Чемпионлар масканига айланган даргоҳ: 12-сонли мактаб мас-рестлингчиларининг ютуқлари
Бугунги кунда юртимизда соғлом турмуш тарзини тарғиб қилиш ва ёшларни оммавий спортга кенг жалб этиш борасида улкан ислоҳотлар амалга оширилмоқда. Ана шундай эзгу саъй-ҳаракатларнинг ёрқин натижасини Амударё туманидаги 12-сонли умумтаълим мактаби мисолида яққол кўришимиз мумкин. Мазкур таълим муассасасида ёшларнинг бўш вақтини мазмунли ташкил этиш мақсадида бир нечта спорт тўгараклари йўлга қўйилган.
Хусусан, 2023 йилда тажрибали ва фидойи мураббий Баҳром Қурбониязов ташаббуси билан кураш ва мас-рестлинг спорт турлари бўйича махсус тўгараклар ташкил этилган эди. Бугунги кунда машғулотларга нафақат мактаб ўқувчилари, балки ён-атрофдаги бошқа таълим муассасаларидан ҳам спортга меҳр қўйган ёшлар катта иштиёқ билан қатнашиб келмоқда.
Мураббий Баҳром Қурбониязов қўл остида шуғулланаётган спортчилар қисқа вақт ичида кўплаб йирик мусобақаларда муносиб иштирок этиб, юқори натижаларни қайд этиб келмоқда. Шу йилнинг 17-19 апрель кунлари Самарқанд шаҳрида 16-18 ёшли ўсмирлар ва ёшлар ўртасида ўтказилган нуфузли мусобақада жами 15 нафар спортчи иштирок этди. Улардан 5 нафари биринчи, яна 5 нафари иккинчи ва 3 нафари учинчи ўринларни эгаллаб, умумжамоа ҳисобида Ўзбекистон бўйича фахрли иккинчи ўринни қўлга киритишди. Мусобақадан қайтган жамоа мактаб раҳбарияти, ўқитувчилар ва ўқувчилар томонидан тантанали тарзда кутиб олинди.
Мас-рестлинг чуқур тарихга эга бўлган ўзига хос яккакураш спорти ҳисобланади. Ўйин шартига кўра, икки спортчи бир-бирига қарама-қарши ҳолатда ўтиради, оёқларини махсус тахтага тираб, ўртадаги таёқни ўз томонига тортишга ҳаракат қилади. Ким рақибини ўз томонига тортиб ўта олса ёки таёқни қўлидан чиқариб юборишга мажбур қилса, ўша иштирокчи ғолиб деб топилади. Бу спорт тури спортчидан тезкор фикрлашни, тўғри тактика танлашни ва кучли руҳий бардошни талаб этади. Қачон бор кучни ишга солиш, қачон сабр қилиб рақибни чарчатиш ва қачон кескин ҳужумга ўтишни билиш — ғалабанинг асосий омилидир. Шу боисдан ҳам, мазкур спорт тури инсонни ҳар томонлама чиниқтиради, ёшларда жасурлик, меҳнатсеварлик ва қатъият руҳини шакллантиради.
Ушбу спорт тури билан шуғулланиб келаётган тўгарак қатнашчиларининг зафарли юришлари 2023 йилги Ўзбекистон чемпионатидан бошланган бўлиб, ўшанда спортчилар муваффақиятли иштирок этиб, навбатдаги халқаро турнирларга йўлланмани қўлга киритишган эди. 2024 йилнинг май ойида Нукус шаҳрида бўлиб ўтган мас-рестлинг бўйича Осиё чемпионатида эса 10 нафар ўқувчи қатнашди ва уларнинг 1 нафари олтин, 2 нафари кумуш ҳамда яна 2 нафари бронза медалларига сазовор бўлди. 2025 йилда ўтказилган Ўзбекистон чемпионатида 12 нафар спортчи қатнашди ва Қирғизистон Республикасида бўлиб ўтган Осиё чемпионатига йўлланмани қўлга киритди. Қитъа биринчилигида ҳам амударёлик ёшлар иккита кумуш ва учта бронза медалини қўлга киритиб, юртимиз байроғини баланд кўтардилар.
Бундай юқори натижаларга эришишда 12-сонли мактаб раҳбариятининг спорт тўгараклари фаолиятини доимий равишда қўллаб-қувватлаб келаётгани, машғулотлар учун зарур барча шарт-шароитларни яратиб бераётгани муҳим омил бўлмоқда. Шу билан бирга, ота-оналарнинг ҳам фарзандлари танлаган йўлни маъқуллаб, уларнинг бўш вақтларини мазмунли ўтказишига катта ҳисса қўшаётганини алоҳида эътироф этиш ўринлидир. Буларнинг барчасининг негизида эса, шубҳасиз, тренер Баҳром Қурбониязовнинг машаққатли ва самарали меҳнати ётибди. Унинг ўз касбига бўлган садоқати ва ёшлар тарбиясидаги юксак масъулияти муносиб баҳоланиб, 2025 йил якунларига кўра, Ўзбекистон мас-рестлинг федерацияси томонидан "Энг яхши тренер" кўкрак нишони билан тақдирлангани ҳам сўзимизнинг яққол исботидир.
Бугунги кунда тўгаракда жами 52 нафар ўғил-қиз икки сменада мунтазам равишда машғулотларда иштирок этишмоқда. Эндиликда ёш спортчилар олдинда турган навбатдаги катта синов — шу йилнинг май ойида 13-15 ёшли ўқувчилар ўртасида бўлиб ўтадиган Ўзбекистон чемпионатига қизғин тайёргарлик кўрмоқдалар. Ҳамюртларимизга ушбу мусобақаларда ҳам омад ва зафарлар тилаб қоламиз!
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
