Bir yilda 5 mingdan ortiq notarial harakat amalga oshirildi

Mamlakatimizda fuqarolar va tadbirkorlik subʼektlarining huquq va qonuniy manfaatlarini himoya qilishda notariat institutlarining nufuzi tobora ortib bormoqda. Chunki har qanday shakldagi mulk daxlsizligini taʼminlash borasidagi barcha jarayonlar notariat institutining ishtirokida amalga oshiriladi.

Oʻzbekiston Respublikasi Prezidentining 2025-yil 9-sentyabrdagi “Notariat institutini yanada rivojlantirish hamda sohaga zamonaviy axborot-kommunikatsiya texnologiyalarini keng joriy etishga oid qoʻshimcha chora-tadbirlar toʻgʻrisida”gi Qarori soha mutaxassislari faoliyatida byurokratik toʻsiqlarga barham berib, shaffoflikni taʼminlash va mustaqil ravishda faoliyat olib borish imkonini yaratdi.

Amudaryo tumanida xususiy amaliyot bilan shugʻullanuvchi notarius Bekimbetova Bibizuhra Adilxanovna ish boshlaganiga endi bir yil boʻldi. Oʻtgan qisqa vaqt ichida notarius fuqarolar, ayniqsa, tadbirkorlar ishonchini qozonib ulgurdi. Oʻz ishining bilimdoni, qolaversa, muomala madaniyatining yuqoriligi bois, uning fuqarolar va tadbirkorlar tomonidan qilinayotgan turli mazmundagi murojaatlarni yuqori aniqlik va shaffoflik asosida sinchiklab oʻrganish orqali qonuniy asosda koʻrib chiqilmoqda.

Oʻtgan bir yildan ziyod vaqt ichida xususiy amaliyot bilan shugʻullanuvchi notarius Bibizuhra Bekimbetovaning saʼy-harakatlari bilan 5 mingdan ortiq notarial harakatlar amalga oshirildi. Xususan, fuqarolarning meros va mulkiy munosabatlar bilan bogʻliq, mashina, uy-joy oldi-sotdi ishlari, har xil turdagi ishonchnomalar, vasiyatnoma, garov va ipoteka shartnomalarini tasdiqlash boʻyicha qilgan murojaatlari qanoatlantirildi.

Hozirgi vaqtda dunyo miqyosida, shu barobarida mamlakatimiz hududida ham onlayn notarial harakat turlari koʻpayganligi sababli notarius maʼlum sabablarga koʻra, xorij davlatlarida yurgan, betobligi boʻlgan, notariusga kela olmagan fuqarolarga onlayn xizmat koʻrsatishni yoʻlga qoʻydi.

Oʻz sohasining bilimdoni, pishiq va puxta ish yurituvchi mutaxassis hamisha ishonchga, eʼtiborga sazovor. Bibizuhra Bekimbetova ham oʻz kasbiy faoliyati yuzasidan, qolaversa, fuqarolarning huquqiy savodxonligini oshirish maqsadida aholi oʻrtasida qonunchilikdagi yangiliklar va oʻzgarishlar, mulkiy munosabatlarni qonuniylashtirish borasida targʻibot-tashviqot tadbirlari tashkillashtirib, aholi bilan samimiy, oshkora muloqotlar oʻtkazishga alohida eʼtibor qaratadi. Ayniqsa, Amudaryo tumani Fuqarolik holatlari va dalolatnomalarini yozish boʻlimi xodimlari bilan hamkorlikda yosh kelin-kuyovlar hamda nikohlanuvchi shaxslar ishtirokida oʻtkaziladigan uchrashuv va davra suhbatlari orqali bir oila boʻlib yashashga ahd qilgan yoshlarning rasmiy nikoh, shu bilan birga nikoh shartnomasining ahamiyati toʻgʻrisidagi huquqiy bilim va tushunchalari oshishiga munosib hissa qoʻshmoqda.

Yaqinda notarius tomonidan Amudaryo tumani FHDYo boʻlimi binosida mazkur boʻlim xodimi Rohatoy Polvonova bilan hamkorlikda tashkil etilgan "Rasmiy nikoh va nikoh shartnomasi tuzishning ahamiyati" mavzusidagi davra suhbatida ham rasmiy nikoh orqali oilaviy munosabatlarni mustahkamlash, shuningdek, er-xotin oʻrtasida tuziladigan nikoh shartnomasining oila mustahkamligini taʼminlashdagi ahamiyati xususida batafsil maʼlumotlar hamda ushbu huquqiy hujjatlarni notarial tasdiqlash yuzasidan zarur tushuncha va tavsiyalar berildi.

Davra suhbati jarayonida soʻnggi yillarda keng ommalashib borayotgan nikoh shartnomasi tuzishning ahamiyati yuzasidan tadbir ishtirokchilari oʻzlarini qiziqtirgan savollar bilan murojaat qildilar va bu boʻyicha Bibizuhra Bekimbetova hamda Rohatoy Polvonovalar ularning savollariga atroflicha javoblar, kerakli maslahat va tushunchalar berdilar.

ROBIYa YOʻLDOShEVA.