Ички йўлларни таъмирлаш ишлари жадаллаштирилмоқда
Халқимиз тилида тез-тез такрорланадиган, қулоққа хуш ёқадиган тилаклар кўп. Айниқса, бирон жойга борадиган бўлсак, албатта, “йўлингиз равон бўлсин”, дейишади. Бу тилак мазмунида манзилга бехатар етиш, сафарни соғ-саломат адо этишдек эзгу ниятлар мужассам. Ана шу ниятларнинг рўёби учун халқимиз азал-азалдан ўзлари яшаб турган ҳудудларни ободонлаштириш, айниқса, йўлларни таъмирлаш, борадиган манзилларига бехатар етиб олиш мақсадида бу борадаги камчиликларни бартараф этишга ўзларини масъул деб билишган.
Шу йилнинг 28 январь куни Амударё туманида Қорақалпоғистон Республикаси Жўқорғи Кенгеси раиси Аманбай Оринбаев бошчилигида бўлиб ўтган йиғилишда туман ҳудудини ҳар томонлама ривожлантириш, энг чекка қишлоқларда ҳам кенг кўламли ободонлаштириш ишларини олиб бориш, маҳаллалар инфратузилмасини яхшилаш билан боғлиқ долзарб вазифалар белгиланиб, шу куннинг ўзида туман ҳудудидаги тупроқли дала йўлларини қум-шағал аралашмали йўлларга айлантириш ва кенг кўламли ободонлаштириш ишлари уюшқоқлик билан бошлаб юборилган эди.
Туманнинг Қиличбой мавзесидаги Тошқалъа маҳалласи ҳудудидан бошланган тупроқ йўлларни қум-шағал аралашмали йўлларга айлантириш борасидаги ишлар бугунги кунда қатор овул ва маҳаллалар ҳудудларида жадаллик билан давом эттирилмоқда. Ҳозирги босқичда тумандаги 16 овул ва маҳаллада 107 километр масофадаги тупроқли йўлларга қум-шағал аралашмасини ётқизиш кўзда тутилган.
Хусусан, Холимбег овули ҳудудидаги 7 минг 550 метр масофадаги ички йўлларни таъмирлаш режалаштирилган бўлиб, 5 февраль санасига қадар 3,7 километр масофадаги ички кўчаларни таъмирлаш ишлари сифатли якунланди. Шунингдек, Чойкўл овули ҳудудидаги 3 километр 465 метрлик ички йўлларга қум-шағал аралашмасини ётқизиш режалаштирилган. Мазкур ҳудудда шу кунгача 1,78 километр масофадаги ички йўлларга қум-шағал аралашмаси ётқизишга муваффақ бўлинди ва бу ишлар жадал суръатларда олиб борилмоқда.
Шуни мамнуният билан эътироф этиш керакки, кенг кўламли ободонлаштириш ишларига туманимиз аҳолиси ҳамда ҳудудлардаги фермер хўжаликлар раҳбарлари ҳам ўзларининг муносиб ҳиссаларини қўшмоқдалар. Фермерлар махсус техникалари ёрдамида таъмирланаётган ички йўллар учун қум-шағал аралашмасини ташиш ишларига яқиндан ёрдам беришмоқда.
Ўзбекистон Республикаси Президентининг 2024 йил 23 сентябрдаги “Камбағалликдан фаровонлик сари” дастурини амалга ошириш бўйича биринчи навбатдаги чора-тадбирлар тўғрисида”ги Қарорига асосан туманда энг оғир аҳволдаги 7 та, яъни Бобур ва Амир Темур номли, Қангли, Бўз ёп, Куюк-кўпир, Оқ олтин овуллари ҳамда Уйшин маҳалласи танлаб олиниб, мазкур ҳудудларнинг инфратузилмасини ривожлантириш, аҳолининг яшаш шароитларини яхшилаш юзасидан чора-тадбирлар режаси ишлаб чиқилган. Унга кўра, Уйшин маҳалласида ҳам инфратузилма билан боғлиқ бир қатор ишларни амалга ошириш кўзда тутилган.
Хусусан, маҳалла ҳудудида электр таъминотини яхшилаш мақсадида 2та трансформатор ўрнатилади, 3 километр масофада СИП кабель тортилиб, 150 та бетон таянч устунлар ва 120та тунги ёритгич ўрнатиш орқали 155 та хонадоннинг электр таъминоти яхшиланади. Шунингдек, 10 километр масофадаги ички йўлларни шағаллаштириш режалаштирилган. Мазкур ички йўлларнинг таъмирланиши маҳалладаги 260та хонадонда яшовчи аҳолининг йўллари равон, мушкуллари осон бўлишини таъминлаб, қишда лойгарчиликдан, ёзда чанг-тупроқдан халос бўлишлари учун имкон яратади.
Уйшин маҳалласи ҳудудида маҳалла аҳлининг ҳамжиҳатлиги, қолаверса, ҳудудда фаолият олиб борувчи фермер хўжаликлари раҳбарларининг элпарварлиги ва ташаббускорлиги туфайли айни пайтда маҳалланинг марказий кўчаларини ҳашар йўли билан таъмирлаш ишлари амалга оширилмоқда. Фермерлар ўз маҳалладошларининг ташаббусларини қўллаб-қувватлаб, ҳашарчиларни маҳалла ҳудудидаги марказий кўчаларни шағаллаштиришда зарур бўлган техника воситалари билан таъминлаганлари боис, бу борадаги ишлар жадал суръатларда олиб борилмоқда.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
