан Ҳасанбойга “орзуларинг ушалаверсин”, дея тиладик.              

Ойгул РАЖАБОВА.