Семинарда аграр соҳа бўйича келгусидаги вазифалар белгилаб олинди
Амударё туманининг Чойкўл овули ҳудудидаги “Худайберган Жабборович” МЧЖга тегишли ғалла экин майдонида аграр соҳа ходимлари иштирокида семинар бўлиб ўтди. Семинарда Ўзбекистон Республикаси Президенти маслаҳатчиси Шуҳрат Ғаниев, Қорақалпоғистон Республикаси Вазирлар Кенгаши Раисининг қишлоқ ва сув хўжалиги масалалари бўйича ўринбосари Шуҳрат Тешаев, туман ҳокими ўринбосарлари, овул ва маҳалла фуқаролар йиғинлари масъуллари, қишлоқ хўжалиги соҳаси мутасаддилари ҳамда фермерлар иштирок этдилар.
Семинарда мутахассислар 2025 йил ҳосили учун экилган ғалла майдонларида агротехник тадбирларни амалга ошириш, маҳаллий ўғит чиқариш ва далаларга сепиш, суғориш ишларини уюшқоқлик билан ташкил қилиш, ички ариқ ва каналларни тозалаш ҳамда бетонлаш, дала маданиятини ошириш, дарахтларга шакл бериш, техника ва агрегатларини таъмирлаш ва баҳорги экиш мавсумига соз ҳолатга келтириш масалалари юзасидан фикр-мулоҳазалар билдирдилар.
Семинарда Қорақалпоғистон Республикаси Вазирлар Кенгаши Раисининг қишлоқ ва сув хўжалиги масалалари бўйича ўринбосари Шуҳрат Тешаев сўнгги йилларда мамлакатимизда қишлоқ хўжалиги соҳаси ривожи йўлида амалга оширилаётган кенг кўламли ислоҳотлар хусусида тўхталди.
Хусусан, Ўзбекистон Республикаси Президентининг “Ўзбекистон Республикаси қишлоқ хўжалигини ривожлантиришнинг 2020–2030 йилларга мўлжалланган стратегиясида белгиланган вазифалар ижросини самарали ташкил этишга доир қўшимча чора-тадбирлар тўғрисида”ги ҳамда “Қишлоқ хўжалиги ва озиқ-овқат соҳасидаги ислоҳотларни жадаллаштириш бўйича қўшимча чора-тадбирлар тўғрисида”ги, “Қишлоқ хўжалигини механизациялаш даражасини янада ошириш чора-тадбирлари тўғрисида”ги қарорлари соҳа ривожи йўлидаги ишларни янги босқичга олиб чиққанлиги қайд этилди.
Шунингдек, мамлакат аҳолисига сифатли ва кафолатли қишлоқ хўжалиги маҳсулотларини етказиб бериш орқали озиқ-овқат хавфсизлигини таъминлаш, иссиқхона хўжаликлари ва музлаткичли омборхоналарнинг иқтисодий жиҳатдан самарали ишлаши учун янада қулай шарт-шароитлар яратиш, мазкур соҳада банд бўлган аҳоли даромадларини оширишни қўшимча рағбатлантириш мақсадида имзоланган “Иссиқхона хўжаликлари фаолияти самарадорлигини ошириш юзасидан қўшимча чора-тадбирлар тўғрисида”ги Президент Қарори ҳам муҳим дастуруламал бўлиб хизмат қилаётгани таъкидланди.
Семинарда 2025 йил ҳосили учун қишлоқ хўжалиги ер майдонларидан самарали фойдаланиш, дала маданиятига риоя қилиш ҳамда дала четига кўчатлар экиш, пахта майдонларини томчилатиб суғоришнинг афзалликлари ва фойдали жиҳатлари бирма-бир тушунтириб ўтилди. Қолаверса, дала майдонларига конверт шаклида ишлов бериш ҳамда дала четига тут кўчатлари экиш бўйича қишлоқ хўжалиги соҳаси мутасаддилари ва фермер хўжаликлари раҳбарларига алоҳида топшириқлар берилди. Шу билан бирга қишлоқ хўжалиги техника ва агрегатларини таъмирлаш ишларини якунлаш бўйича ҳам туман масъулларига тегишли вазифалар белгилаб берилди.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
