Иккинчи жаҳон уруши йилларида аждодларимиз кўрсатган матонат ва жасорат ҳеч қачон унутилмайди!

Иккинчи жаҳон уруши инсоният тарихидаги энг қонли ва вайронкор урушлардан бири бўлиб, унинг оқибатлари ҳатто бугунги кунгача одамлар ҳаётида сезилмоқда. Ўша машъум уруш сабабли кимдир отасиз, кимдир онасиз қолди, яна кимдир яқинларидан айрилди. Деярли бутун халқ оғир меҳнат ва қийинчиликда кун кечирди. Ота-боболаримиз тортган азоб-уқубатлар, уларнинг бошига тушган йўқотишлар бугун ҳам авлодлар хотирасидан ўчмади, афсус ва надомат билан тилга олинади. Зеро, юрт тинчлиги, озодлиги ва равнақи йўлида аждодларимиз кўрсатган матонат ва жасорат ҳеч қачон унутилмайди.

Шу сабабли ҳам ҳар йили мамлакатимизда 9 май – Хотира ва қадрлаш куни кенг нишонланади. Бу санада Иккинчи жаҳон уруши жанггоҳларида жон олиб-жон берган, меҳнат фронтида, урушдан кейинги тикланиш йилларида фидойилик кўрсатган ота-боболаримиз, момоларимиз хотирасига ҳурмат бажо келтирилади. Бугунги дориломон кунларга етган нуронийларимизга ҳурмат-эҳтиром кўрсатилиб, ҳолидан хабар олинади.

8 май куни Амударё туманида ҳам Хотира ва қадрлаш куни муносабати билан тадбир ўтказилди. Тадбирда туман ҳокими Собир Хўжаметов, секторлар раҳбарлари, ҳуқуқни муҳофаза қилиш органлари вакиллари, меҳнат фронти фахрийлари, депутатлар, турли муассаса, корхона ва ташкилотлар раҳбарлари, маҳалла фаоллари ҳамда кенг жамоатчилик вакиллари иштирок этди.

Тадбирда сўзга чиққан туман ҳокими Собир Хўжаметов барчани байрам билан қутлар экан, уруш даврида юз берган воқеалар, жумладан, Ўзбекистонлик жангчиларнинг жасорати ва фидойилиги, уларнинг жанг майдонларида ва фронт ортида кўрсатган қаҳрамонликлари халқ хотирасида мангу муҳрланиб қолишини, марҳумлар хотираси ҳеч қачон авлодлар ёдидан ўчмаслигини таъкидлаб ўтди.

Туман Мудофаа ишлари бўлими бошлиғи Шерзод Муродов ўз нутқида уруш ва меҳнат фронти фахрийларининг инсониятни фашизм балосидан қутқаришдаги жасорати ва матонати ҳақида тўхталиб ўтди. Ўша суронли йилларда аждодларимиз кўрсатган жасорат ва фидойиликлар нафақат ўз даврида, балки бугунги кунда ҳам барчамиз учун ибрат мактаби бўлиб қолмоқда.

Нуронийлар жамоатчилик кенгаши раисининг ўринбосари Бекман ота Аллаберганов бешафқат урушнинг миллионлаб инсонлар ҳаётига зомин бўлгани, кўплаб шаҳарларнинг вайрон бўлиши, иқтисодиётнинг издан чиқиши ва бошқа кўплаб салбий оқибатлари билан ҳали-ҳануз инсонлар қалбига оғриқ солиб келаётганини айтиб, барчани бугунги тинч ва дориломон кунларнинг қадрига етишга чорлади.

Туман маданият бўлими ва жойлардаги маданият марказлари жамоалари томонидан тайёрланган саҳна кўринишлари ҳамда бадиий чиқишлар орқали жанггоҳларнинг аёвсиз манзараси, аҳолининг фронт ортидаги қийин ҳаёти иштирокчилар кўз ўнгида гавдалангандай бўлди.

Уруш йилларида нафақат фронтда, балки фронт ортида ҳам юртимиз аҳолиси фидойиликлар кўрсатган. Уларнинг меҳнати уруш даврида Совет Иттифоқининг иқтисодий ва ҳарбий салоҳиятини мустаҳкамлашда муҳим роль ўйнаган. Ўзбекистонликлар кўплаб эвакуация қилинган завод ва фабрикаларни ишлатишга кўмаклашган, шунингдек, қишлоқ хўжалигида ҳам катта юкламаларни зиммаларига олишган. Ўша пайтда аёллар ҳам эркаклар билан бир сафда меҳнат қилиб, иқтисодиётни қўллаб-қувватлашда фаол иштирок этганлар.

Уруш йилларида мамлакатимиз кўплаб эвакуация қилинган жабрдийдаларни ҳам қабул қилган. Халқимиз меҳмондўстлик ва инсонпарварлик намуналарини кўрсатиб, ўз уйларини бошқа миллат вакилларига бўшатиб берган.

Урушдан кейинги йилларда ҳам ота-боболаримизнинг ғайрат ва шижоати, жасорати билан юртимизда кенг кўламли тикланиш ишлари амалга оширилди. Бу даврда кўплаб саноат корхоналари, мактаблар, касалхоналар ва бошқа инфраструктура объектлари қайта қурилди ёки янгидан барпо этилди.

Шунингдек, маданий ҳаёт ҳам жонланди, адабиёт ва санъатда янги асарлар яратилди, бу эса халқнинг маънавий тикланишига ҳисса қўшди. Урушдан кейинги йилларда Ўзбекистонда ижтимоий ва маданий ҳаётнинг ривожланиши, хусусан, адабиёт ва санъатнинг гуллаб-яшнаши, мамлакатнинг турли соҳаларда эришган ютуқлари аждодларимиз кўрсатган қаҳрамонликлар, уларнинг матонати ва фидойиликларининг рамзидир.

Тадбирда марҳумлар руҳига Қуръон тиловат қилинди. Иштирокчилар Мотамсаро она ҳайлаки пойига гулчамбарлар қўйиб, уларнинг жасорати ва матонати олдида таъзим бажо келтиришди.

Ғ.Ешниёзов