Чойкўл овули ва Бўстон маҳалласида сумалак сайллари ўтказилди

Баҳор фасли нафақат ёшариш ва янгиланиш айёми, балки дилларни дилларга улаб, эл-улус, қўни-қўшнилар орасида оғзибирчилик, меҳр-мурувват ҳар қачонгидан ҳам кучайиб, ўзаро бирдамлик ҳукм сурадиган фаслдир. Боиси, ушбу фаслда асрий анъаналаримиз улуғланувчи байрамлар кўп. Халқимиз февралнинг охирги кунларидан бошлаб, баҳорнинг сўнгги кунларигача сумалак сайлларини ўтказадилар. Маҳалладошлар эса, турли хил баҳорий таомлар тайёрлаб, бир-бирига илинишади. Маҳалладаги ночор, кам таъминланган ва ижтимоий кўмакка муҳтож оилалар ҳолидан хабар олиниб, неча-неча кўнгиллар обод бўлади. Бу йил ана шундай гўзал ва хайрли амаллар қилинадиган навбаҳор фасли Рамазон билан ҳамқадам бўлди. Натижада, юртдошларимиз қалби саховат-у, эҳтиромга янада тўлиб, жойларда сумалак сайллари ўтказилмоқда.

Ана шундай гўзал тадбирлардан бири яқинда Амударё туманининг Чойкўл овули ва Бўстон маҳалласида бўлиб ўтди. Чойкул ОФЙ хотин қизлар фаоли Сайлихон Муратбаева бошчилигида ташкиллаштирилган сумалак сайлида Қорақалпоғистон Республикаси Вазирлар Кенгаши Раиси ўринбосари, Оила ва хотин-қизлар қўмитаси раиси Марям Аҳмедова ҳамда туман ҳокими ўринбосари Гўзал Собурова, турли идора-ташкилотлардан келган меҳмонлар, шунингдек, овулдаги нуроний онахон-у, қиз-келинчаклар, фаол аёллар, маҳалла аҳли иштирок этдилар.

Маҳалланинг Дилбанд-2 кўча бошчиси Роҳатой Ерекеева кўчасидаги аёллар билан биргаликда сумалак, кўк сомса, патир, бўғирсоқ сингари миллий егуликларимиздан дастурхон тузаб, меҳмонларни нон-туз билан кутиб олдилар.

Сумалак миллий таомининг тайёрланиши ўзгача бир завқли жараён бўлса, буғдойни ундириб, қозонга солишгача бўлган жараён ҳам муҳим ва масъулиятли ҳисобланади. Сабаби, сумалакнинг қай даражада ширин ва тотли чиқиши айнан ўша жараёнга боғлиқ. Маҳалланинг кайвони аёлларидан Бибисора Султонова ана шу масъулиятли вазифани ўз зиммасига олиб, буғдойни ўстириб берган бўлса, Гўзал Ёвмутбаева хонадонида дошқозон осилди.

Шунингдек, сумалак сайлида Ширин Юсупова, Ойсултон Болтабаева, Нилуфар Гаипова, Гавҳар Шатаева, Мамура Камолова, Гулнора Раимова, Тозагул Хожиева сингари бир қатор фаол аёллар қатнашдилар. Шу билан бирга, маҳалладаги учта хонадонда байрамона ва баҳорий дастурхонлар ёзилиб, миллий таомларимиз тортилди.

Меҳмонлар ва маҳалла аҳли ушбу ноз-неъматларлардан бахраманд бўлиб, эл-юрт тинчлиги, дастурхонларимиз тўкинлигини тилаб, дуога қўл очдилар. Нон, патир, кўк сомса, гумма, жўхори куртик, зоғора, бўғирсоқ каби неъматларни тайёрлаб, дастурхонга тортишда овулдаги Маҳмуд Норбаев, Омонгул Дустмуратова, Нурбек Уразимбетов, Гуласал Хайтаковалар оилалари фаоллик кўрсатди.

Шунингдек, миллий таомларни тайёрлашда ва меҳмонларни муносиб кутиб олишда Бешчинор кўчаси бошчиси Малика опа Нурманова, Дилбанд кўчаси кўча бошчилари Зумрад Жабборова ва Салима Гулмоновалар бошчилигида Салтанат Рахматуллаева ҳамда муқаддас Қурбаниязова хонадонлари ҳам фаоллик кўрсатиб, Шахноза Казакова, Феруза Раимова, Наргиза Камолова, Манзура Рахматуллаева, Муҳаббат Алиева, Тўлғоной Нуримова, Дилноза Жуманиязова, Муҳаббат Каллиева каби бир қатор аёл-қизлар ҳам ушбу хайрли ишга ҳисса қўшдилар.

Миллий анъаналаримиз акс этган мазкур тадбир баҳорий куй-қўшиқларга, ўйин-кулгуларга уланиб кетди.

Яна шундай “Сумалак сайли” тадбирларидан бири туманимизнинг Бўстон маҳалласида ҳам ўтказилди. Ушбу тадбир ҳам миллий урф-одатларимизни тарғиб қилиш, ўзаро тотувлик, бағрикенглик, меҳр-оқибат, хайр-у, саховат туйғуларини камол топтириш ниятида ташкил қилинди.

Тадбир маҳаллада яшовчи тадбиркор Гуласал Ўрозметова хонадонида бўлиб ўтди. Хонадон ҳовлисида тўртта дошқозонда сумалак қайнатилиб, жараёнга маҳалладаги нуроний онахонлар, маҳалла хотин-қизлар фаоли Гўзал Собирова, аёл-қизлар, маҳалладаги “Aristokrat baby” оилавий боғчасининг тарбияланувчилари ҳамда кенг жамоатчилик вакиллари иштирок этдилар.

Тадбир давомида миллийлигимиз, миллий қадриятларимиз улуғланиб, “Алла”, “Ёр-ёр” каби миллий ўзлигимизни акс эттирувчи қўшиқларимиз янгради. Йиғилганлар дошқозон атрофида эзгу тилаклар айтиб, дуога қўл очдилар. Маҳалладошларни эзгу ният илинжида бир манзилга жамлаган сумалакка меҳр, мурувват, барака ёғилиб, юртдошларимиз қалбларига баҳорий илиқлик олиб кирди.

Сумалак сайли давомида саховатпеша ҳамюртимиз Гуласал Ўрозметова томонидан маҳалладаги кам таъминланган, ижтимоий ҳимояга муҳтож оилаларнинг ҳолидан хабар олиниб, сумалаклар тарқатилиб, уларга байрам совғалари ҳам топширилди. Албатта, бундай эътибор ва ғамхўрликдан қанчадан-қанча кўнгилларга шодлик улашилган бўлса, ажаб эмас.

Ҳа, сумалак сайлларининг аҳамияти, инсонларни бирдамликка, оғзибирчиликка, дўстликка чорлашида, гиналарни унутиб, одамларни кечиримлилик, бағрикенглик сари етаклашидадир.

Азиза Мадраҳимова.