MANGʻITNING ChEMPION OʻGʻLONI

Hayotda ulkan yutuqlarni qoʻlga kiritgan yoshlar haqida eshitganimizda, albatta, hammamiz havas qilamiz-u, bu natijalar zamirida ularning qanchadan-qancha mashaqqatli mehnatlari borligini oʻylamaymiz. Ha, hayotda inson oʻz tengqurlaridan ilgarilab ketishi uchun oʻz oldiga aniq maqsad qoʻyib, shu yoʻlda intilmogʻi, sabr-bardosh bilan mehnat qilmogʻi lozim.

Buni yaqindagina Milliy paralimpiya qoʻmitasi, Sportni rivojlantirish vazirligi va Yoshlar ishlari agentligi hamkorligida oʻtkazilgan “Besh tashabbus paralimpiyadasi”ning respublika bosqichida faol ishtirok etib, maxsus sovgʻa, sertifikat bilan taqdirlanib kelgan Hasanboy Hayitboyev hayoti misolida ham koʻrishimiz mumkin.

Durunki mahallasida yashovchi, 2001-yilda tugʻilgan Hasanboy Hayitboyev oilada toʻrtinchi farzand, kenjatoy. U 56-sonli maktabda aʼlo baholarga oʻqishi jarayonida tuman Sport maktabining Chordara mahallasida joylashgan bazasidagi stol tennisi guruhi mashgʻulotlariga qatnadi. Bu yerda unga trener Hamida Rajabova ushbu sport turining oʻyin qoidalari, texnikasini erinmay oʻrgatdi. Stol tennisi boʻyicha ilk natijalarga erishganida Hasanboy hali maktab boshlangʻich sinf oʻquvchisi edi. U turli bayramlar munosabati bilan, sport maktablariaro oʻtkazilgan musobaqalarda sogʻlom tengdoshlari bilan davraga chiqib, oʻzining chaqqonligini, kuchliligini namoyish etib, olgan diplomlari, sovgʻalari talaygina.

Hasanboyning asosiy maqsadi axborot texnologiyalari sohasida oliy maʼlumot olish, malakali mutaxassis boʻlib yetishish edi. Shu bois, bir necha yil sport mashgʻulotlariga ham qatnamay, oliygohga kirishga tayyorgarlik koʻrdi. Biroq talaba boʻlish nasib etmadi. Bu bilan Hasanboy kelajagi uchun rejalagan orzularidan chekinmadi, tennis mashgʻulotlariga qaytdi va sabr-chidam bilan shugʻullanishni davom ettirdi. Intilishlari esa  besamar ketmadi. Natijada “Besh tashabbus paralimpiadasi”ning quyi bosqichlarida gʻoliblikni qoʻlga kiritib, Respublika bosqichida kuch sinashishga muvaffaq boʻldi.

Musobaqaning 1-iyul kuni Nukus shahrida boʻlib oʻtgan Qoraqalpogʻiston Respublikasi bosqichida 16-30 yosh oraligʻidagi 17 nafar nogironligi boʻlgan yoshlar oʻzaro kuch sinashdilar. Gʻoliblik tumanimiz vakili Hasanboy Hayitboyevga nasib qildi. Bu natijaga u osonlik bilan erishgani yoʻq.

– Shu kuni murabbiyim Hamida opaning mashgʻulotlar jarayonida oʻrgatgan tennis sporti texnikasi, usullarining bellashuvga chiqqandagi ahamiyati nechogʻlik ulkan ekanligini chuqur angladim. Ustozimga hurmatim oshdi. Oʻzbekiston bosqichida kuchli hayajon pand berib qoʻydi. Nasib qilsa, keyingi yil, albatta, Oʻzbekiston chempioni boʻlaman, – deydi Hasanboy oʻziga ishonch bilan.

U ayni kunlarda tennis boʻyicha mashgʻulotlarga qatnashish bilan birga, oliygohga oʻqishga kirishga ham qizgʻin tayyorgarlik koʻrayapti. Imkoniyatim cheklangan, deb qoʻl qovushtirib oʻtirishni oʻziga ep koʻrmay, ikki yilcha oldin etik-doʻzga shogird tushdi va bu hunarni binoyiday oʻrganib oldi va ishlab, daromad ham topayapti.

Hasanboy Hayitboyev bilan suhbatlashgan kishi beixtiyor ana shunday irodali, koʻngli toza, mashaqqatlardan choʻchimaydigan, iqtidorli farzandni tarbiyalab voyaga yetkazgan ota-onasiga tahsin aytgisi keladi.

Biz chin koʻngildan Hasanboyga “orzularing ushalaversin”, deya tiladik.              

Oygul RAJABOVA.