Амударёликлар томорқаларидан самарали фойдаланиб, юқори даромад олишмоқда

Амударёликлар азалдан меҳнатсевар халқ, ерга меҳри баланд. Бугун қишнинг изғиринли кунларида ҳам юртдошларимиз томорқаларидан унумли фойдаланиб, ихчам иссиқхоналар ташкил қилишган, иссиқхоналарда турли кўкатлар ҳамда сабзавот маҳсулотларини етиштириб, ички бозорларимизни озиқ-овқат маҳсулотлари билан таъминлаб келишмоқда.

Хусусан, Қиличбой овули ҳудудида яшовчи Қўчқорбой Нуримов 25 сотих томорқасининг 5 сотихига ихчам иссиқхона ташкил этиб, йилига 2-3 маротаба ҳосил олиб келмоқда. Томорқанинг 10 сотих майдонида яратилган интенсив боғдаги турли мевали дарахтлардан ҳам яхши ҳосил олинмоқда. Қўчқорбой ака айни пайтда иссиқхонасида кўк пиёз ва кўкатлар етиштирмоқда, баҳор фаслининг бошларида эса, бодринг ва помидор экишни режалаштирмоқда.

Оилавий меҳнат натижасида томорқадан юқори даромад олиниб, оиланинг иқтисоди тобора яхшиланмоқда. Қўчқорбой аканинг меҳнатлари туман Фермер, деҳқон хўжаликлари ва томорқа ер эгалари кенгаши томонидан рағбатлантирилиб, доимий қўллаб-қувватланиб келинмоқда. Ҳамюртимизнинг фидокорана меҳнатлари эътироф этилиб, “Намунали томорқачи” кўкрак нишони билан тақдирланган.

Шу ўринда қайд этиш жоизки, бугунги кунда бутун мамлакатимиз бўйлаб ҳудудларни ижтимоий-иқтисодий ривожлантириш, аҳоли даромадларини ошириш, камбағалликни қисқартириш ва бандликни таъминлаш масалаларига алоҳида эътибор қаратиб, кенг кўламли ислоҳотлар амалга оширилмоқда. Бунда чекка ҳудудлардаги аҳолининг томорқаларидан самарали фойдаланишига, ихчам иссиқхоналар ташкил этилиши орқали аҳоли даромадини оширишга алоҳида эътибор қаратилиб, кенг имкониятлар яратилмоқда.

Ўзбекистон Республикаси Президентининг “Иссиқхона хўжаликлари фаолияти самарадорлигини ошириш юзасидан қўшимча чора-тадбирлар тўғрисида”ги қарори мамлакат аҳолисига сифатли ва кафолатли қишлоқ хўжалиги маҳсулотларини етказиб бериш орқали озиқ-овқат хавфсизлигини таъминлаш, иссиқхона хўжаликлари ва музлаткичли омборхоналарнинг иқтисодий жиҳатдан самарали ишлаши учун янада қулай шарт-шароитлар яратиш, шунингдек, мазкур соҳада банд бўлган аҳоли даромадларини оширишни қўшимча рағбатлантириш каби устувор мақсадларга хизмат қилмоқда.

Амударё туманининг Холимбег овулида яшовчи Эркин Қўшаев ҳам меҳнатсеварликни ўзининг ҳаётий шиори қилиб олган инсонлардан бири десак, асло муболаға бўлмайди. Эркин ака хонадонига ташриф буюрган ҳар бир меҳмоннинг жуда катта ҳавас ва унутилмас таассуротлар билан қайтиши, шубҳасиз.

Биз ҳам ижодий жамоамиз билан “Намунали томорқачи” кўкрак нишони соҳибининг томорқаси билан танишар эканмиз, жуда катта меҳнат ва ўз устида ишлаш орқали эришилган натижаларни кўриб ҳайратда қолдик. Хонадоннинг ўзгача файзи унинг эгаларининг очиқкўнгиллигидан, самимийлигидан эканига ишонч ҳосил қилдик. Уй олдидаги 10 йиллик тарихга эга ҳайбатли арча дарахтлари ҳовлига кўрк бағишлаб турибди.

Эркин ака томорқасида лимон, қулупнай, араб хурмоси каби мевалар етиштиришни йўлга қўйган бўлиб, 30 сотих экин майдонининг 2 сотихида ихчам иссиқхона ташкил этган ва унда етиштирилаётган лимондан бу йил иккинчи маротаба ҳосил олмоқда. Туман Фермер, деҳқон хўжаликлари ва томорқа ер эгалари кенгаши томонидан лимон кўчатларини кўпайтиришни йўлга қўйиш борасида тегишли тавсиялар ҳамда амалий ёрдамлар берилиб келинмоқда.

Шунингдек, томорқада эрта баҳордан сабзавот ва полиз экинларини экишга ерларни тайёрлаш ишлари олиб борилмоқда. Томорқачи ўзи етиштирган картошка, пиёз, карам, қовун, тарвуз каби маҳсулотларни нафақат туманимиз ички бозорларига, балки қўшни туманлар бозорларига ҳам етказиб, уларни ҳам сифатли ва арзон озиқ-овқат маҳсулотлари билан таъминлашга ҳисса қўшмоқда. Ердан олинадиган даромад ҳам йил сайин ортиб бормоқда. Томорқада етиштирилган ҳосилдан йилига 100 млн сўмга яқин даромад олиниши тинимсиз ва самарали меҳнат натижасидир.

Чарос Арслонова, туман ҳокимлигининг Ахборот хизмати раҳбари.