КОРРУПЦИЯГА ҚАРШИ КУРАШИШДА ННТ ИШТИРОКИ КЕНГАЙМОҚДА
“Жайхун илҳомлари” нодавлат нотижорат ташкилоти 2024 йилнинг февраль ойида Қорақалпоғистон Республикаси Жўқорғи Кенгеси ҳузуридаги жамоат фонди томонидан эълон қилинган грант танловида ўз лойиҳаси билан иштирок этиб, ғолиб бўлган ва лойиҳа давлат гранти билан молиялаштирилган эди. Лойиҳа орқали коррупцияга қарши курашишнинг замонавий ва ижодий усулларни қўллаш йўли билан давлат ва жамият фаровонлигига ҳисса қўшиш мақсад қилинган.
Грант лойиҳасининг иш режасига асосан шу мақсадга хизмат қилувчи саҳна асари сценарийси учун танлов эълон қилиниб, Байжан Узақов қаламига мансуб “Давр дарди” номли спектакль сценарийси ғолиб деб топилган эди. Қорақалпоғистон Республикаси Маданият вазирлиги билан ҳамкорликда коррупциянинг давлат ва жамиятга салбий таъсирини чуқур талқин этиб, фуқароларда ушбу иллатга нисбатан муросасизлик туйғусини шакллантиришга хизмат қилувчи ушбу асар режиссёр Марс Нуратдинов раҳбарлигидаги Қорақалпоқ давлат Ёш томошабинлар театри ижодкорлар жамоаси томонидан саҳналаштирилди.
Лойиҳанинг иш режасига асосан спектакль ноябрь ойида давлат ҳокимияти бошқаруви органлари ва фуқароларнинг ўзини ўзи бошқариш органлари ходимлари учун намойиш қилинди.
Спектаклда коррупциянинг фожиавий оқибатлари ҳаётий мисоллар орқали ёритиб берилган. Таъмагирлик йўлини танлаган олийгоҳ ўқитувчиси талабалардан бирини “ўқишга сени мен киритдим” дея пора талаб қилади. Айтилган пулни бермаса, уни ўқишдан четлатиш билан таҳдид қилади. Асар сўнгида талаба қизнинг онаси тегишли ҳуқуқ-тартибот органларига мурожаат қилади ва таъмагир ўқитувчи қўлга олиниб, озодликдан маҳрум қилинади. Асарнинг кульминацион нуқтаси – унинг оила аъзолари – фарзандлари ва турмуш ўртоғининг монологлари ҳар қандай томошабинни таъсирлантириб, ҳалоллик ва адолатга даъват этади.
Спектаклда иштирок этган давлат ҳокимияти органлари ва фуқароларнинг ўзини ўзи бошқариш органлари ходимлари, шунингдек олий таълим муассасалари талабалари коррупциянинг нақадар аянчли оқибатларга олиб келиши ва фожиавий якун топишига гувоҳ бўлдилар.
Дарҳақиқат, коррупция жамият ва давлат ривожига жиддий тўсиқ бўлиб, унинг олдини олиш мамлакат тараққиётининг муҳим шартидир. Ўзбекистонда коррупцияга қарши курашиш давлат сиёсатининг устувор йўналишларидан бири бўлиб, бу борада кенг қамровли ишлар амалга оширилмоқда. Давлат ҳокимияти органларида шаффофлик ва очиқликни таъминлаш бўйича муҳим ислоҳотлар амалга оширилмоқда. Хусусан, давлат хизматлари кўрсатиш жараёнларини рақамлаштириш орқали инсон омили камайтирилмоқда. Бу эса порахўрликка қарши самарали чоралардан биридир. Фуқароларнинг ўзини ўзи бошқариш органлари ҳам мазкур жараёнда фаол иштирок этмоқда. Маҳаллаларда коррупциянинг олдини олишга қаратилган тарғибот тадбирлари ўтказилмоқда. Жамоатчилик кенгашлари ва ҳуқуқни муҳофаза қилиш органлари билан ҳамкорликда шаффоф муҳит яратишга қаратилган чоралар кўрилмоқда.
Буларнинг барчаси коррупцияга қарши курашда давлат ва жамоатчиликнинг муштарак ҳаракати ўз самарасини бераётганидан далолатдир.
“Жайхун илҳомлари” нодавлат нотижорат ташкилотининг грант лойиҳаси доирасида саҳналаштирилган ушбу спектакль ҳам аҳоли онгида коррупцияга нисбатан муросасизлик туйғусини шакллантиришда муҳим аҳамият касб этиши шубҳасиз.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
