ТУМАНИМИЗДА “ХАВФСИЗ ҲУДУД” МАХСУС ПРОФИЛАКТИК НАЗОРАТ ТАДБИРЛАРИ АМАЛГА ОШИРИЛМОҚДА

Мамлакатимизда амалга оширилаётган ислоҳотлар доирасида аҳолининг тинч ва осойишта ҳаётини таъминлаш ҳамда жамиятда қонунларимизга ҳурмат ва итоаткорлик, фуқаролар ўртасида жамоат хавфсизлиги маданиятини шакллантиришга алоҳида эътибор қаратилмоқда. Хусусан, соҳа масъуллари томонидан жойларда жамоат хавфсизлигини таъминлашга қаратилган профилактик чора-тадбирлар режаси ишлаб чиқилиб, амалиётга жорий этилаётгани бу борадаги ишлар натижадорлигини оширмоқда.

Ўзбекистон Республикаси Ички Ишлар Вазирлиги Жамоат хавфсизлиги хизмати Йўл ҳаракати хавфсизлиги бошқармасининг 2024 йил 11 ноябрдаги Фармойишига асосан қабул қилинган Қорақалпоғистон Республикаси Ички Ишлар Вазирлигининг фармойишига кўра, 2024 йилнинг 11 ноябрь ва 2025 йил 2 январь кунлари оралиғида Қорақалпоғистон Республикасида “Хавфсиз ҳудуд” махсус профилактик долзарб 50 кун сифатида белгиланиб, ишчи гуруҳ таркиби тасдиқланган эди. Айни кунларда ишчи гуруҳ томонидан Амударё туманида ҳам долзарб 50 кун доирасида профилактик назорат тадбирлари амалга оширилмоқда.

Назорат тадбирлари жараёнида Йўл ҳаракати хавфсизлиги бошқармаси ходимлари томонидан аҳолига жамоат хавфсизлиги тўғрисида тушунчалар ҳам бериб борилмоқда.

Аввало, жамоат хавфсизлиги – бу шахс, жамият ва давлатнинг ҳаётий манфаатларини тўсқинликсиз амалга оширишни таъминлаш, турли кўринишдаги хавф-хатарларнинг олдини олиш ва бартараф этишга қаратилган жамоат муносабатлари эканлиги, фуқаролар ва давлатнинг осойишталигига, инсонларнинг саломатлигига хавф солувчи ҳар қандай ҳатти-ҳаракатларнинг келиб чиқишига қарши тез ва ишончли чоралар кўриш, бу борадаги фуқароларнинг бурч ва мажбуриятлари тўғрисида масъуллар томонидан атрофлича маълумотлар тақдим этилиб, йўлларда ҳаракатланиш маданиятига амал қилиш зарурлиги ҳақида тушунтиришлар, тавсиялар берилмоқда.

Шуни алоҳида қайд этиш керакки, сўнгги йилларда халқимизнинг иқтисодий фаровонлиги ошиб, деярли ҳар 5 хонадондан бирида енгил автомобиль ёки скутерлар мавжуд. Оддий, халқона тил билан айтганда, йўлларимиз тўла машина. Бу фаровонлик биз учун қанчалик ёқимли бўлишидан қатъий назар, йўлларда эҳтиёткорлик ва огоҳликни унутишга ҳаққимиз йўқ. Чунки салгина эҳтиётсизлик тузатиб бўлмас хатоларни келтириб чиқариши, йўл ҳаракати қоидаларига амал қилмаслик инсонлар ўлимига ёки умрбод ногирон бўлиб қолишларига олиб келиши ҳеч гап эмас.

Шунингдек, жамоат жойларида, тўйхоналар, истироҳат боғлари, умумтаълим муассасалари, бозорлар атрофида спиртли ичимлик таъсирида шовқин кўтариш, бегуноҳ фуқароларни ҳақоратлаш, таълим-тарбия жараёнига, инсонларнинг дам олиш, ҳордиқ чиқариш дамларига салбий таъсир кўрсатувчи хатти-ҳаракатлар содир этишга мойил ҳуқуқбузар фуқароларнинг жамиятда ўзини тутиш қоидаларига амал қилмасликлари оқибатида келиб чиқадиган кўнгилсиз ҳодисалар туфайли айрим ҳолатларда бундай шахсларга нисбатан қонуний чоралар кўрилаётгани ҳам сир эмас.

Бу каби кўнгилсиз ҳодисаларнинг олдини олиш мақсадида ишчи гуруҳ аъзолари томонидан Амударё туманининг барча ҳудудларида назорат тадбирлари амалга оширилмоқда.

Жорий йилнинг 11 ноябрь санасидан бошланган долзарб 50 кунлик “Хавфсиз ҳудуд” махсус профилактик назорат тадбирлари 2025 йил 2 январгача давом этади ва мазкур тадбир доирасида режавий асосда туманимиз аҳолисининг хавфсизлиги ва осойишталигини таъминлашга қаратилган “Тиғ”, “Хавфсиз тун”, “Йўл қоидаси – умр фойдаси”, “Светофор” каби маърифий суҳбатлар, тушунтириш-тарғибот ишлари ҳам олиб борилади.

Қадрли юртдошлар, жамоат хавфсизлигини таъминлашга ҳисса қўшиш ҳар бир фуқаронинг иши. Чунки ҳар қандай хавф-хатардан холи ҳудудда ривожланиш ва тараққиёт, тинчлик ҳоким бўлади, оилаларда хотиржамлик ҳукм суради. Хотиржамлик эса ҳар бир инсонга бахтиёрлик бахш этади. Яқинлашиб келаётган Янги йил байрами арафасида ҳар бирингизни жамоат хавфсизлигини таъминлашга муносиб ҳисса қўшишга чақирамиз.

Робия Йўлдошева.