40-сонли умумтаълим мактабининг 1-синфига 180 нафар болажонлар қабул қилинди
Ўқувчиларга мароқли ҳордиқ, қайноқ хотиралар улашган ёз фасли ниҳоясига етди. Қалбларга ажиб бир хотиржамлик, яхши кайфият, баланд руҳ бағишлаб ўлкамизга сокин куз фасли кириб келди. Йигит-қизлар яна илҳомбахш туйғулар, янги режалар билан таълим муассасалари томон ошиқади. Уларнинг қўлларидаги гулдасталар жилоланиб, атрофга ўзгача чирой бағишлайди. Мактабларда устозлар меҳри, дўстлар соғинчи, қадрдон китоблар, шинам синфхоналар ўқувчиларни ўзига чорлайди.
“Биринчи қўнғироқ” садоларида янги ўқув йилининг бошланиши, юксак масъулиятли дамлар, ҳаётнинг янги давони, орзу-мақсадлар сари дадил қадамлар ўз ифодасини топади. Боғча таълимини якунлаган болажонлар маърифат маскани, билимлар булоғи, келажак пойдевори бўлмиш муқаддас даргоҳ – мактаб билан илк бор танишади. Ота-оналар кўнглида эса умид ва ҳаяжон. Фарзанди ҳаётида янги давр бошланиш арафасида…
4 сентябрь куни Амударё туманидаги энг илғор мактаблардан бири – 40-сонли умумтаълим мактабида ўтказилган “Биринчи қўнғироқ” номли тадбир ҳам ана шундай ажиб туйғулар билан қалбларга муҳрланди.
Янги ўқув йилида мактабининг 1-синфига 180 нафар болажонлар қабул қилинди. Уларга 12 турдаги ўқув қуроллари, мактаб сумкаси, дарсликлар мажмуасидан иборат Президент совғалари топширилди.
Байрам тадбирини мактаб директори Санобар Хўжамуротова табрик сўзи билан очди ва барчани янги ўқув йили билан муборакбод этди.
Таъкидланганидек, сўнгги йилларда мамлакатимизда асосий эътибор ўқувчиларга сифатли таълим беришга қаратилмоқда. Умумтаълим мактабларини, таълим сифатини, кадрлар салоҳиятини жаҳон мезонлари асосида ривожлантириш йўлида тизимли ишлар олиб борилмоқда. Хусусан, умумтаълим мактабларига Президент ва ихтисослашган мактаблардаги янги методикаларга асосланган баҳолаш тизими жорий қилинмоқда. Хорижий тилларни ўрганишни оммалаштириш мақсадида “Хорижий тилларни ўқитиш бўйича энг яхши мактаб” танловлари ташкил қилинмоқда. Мазкур танловнинг туман босқичида жорий йил 40-сонли мактаб фахрли 1-ўринни эгаллади.
Бугунги кунда 40-сонли умумтаълим мактабида 1600га яқин ўқувчилар таълим-тарбия олишмоқда. Уларга жами 111 нафар, хусусан, 24 нафар олий, 26 нафар 1-тоифа, 39 нафар 2-тоифа, 19 нафар мутахассис ўқитувчи-педагог ходимлар дарс бериб келишмоқда. 2023-2024 ўқув йилида мактабни 143 нафар ўқувчи битирган бўлса, шундан 80 нафари олий таълим муассасаларига қабул қилинди. Эътироф этиш жоизки, 11-«Д» вариатив синф ўқувчиларининг барчаси талабалик бахтига сазовор бўлишди. Шунингдек, Нукус шаҳридаги Президент мактабининг 5-синфига мазкур умумтаълим мактабининг 2 нафар ўқувчиси қабул қилинди.
Бундан ташқари “Ташаббусли бюджет”нинг жорий йилги иккинчи мавсумида мактаб жамоаси ҳам ижтимоий аҳамиятга эга лойиҳа билан иштирок этиб, ғолиб бўлган эди. Лойиҳа режасига кўра мактаб ҳудудида баскетбол, волейбол, мини футбол майдончалари, югуриш йўлакчаси, кийиниш хонасидан иборат уст қисми ёпиқ спорт майдончасини қуриш белгиланган. Ушбу замонавий спорт майдончаси ўқувчиларга жисмоний тарбия машғулотлари билан янада фаол шуғулланиш имконини беради.
Шунингдек тадбирда туман Ички ишлар бўлими йўл-патруль хизмати бўлинмаси бошлиғи Анвар Юсупов ҳам иштирок этиб, ота-оналарга, ўқувчиларга йўлларда ҳаракатланиш хавфсизлигига доир муҳим тавсияларни берди. Афсуски, сўнгги пайтларда болалар бошқарувидаги скутер, электровелосипед ва бошқа транспорт воситалари иштирокида мудҳиш йўл транспорт ҳодисалари кузатилмоқда. Соҳа мутахассиси ушбу ҳолатлар бўйича фикр билдириб, ота-оналарни янада ҳушёрликка чақирди.
Ўқув даргоҳида “Мустақиллик дарслари” ҳам ўзига хос руҳда ўтказилди. Ушбу дарслардан кўзланган мақсад – ўқувчилар тафаккурини миллий ва умуминсоний қадриятлар асосида шакллантириш, ўзи яшаб турган тарихий маскандаги обидаларни билишга чорлаш ва ўтмишимизга ҳурмат руҳида тарбиялаш, қалбларда Ватанга муҳаббат ва садоқат, инсонпарварлик туйғуларини мустаҳкамлашдан иборат. Шунингдек, дарсларда ўқувчилар эътибори янги Ўзбекистонни барпо этиш, учинчи Ренессанс пойдеворини яратишга қаратилган ислоҳотлар моҳиятига қаратилди.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
