Бир йилда 5 мингдан ортиқ нотариал ҳаракат амалга оширилди
Мамлакатимизда фуқаролар ва тадбиркорлик субъектларининг ҳуқуқ ва қонуний манфаатларини ҳимоя қилишда нотариат институтларининг нуфузи тобора ортиб бормоқда. Чунки ҳар қандай шаклдаги мулк дахлсизлигини таъминлаш борасидаги барча жараёнлар нотариат институтининг иштирокида амалга оширилади.
Ўзбекистон Республикаси Президентининг 2025 йил 9 сентябрдаги “Нотариат институтини янада ривожлантириш ҳамда соҳага замонавий ахборот-коммуникация технологияларини кенг жорий этишга оид қўшимча чора-тадбирлар тўғрисида”ги Қарори соҳа мутахассислари фаолиятида бюрократик тўсиқларга барҳам бериб, шаффофликни таъминлаш ва мустақил равишда фаолият олиб бориш имконини яратди.
Амударё туманида хусусий амалиёт билан шуғулланувчи нотариус Бекимбетова Бибизуҳра Адилхановна иш бошлаганига энди бир йил бўлди. Ўтган қисқа вақт ичида нотариус фуқаролар, айниқса, тадбиркорлар ишончини қозониб улгурди. Ўз ишининг билимдони, қолаверса, муомала маданиятининг юқорилиги боис, унинг фуқаролар ва тадбиркорлар томонидан қилинаётган турли мазмундаги мурожаатларни юқори аниқлик ва шаффофлик асосида синчиклаб ўрганиш орқали қонуний асосда кўриб чиқилмоқда.
Ўтган бир йилдан зиёд вақт ичида хусусий амалиёт билан шуғулланувчи нотариус Бибизуҳра Бекимбетованинг саъй-ҳаракатлари билан 5 мингдан ортиқ нотариал ҳаракатлар амалга оширилди. Хусусан, фуқароларнинг мерос ва мулкий муносабатлар билан боғлиқ, машина, уй-жой олди-сотди ишлари, ҳар хил турдаги ишончномалар, васиятнома, гаров ва ипотека шартномаларини тасдиқлаш бўйича қилган мурожаатлари қаноатлантирилди.
Ҳозирги вақтда дунё миқёсида, шу баробарида мамлакатимиз ҳудудида ҳам онлайн нотариал ҳаракат турлари кўпайганлиги сабабли нотариус маълум сабабларга кўра, хориж давлатларида юрган, бетоблиги бўлган, нотариусга кела олмаган фуқароларга онлайн хизмат кўрсатишни йўлга қўйди.
Ўз соҳасининг билимдони, пишиқ ва пухта иш юритувчи мутахассис ҳамиша ишончга, эътиборга сазовор. Бибизуҳра Бекимбетова ҳам ўз касбий фаолияти юзасидан, қолаверса, фуқароларнинг ҳуқуқий саводхонлигини ошириш мақсадида аҳоли ўртасида қонунчиликдаги янгиликлар ва ўзгаришлар, мулкий муносабатларни қонунийлаштириш борасида тарғибот-ташвиқот тадбирлари ташкиллаштириб, аҳоли билан самимий, ошкора мулоқотлар ўтказишга алоҳида эътибор қаратади. Айниқса, Амударё тумани Фуқаролик ҳолатлари ва далолатномаларини ёзиш бўлими ходимлари билан ҳамкорликда ёш келин-куёвлар ҳамда никоҳланувчи шахслар иштирокида ўтказиладиган учрашув ва давра суҳбатлари орқали бир оила бўлиб яшашга аҳд қилган ёшларнинг расмий никоҳ, шу билан бирга никоҳ шартномасининг аҳамияти тўғрисидаги ҳуқуқий билим ва тушунчалари ошишига муносиб ҳисса қўшмоқда.
Яқинда нотариус томонидан Амударё тумани ФҲДЁ бўлими биносида мазкур бўлим ходими Роҳатой Полвонова билан ҳамкорликда ташкил этилган "Расмий никоҳ ва никоҳ шартномаси тузишнинг аҳамияти" мавзусидаги давра суҳбатида ҳам расмий никоҳ орқали оилавий муносабатларни мустаҳкамлаш, шунингдек, эр-хотин ўртасида тузиладиган никоҳ шартномасининг оила мустаҳкамлигини таъминлашдаги аҳамияти хусусида батафсил маълумотлар ҳамда ушбу ҳуқуқий ҳужжатларни нотариал тасдиқлаш юзасидан зарур тушунча ва тавсиялар берилди.
Давра суҳбати жараёнида сўнгги йилларда кенг оммалашиб бораётган никоҳ шартномаси тузишнинг аҳамияти юзасидан тадбир иштирокчилари ўзларини қизиқтирган саволлар билан мурожаат қилдилар ва бу бўйича Бибизуҳра Бекимбетова ҳамда Роҳатой Полвоновалар уларнинг саволларига атрофлича жавоблар, керакли маслаҳат ва тушунчалар бердилар.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
