Amudaryolik pillakorlar qabul maskaniga bir kunda 32-32,5 tonna pilla topshirishmoqda

Xalqimiz pillachilikni yetti xazinaning biri deyishadi. Haqiqatdan ham pillachilik sohasi bilan shugʻullangan ota-bobolarimizning roʻzgʻorlari but, moliyaviy hayotlari toʻkis boʻlgan. Pillachilik sohasi rivojlangan davlatlar esa pillani qayta ishlash orqali olinadigan mahsulotlari bilan jahon bozoridan munosib oʻrin egallagan.

Mamlakatimizda ham pillachilikka agrar sohaning yetakchi tarmogʻi sifatida qaraladi va har yili yuqori hosil olinadi. Amudaryo tumani esa Oʻzbekiston miqyosida eng koʻp pilla yetishtiruvchi tumanlardan biri, Qoraqalpogʻiston Respublikasidagi pillachilik tarmogʻi jadal rivojlanayotgan mohir pillakorlar yurtidir. Tuman pillakorlari har yili davlatga 254 tonnadan ziyod yuqori sifatli sanoat xom ashyosi yetkazib berishib, zimmalaridagi shartnomaviy reja va majburiyatlarini ortigʻi bilan ado etib kelishmoqda.

Tumanda joriy yilgi ipak qurti parvarishlash mavsumiga ham puxta hozirlik koʻrildi. Avvalo pillachilik tarmogʻi bor boʻlgan fermer xoʻjaliklari tasarrufidagi mavjud tutzorlarga oʻz vaqtida zarur ishlovlar berilib, agrotexnik tadbirlar sifatli amalga oshirildi. Oʻtgan yilgi koʻchat ekish mavsumida yangidan bunyod etilgan tutzorlar, shuningdek, avvaldan mavjud boʻlgan, ichki yoʻllar, ariqlar boʻylari hamda dalalar chetlaridagi tut daraxtlari erta bahorda yaxshilab oziqlantirildi. Natijada moʻl ozuqa bazasi yaratildi. Buesa pillakorlr uchun barg yetishmovchiligi bilan bogʻliq muammoni bartaraf etish imkonini berdi va amudaryolik pillakorlar mavsumni muvaffaqiyatli boshladilar.

Mavsum boshida “Jayxun silk” MChJ tomonidan 2024-yil pilla hosili uchun kasanachilar bilan toʻgʻridan-toʻgʻri shartnomalar tuzildi. Unga koʻra, tumandagi pillachilik yoʻnalishi bor boʻlgan fermer xoʻjaliklarining kasanachi pillakorlariga 4 ming 605 quti sifatli jonlantirilgan ipak qurti urugʻi tarqatildi va kasanachilar bilan “Jayxun silk” MChJ oʻrtasida 296 tonna pilla hosili yetishtirish boʻyicha shartnoma tuzildi.

Ipak qurti boqish mavsumini muvaffaqiyatli oʻtkazish maqsadida hududlarga biriktirilgan mutaxassislar tomonidan qurtxonalarning sanitariya holati doimiy nazorat qilib borildi va zarur holatlarda kasanachi pillakorlarga maslahatlar berildi. Oʻz vaqtida koʻrilgan chora-tadbirlar, qolaversa, kasanachilarning tun-u kun fidoyilik bilan qilgan mehnatlari tufayli qurtxonalarda moʻl pilla hosili yetishtirildi.

Ayni kunlarda “Jayxun silk” MChJ korxonasining qabul maskanlarida pillani qabul qilish va dastlabki ishlov berish ishlari agrotexnik talablar asosida boshlab yuborildi. Joriy yilgi pilla topshirish mavsumida Choykoʻl ovuli hududidagi fermer xoʻjaliklarining kasanachi pillakorlari karvonboshilik qilishmoqda. Mazkur hudud pillakorlari 399 quti ipak qurti urugʻidan 25 ming 647 kilogrammlik pilla xirmoni bunyod etishga ahd qilishgan. Ayni paytda hudud pillakorlari kuniga yillik rejaning 10-11 foizi miqdorida, 3 tonnadan ziyod hosil topshirishmoqda.

Shuningdek, Toʻlqin, Qangli, Qipchoq, Oq oltin ovullari hududlaridagi kasanachi pillakorlarning ham shijoatlari baland. Ular ham kuniga 1,5- 2tonnadan ziyod hosil topshirib, kun sayin marraga yaqinlashmoqdalar.               

Bugungi kunda pillani qabul qilish maskanlarida ish qizgʻin pallaga kirgan. Yillik rejaning kuniga 10-11 foizi miqdorida, bir kunda 32-32,5 tonna pilla topshirishga erishayotgan amudaryolik pillakorlar joriy yilning 4-iyun sanasiga qadar salkam 94 tonnalik pilla xirmonini bunyod etdilar. Shartnomaviy rejani bajarish sari dadil qadam tashlayotgan pillakorlar yana bir necha kundan keyin koʻzlangan marrani zabt etishlariga aslo shubha yoʻq.

Robiya Yoʻldosheva