“ВАТАН ТАЯНЧИ” ОТРЯДИ АЪЗОЛАРИГА КЎКРАК НИШОНИ ТОПШИРИЛДИ

Амударё туманидаги умумтаълим мактабларида ташкил этилган “Ватан таянчи” отрядлари аъзоларининг тантанали равишда ваъда бериш ва уларга кўкрак нишони топширишга бағишланган маросим ўтказилди.

20 октябрь куни туман Маданият бўлими концертлар залида бўлиб ўтган тадбирда Шимоли-ғарбий ҳарбий округ масъуллари, туман Мудофаа бўлими бошлиғи, подполковник Шерзод Муродов, бўлим бошлиғининг тарбиявий ва мафкуравий ишлари бўйича ўринбосари Зокир Саъдуллаев, туман Маънавият ва маърифат маркази бошлиғи Ислом Маткаримов, Давлат хавфсизлик хизматига қарашли ҳарбий қисм хизматчиси Шерзод Атаев, давлат ва жамоат ташкилотлари вакиллари қатнашишди. Шунингдек, маросимда умумтаълим мактабларининг Чақирувга қадар бошланғич тайёргарлик бўйича раҳбарлари ҳамда 200 нафарга яқин 10-11-синф ўқувчилари – “Ватан таянчи” отряди аъзолари иштирок этишди.

Тадбирда сўзга чиққанлар ушбу шарафли нишонга сазовор бўлган ёшларни қутлаб, келгуси фаолиятида муваффақиятлар тилади. Шунингдек, “Ватан таянчи” ҳаракатининг асосий вазифаси ҳамда мақсади тушунтирилиб, ўсиб келаётган ёш авлодни Ватан тақдирига дахлдорлик, маънавий-ахлоқий, миллий ва умуминсоний қадриятлар ҳамда қонунларимизга нисбатан юксак ҳурмат руҳида тарбиялаш кераклиги таъкидланди.

Маълумки, 2022 йил 2 мартда Президентимизнинг «Ватан таянчи» болалар ва ўсмирлар ҳарбий-ватанпарварлик ҳаракати фаолиятини ташкил этиш тўғрисида»ги қарори қабул қилинган эди. Ушбу Қарори асосида бугунги кунда тумандаги барча умумтаълим мактабларида “Ватан таянчи” болалар ва ўсмирлар ҳарбий-ватанпарварлик ҳаракати гуруҳлари фаолияти йўлга қўйилган. Бу ўз навбатида, юртимизда олиб борилаётган ёшларга оид давлат сиёсатининг мутлақо янгича йўналиши бўлиб, ёшларни ватанпарварлик руҳида тарбиялашнинг ўзига хос шакли ҳисобланади.

Қарорда давлат умумтаълим мактабларида таҳсил олаётган 10-11-синф ўқувчилари орасидан ватанпарвар, энг интизомли ва билимли, ташаббускор бўлган 20 нафар ёшни саралаб олиш орқали «Ватан таянчи» отрядларини ташкил этиш белгиланган. Шунингдек, Қарорда ҳаракат фаолиятини қўллаб-қувватлаш бўйича тегишли идора ва ташкилотларга вазифалар, отряд аъзоларининг олий ҳарбий таълим муассасаларига ўқишга киришлари учун имтиёзлар ҳам назарда тутилган. Ҳаракат аъзолигига қабул қилинган фаол ўқувчилар олий ҳарбий таълим муассасасига кириш учун имтиёзли тавсиянома ҳамда тест синовлари натижаларига кўра тўплаган балларининг 5 фоизи миқдорида қўшимча баллни қўлга киритади.

Таъкидлаб ўтилганидек, ёш авлодни Ватан тақдирига дахлдорлик, маънавий-ахлоқий, миллий ва умуминсоний қадриятлар руҳида тарбиялаш, эркин фикрлайдиган, мустаҳкам билимли, мустақил қарор қабул қила оладиган, мамлакат ва ўз оиласи фаравонлигини янада ривожлантириш орзусида бўлган ёшларни вояга етказиш “Ватан таянчи” – болалар ва ўсмирлар ҳарбий-ватанпарварлик ҳаракатининг асосий вазифаларидан саналади. Шунингдек, ўқувчи ёшлар орасида ҳарбий-ватанпарварлик руҳини уйғотиш, ўқувчиларни одоб-ахлоқ, ватанга садоқат, ўзига ишонч руҳида тарбиялаш, умумтаълим мактаб ўқувчиларнинг бўш вақтларини мазмунли ўтказиш учун қулай шароит яратиш, ўқувчиларни турли хавфли ғоялар ва “оммавий маданият” ниқоби остида кириб келаётган салбий таъсирлардан ҳимоя қилиш ҳам асосий вазифалардан ҳисобланади.

Тадбирда туман Маданият бўлимининг ҳаваскорлари томонидан тайёрланган мусиқий дастур намойиш қилиниб, томошабинларга янада кўтаринки кайфият бахш этилди.

З.Саъдуллаев, туман Мудофаа ишлари бўлими бошлиғининг тарбиявий ва мафкуравий ишлар бўйича ўринбосари.