36-СОНЛИ МАКТАБДА “МАРДЛАР ҚЎРИҚЛАЙДИ ОНА ВАТАННИ!” МАВЗУСИДА БАЙРАМ ТАДБИРИ ЎТКАЗИЛДИ

Ўсиб келаётган ёш авлодни ватанпарварлик руҳида тарбиялаш, улар онгида миллий ўзликни англаш туйғуларини уйғотиш, келажаги буюк Ватанимизни чуқур муҳаббат билан севиб-ардоқлашга ўргатиш, аввало оилада, қолаверса, мактаб таълими орқали узвийлик асосида амалга оширилади. Бу борада умумтаълим мактабларининг бошланғич синфлар ўқитувчилари томонидан амалга ошириладиган маънавий-маърифий тарбиявий дарслар, айниқса, турли байрамлар муносабати билан ўтказиладиган тадбирларнинг аҳамияти катта. Чунки айнан ана шундай тадбирлар орқали ўсиб келаётган ёш авлод қалбида она Ватанга меҳр-муҳаббат туйғулари шаклланади, ўз келажаги, ота-онаси ва оиласи тақдири она Ватан тақдири билан чамбарчас боғлиқлигини чин юракдан англашга одатланади.

Қуролли Кучларимизнинг 33 йиллиги ва 14 январь – Ватан ҳимоячилари куни муносабати билан Амударё туман Мактабгача ва мактаб таълими бўлимига қарашли 36-сонли умумтаълим мактабининг 3-“А” синф ўқувчилари иштирокида ўтказилган “Мардлар қўриқлайди она Ватанни!” мавзусидаги маънавий-маърифий тадбир ҳам ёш авлод қалбида ана шундай миллий ўзликни англаш, она Ватанга чексиз меҳр-муҳаббат туйғуларини янада мустаҳкамлашга хизмат қилгани билан муҳим аҳамият касб этди.

Бошланғич синф ўқитувчиси, 3-“А” синф раҳбари Насиба Бобожонова томонидан мазкур синф ўқувчилари иштирокида ташкиллаштирилган байрам тадбирини мактаб директорининг ўқув ишлари бўйича ўринбосари Ваҳобжон Давлетов очиб, байрам иштирокчиларини Қуролли Кучларимизнинг 33 йииллиги билан самимий табриклади. Шу билан бирга у Янги Ўзбекистонимизнинг Қуролли Кучлари қудрати, дунёдаги ривожланган давлатлар армиялари орасида тутган ўрни ҳақида ўқувчиларга батафсил маълумотлар бериб, она Ватан ҳимоячиси бўлишдек шарафли касбнинг масъулияти, Ватанимиз сарҳадларини ҳимоя қилиш вояга етган ҳар бир йигитнинг она Юрт олдидаги муқаддас бурчи эканлигини таъкидлади.

Тадбир давомида ўқувчилар ўз устозлари Насиба Бобожонова раҳбарлигида Ватанни, дўстлик ва тинчликни, она Ватан посбонлари – мард ва жасур аскарларни шарафловчи шеърлар айтишди. Ўғил болалар жўрвозлигида ижро этилган “Бизлар кичик аскарлармиз” қўшиғи байрамга янада жўшқинлик бахш этди. “Жасур аскар” қўшиғига ўғил болалар томонидан маромига етказиб ижро этилган рақс, шунингдек, қиз болалар ижросидаги “Ватан”, “Катюша”, “Ёронлар” қўшиқлари жўрлигидаги рақслар байрамга файз, иштирокчилар қалбига кўтаринки кайфият улашди.

Тадбир давомида энди 8-9 ёшга тўлган болажонлар қалбларида она Ватанга чексиз меҳр-муҳаббат, келажакка ишонч билан Қуролли Кучларимизни шарафловчи шеърлар айтиб, куй-қўшиқлар ва рақсларни маҳорат билан ижро қилганларидан байрам иштирокчилари, айниқса, устозлари мамнун бўлдилар. Байрам муносабати билан 3-“А” синфнинг барча ўғил болаларига – бўлғуси она Ватан ҳимоячиларига байрам совғалари тақдим этилди.

Робия Йўлдошева.