Навоий ва Гулзор маҳаллаларида яшовчи аҳоли учун чуқурлаштирилган тиббий кўрик ташкил этилди

Аҳоли саломатлиги давлатнинг ривожланиши ва жамиятнинг тараққиёти учун жуда муҳимдир. Соғлом жамият кучли иқтисодиёт ва барқарор ривожланишнинг асосини ташкил этади. Шу сабабли ҳам Ўзбекистонда соғлиқни сақлаш тизимини ислоҳ қилиш ва аҳоли саломатлигини янада мустаҳкамлашга қаратилган кенг кўламли ишлар амалга оширилмоқда. Бу ислоҳотлар орқали кўрсатилаётган тиббий хизматларнинг сифатини ошириш, аҳолининг турмуш даражаси ва умр кўриш давомийлигини яхшилаш кўзда тутилган.

Аҳоли саломатлигини сақлашда эса тиббий кўриклар муҳим аҳамиятга эга. Чунки улар касалликларни эрта аниқлаш ва олдини олиш имконини беради. Бундан ташқари, тиббий кўриклар жамоат саломатлигини яхшилаш ва ўртача умр кўриш давомийлигини узайтиришга ҳам хизмат қилади. Ўзбекистонда соғлиқни сақлаш тизимида амалга оширилаётган ислоҳотлар доирасида тиббий кўрикларнинг аҳамияти янада ортмоқда.

Амударё тумани Тиббиёт бирлашмаси томонидан мунтазам равишда аҳолини чуқурлаштирилган тиббий кўрикдан ўтказиш ишлари амалга ошириб келинмоқда. 27 сентябрь куни туманнинг Навоий ва Гулзор маҳаллаларида яшовчи аҳоли учун ҳам чуқурлаштирилган тиббий кўрик ташкил этилди. Ушбу тиббий кўрикда оилавий шифокорлардан ташқари, тор доирадаги мутахассис шифокорлари ҳам иштирок этди. ЛОР, жарроҳ, офтальмолог, кардиолог, эндокринолог, гинеколог, травматолог, онколог педиатрлар шулар жумласидандир. Бундан ташқари, аҳоли учун клиник лаборатор текширувлар, жумладан ультратовуш текшируви, рентген ва ЭКГ каби диагностика хизматлари ҳам кўрсатилди.

Айтиш жиозки, туманнинг Навоий номли маҳалласи ҳудудида 3 минг 884 нафар аҳоли истиқомат қилади. Шулардан 582 нафари тиббий кўрикдан ўтказилди ва кўрикдан ўтганларнинг 65 нафарида турли касалликлар аниқланди. Касаллик белгилари аниқланганларнинг 63 нафарига амбулатор шароитда, 2 нафарига эса стационар шароитда даволаниш учун йўлланма берилди.

Гулзор маҳалласи ҳудудида эса 4 минг 232 нафар аҳоли яшайди. Улардан 719 нафари тиббий кўрик давомида текширувдан ўтказилди. Тиббий кўрикдан ўтганларнинг 71 нафарида касаллик аниқланди ва 70 нафари амбулатор, 1 нафари эса стационар даволанишга йўлланма олди.

Тиббий кўрик давомида аҳолига соғлом турмуш тарзига оид қатор зарурий тавсиялар ҳам берилди. Жумладан, соғлом турмуш тарзи инсоннинг умр давомийлиги ва сифатини оширишда муҳим омил экани, жисмоний фаоллик, тўғри овқатланиш, етарли уйқу ва стрессни бошқариш соғлом турмуш тарзининг асосий устунлари экани қайд қилинди. Кундалик жисмоний фаолликни таъминлаш, масалан, пиёда юриш, зинапоядан фойдаланиш, велосипед миниш ёки спорт билан мунтазам шуғулланиш каби оддий амалиётлар инсон саломатлигини мустаҳкамлашда муҳим аҳамият касб этиши таъкидланди. Шунингдек, тўғри овқатланиш, жумладан мева-сабзавотларни кўпроқ истеъмол қилиш, қайта ишланган озиқ-овқатлардан тийилиш ва тўйимли, мувозанатли овқатланиш тартибига риоя қилиш тавсия этилди. Етарли уйқу ҳам жуда муҳим экани, катталар учун кунда камида 7-9 соат уйқу зарурлиги алоҳида қайд этилди. Бундан ташқари, тамаки ва алкоголдан воз кечиш, мунтазам тиббий кўрикдан ўтиш ҳам соғлом турмуш тарзининг асосий шартларидан эканлигини алоҳида таъкидланди.

Шифокорларнинг тиббий кўрсатмалари асосида, зарур ҳолларда беморларни бепул дори-дармонлар билан таъминлаш чоралари кўрилди. Бу каби тиббий кўриклар аҳолининг саломатлигини сақлаш ва касалликларнинг олдини олишда муҳим аҳамиятга эга бўлиб, уларнинг мунтазам ўтказилиши кўплаб касалликларнинг эрта аниқланиши ва самарали даволанишига ёрдам беради. Шунингдек, бу турдаги тадбирлар аҳолининг тиббий маданиятини янада оширишга ва соғлом турмуш тарзини қўллаб-қувватлашга хизмат қилади.