Аёл-қизларга берилаётган эътибор жамият равнақига хизмат қилади

Бугунги кунда юртимизда аёл-қизларнинг ижтимоий ҳимояси, таълим олиши, касб-ҳунар эгаллаши ва меҳнат бозорида ўз ўрнини топишига алоҳида эътибор қаратилмоқда. Хотин-қизларни қўллаб-қувватлашга қаратилган “Аёллар дафтари” тизими бу борадаги муҳим ишлардан биридир. Хусусан, ишсиз, боқувчисини йўқотган ва ёлғиз аёлларга ижтимоий ёрдам кўрсатиш, уларнинг бандлигини таъминлаш бўйича кенг кўламли чора-тадбирлар амалга оширилмоқда.

Жумуртов шаҳарча фуқаролар йиғинининг бу йўналишдаги ташаббуслари ҳам диққатга сазовор. 2024 йил давомида маҳаллада 109 нафар ижтимоий ҳимояга муҳтож аёл “Аёллар дафтари”га киритилиб, уларнинг турмуш даражасини яхшилаш мақсадида бир қатор тадбирлар амалга оширилди. Хусусан, 1 нафар аёлнинг яшаш шароитини яхшилаш мақсадида уйининг пол қисми таъмирланди. Яна 1 нафар аёлга субсидия асосида тикув машинаси ажратилиб, бандлиги таъминланди.

Шунингдек, "маҳалла еттилиги" ва фаоллар томонидан оилавий-маиший зўравонликка қарши курашиш борасида ҳам тизимли ишлар амалга оширилмоқда. Шаҳарчага бириктирилган профилактика инспектори Анвар Шомуратов ташаббуси билан низоли оилаларда яшовчи икки нафар аёлга ҳимоя ордери берилди. Бугунги кунда ушбу оилалар профилактик назоратда бўлиб, ҳуқуқбузарликларнинг олдини олиш ва хотин-қизларнинг хавфсизлигини таъминлаш чоралари кўрилмоқда.

Шаҳарчада бу борадаги ишлар 2025 йилда ҳам изчил давом эттирилади. Жумладан, жорий йилда 115 нафар аёлни «Аёллар дафтари»га киритиш орқали касб-ҳунарга ўргатиш, бандлигини таъминлаш ҳамда ҳуқуқий ва иқтисодий манфаатларини ҳимоя қилиш бўйича қатор чора-тадбирлар амалга ошириш мақсад қилинган.

Хотин-қизларнинг ижтимоий ҳимояси ва бандлигини таъминлаш борасида олиб борилаётган ишлар уларнинг ҳаёт сифатини яхшилаб, жамиятда барқарорлик ва фаровонликни таъминлашга хизмат қилмоқда. Зеро, аёллар бахтли бўлган жамиятда тараққиёт ва юксалиш муқаррардир.

Озода Холназарова, Ирода Холназарова, ҚДУ талабалари, таҳририят амалиётчилари.

Фото: ЎзА