НОТАРИАЛ ҲАРАКАТЛАР БЕЛГИЛАНГАН ТАРТИБДА РАД ЭТИЛИШИ МУМКИН
Нотариал ҳаракатлар Ўзбекистон Республикасининг “Нотариат тўғрисида”ги Қонунига кўра амалга оширилади. Ушбу Қонуннинг 38-моддасида нотариал ҳаракатни амалга оширишни рад этиш тартиби кўрсатилган. Белгилаб қўйилганидек, бундай ҳаракатни амалга ошириш қонунга зид бўлса, бу ҳаракат бошқа нотариус томонидан амалга оширилиши керак бўлганида, муомалага лаёқатсиз фуқаро ёхуд зарур ваколатлари бўлмаган вакил нотариал ҳаракатни амалга оширишни сўраб мурожаат қилганида, юридик шахс номидан амалга ошириладиган битим унинг уставида ёки Низомида кўрсатилган мақсадларга зид бўлса, битим қонун талабларига ёки нотариал ҳаракатни амалга ошириш учун тақдим этилаётган ҳужжатлар қонунчилик талабларига мувофиқ бўлмаса рад этилади.
Нотариал ҳаракатни амалга ошириш рад этилган тақдирда нотариал ҳаракатни амалга оширишни рад этиш ҳақида нотариусга мурожаат қилинган кундан бошлаб, уч кундан кечиктирмасдан қарор чиқаради. Нотариус нотариал ҳаракатни амалга ошириш тўғрисидаги мурожаати рад этилган шахснинг илтимосига биноан рад этиш сабабини ёзма равишда баён этиши ва рад этиш устидан шикоят қилиш тартибини тушунтириб бериши лозим.
“Нотариат тўғрисида”ги Қонунга асосан айрим нотариал ҳаракатлар, масалан, мерос қолдирувчининг кредиторларидан даъволарни қабул қилиш, мерос мол-мулкни қўриқлаш, меросга бўлган ҳуқуқ тўғрисида гувоҳнома бериш тартиби, марҳум эрдан (хотиндан) кейин хотиннинг (эрнинг) аризасига кўра, умумий мол-мулкдаги улушга бўлган мулк ҳуқуқи тўғрисида гувоҳнома бериш нотариал ҳаракатлар марҳум охирги доимий яшаш манзили бўйича рўйхатга олинган ҳудуддаги нотариал идора томонидан, пул суммалари ва қимматли қоғозларни депозитга қабул қилиш депозитга пулни топширувчи шахс, чекни тўловга тақдим этиш ва чекнинг тўланмаганлигини тасдиқлаш чекни тўловга тақдим қилувчи шахс доимий яшаш манзилидаги ҳудуддаги нотариал идора томонидан амалга оширилади.
“Нотариат тўғрисида”ги Қонуннинг 38-моддасига асосан амалга оширилган нотариал ҳаракатни, нотариал ҳаракатни кечиктириш ёки нотариал ҳаракатни амалга оширишни рад этиш тўғрисидаги қарорни нотўғри деб ҳисоблаган манфаатдор шахс бу хусусда нотариал идора турган жойдаги судга шикоят қилишга ҳақлидир.
Р.Ниязимбетов,
хусусий амалиёт билан шуғулланувчи нотариус.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
