Амударёлик пиллакорлар қабул масканига бир кунда 32-32,5 тонна пилла топширишмоқда
Халқимиз пиллачиликни етти хазинанинг бири дейишади. Ҳақиқатдан ҳам пиллачилик соҳаси билан шуғулланган ота-боболаримизнинг рўзғорлари бут, молиявий ҳаётлари тўкис бўлган. Пиллачилик соҳаси ривожланган давлатлар эса пиллани қайта ишлаш орқали олинадиган маҳсулотлари билан жаҳон бозоридан муносиб ўрин эгаллаган.
Мамлакатимизда ҳам пиллачиликка аграр соҳанинг етакчи тармоғи сифатида қаралади ва ҳар йили юқори ҳосил олинади. Амударё тумани эса Ўзбекистон миқёсида энг кўп пилла етиштирувчи туманлардан бири, Қорақалпоғистон Республикасидаги пиллачилик тармоғи жадал ривожланаётган моҳир пиллакорлар юртидир. Туман пиллакорлари ҳар йили давлатга 254 тоннадан зиёд юқори сифатли саноат хом ашёси етказиб беришиб, зиммаларидаги шартномавий режа ва мажбуриятларини ортиғи билан адо этиб келишмоқда.
Туманда жорий йилги ипак қурти парваришлаш мавсумига ҳам пухта ҳозирлик кўрилди. Аввало пиллачилик тармоғи бор бўлган фермер хўжаликлари тасарруфидаги мавжуд тутзорларга ўз вақтида зарур ишловлар берилиб, агротехник тадбирлар сифатли амалга оширилди. Ўтган йилги кўчат экиш мавсумида янгидан бунёд этилган тутзорлар, шунингдек, аввалдан мавжуд бўлган, ички йўллар, ариқлар бўйлари ҳамда далалар четларидаги тут дарахтлари эрта баҳорда яхшилаб озиқлантирилди. Натижада мўл озуқа базаси яратилди. Буэса пиллакорлр учун барг етишмовчилиги билан боғлиқ муаммони бартараф этиш имконини берди ва амударёлик пиллакорлар мавсумни муваффақиятли бошладилар.
Мавсум бошида “Jayxun silk” МЧЖ томонидан 2024 йил пилла ҳосили учун касаначилар билан тўғридан-тўғри шартномалар тузилди. Унга кўра, тумандаги пиллачилик йўналиши бор бўлган фермер хўжаликларининг касаначи пиллакорларига 4 минг 605 қути сифатли жонлантирилган ипак қурти уруғи тарқатилди ва касаначилар билан “Jayxun silk” МЧЖ ўртасида 296 тонна пилла ҳосили етиштириш бўйича шартнома тузилди.
Ипак қурти боқиш мавсумини муваффақиятли ўтказиш мақсадида ҳудудларга бириктирилган мутахассислар томонидан қуртхоналарнинг санитария ҳолати доимий назорат қилиб борилди ва зарур ҳолатларда касаначи пиллакорларга маслаҳатлар берилди. Ўз вақтида кўрилган чора-тадбирлар, қолаверса, касаначиларнинг тун-у кун фидойилик билан қилган меҳнатлари туфайли қуртхоналарда мўл пилла ҳосили етиштирилди.
Айни кунларда “Jayxun silk” МЧЖ корхонасининг қабул масканларида пиллани қабул қилиш ва дастлабки ишлов бериш ишлари агротехник талаблар асосида бошлаб юборилди. Жорий йилги пилла топшириш мавсумида Чойкўл овули ҳудудидаги фермер хўжаликларининг касаначи пиллакорлари карвонбошилик қилишмоқда. Мазкур ҳудуд пиллакорлари 399 қути ипак қурти уруғидан 25 минг 647 килограммлик пилла хирмони бунёд этишга аҳд қилишган. Айни пайтда ҳудуд пиллакорлари кунига йиллик режанинг 10-11 фоизи миқдорида, 3 тоннадан зиёд ҳосил топширишмоқда.
Шунингдек, Тўлқин, Қангли, Қипчоқ, Оқ олтин овуллари ҳудудларидаги касаначи пиллакорларнинг ҳам шижоатлари баланд. Улар ҳам кунига 1,5- 2тоннадан зиёд ҳосил топшириб, кун сайин маррага яқинлашмоқдалар.
Бугунги кунда пиллани қабул қилиш масканларида иш қизғин паллага кирган. Йиллик режанинг кунига 10-11 фоизи миқдорида, бир кунда 32-32,5 тонна пилла топширишга эришаётган амударёлик пиллакорлар жорий йилнинг 4 июнь санасига қадар салкам 94 тонналик пилла хирмонини бунёд этдилар. Шартномавий режани бажариш сари дадил қадам ташлаётган пиллакорлар яна бир неча кундан кейин кўзланган маррани забт этишларига асло шубҳа йўқ.
Робия Йўлдошева
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
