Ҳуқуқбузарликлар профилактикаси ва жиноятчиликка қарши курашиш давр талаби

Сўнгги йилларда мамлакатимизда ҳуқуқбузарликлар профилактикаси ва жиноятчиликка қарши курашиш борасида кенг кўламли чора-тадбирлар амалга оширилиб, ҳуқуқ-тартиботни таъминлашда ижобий натижаларга ҳамда криминоген вазиятни сезиларли даражада яхшилашга эришилмоқда.

Пайшанба – “Жиноят ва ҳуқуқбузарликлар профилактикаси куни”. Ҳафтанинг ҳар пайшанба кунида жойларда ҳуқуқни муҳофаза қилувчи органлар ходимлари томонидан жамиятда хавфсизлик ва жамоат тартибини сақлаш, фуқаролар ҳушёрлиги ва огоҳлигини ошириш, тинчлик, осойишталик ва барқарорликни таъминлаш борасидаги тушунтириш-тарғибот тадбирлари амалга оширилади.

13 март куни Амударё тумани ҳокимлигида ҳуқуқбузарликлар профилактикаси куни муносабати йиғилиш ўтказилди. Унда туман ҳокими Собир Хўжаметов, тумандаги ҳуқуқни муҳофаза қилувчи органлар масъуллари, “Маҳалла еттиликлари” масъуллари иштирок этдилар.

Йиғилишда сўзга чиққан туман ҳокими Собир Хўжаметов бугунги кунда маҳаллаларда ҳуқуқбузарликларнинг олдини олиш, жиноятчиликни камайтириш, соғлом, тинч ва осойишта муҳитни шакллантириш энг асосий вазифалардан эканлигини таъкидлади. Ҳудудларда товламачилик ва коррупцион ҳолатларнинг олдини олиш, дин ниқоби остида фаолият юритувчи ижтимоий тармоқлардаги тақиқланган каналлар маълумотларига ишониб қолмаслик ва огоҳликни ошириш, табиий ва техноген тусдаги ҳодисалар юз берган вақтда тўғри ҳаракатланиш бўйича тарғибот ишларини янада кучайтириш лозимлиги хусусида сўз юритди.

Шунингдек, тадбирда туман Ички ишлар бўлими бошлиғи Мухамметали Хўжамуратов сўзга чиқиб, ҳуқуқбузарликлар профилактикаси куни амалга оширилиши зарур бўлган чора-тадбирлар ҳақида маълумот берди.

Хусусан, ҳуқуқбузарликларга муросасизлик маданиятини шакллантириш, ҳуқуқий барҳам бериш ва фуқароларнинг қонунга итоаткорлик хулқ-атворини оммалаштиришга қаратилган, шу жумладан ички ишлар органлари таянч пунктлари, ҳуқуқни муҳофаза қилувчи ва бошқа давлат идоралари ва ташкилотларида “Очиқ эшиклар куни”ни ташкил этиш орқали тизимли чора-тадбирларни амалга ошириш кераклиги таъкидланди.

Шунингдек, қонунийлик аҳволини ва ҳуқуқбузарликлар профилактикаси бўйича чора-тадбирларнинг самарадорлигини атрофлича муҳокама қилиш учун жойларда, биринчи навбатда криминоген вазият номақбул бўлган ҳудудларда фуқароларнинг сайёр қабулларини ҳамда давлат идоралари ва ташкилотлари вакилларининг аҳоли билан учрашувларини, ижтимоий аҳамияти муҳим бўлган суд муҳокамалари бўйича сайёр суд мажлисларини ўтказиш зарурлиги асосий вазифалардан эканлиги ҳақида сўз юритилди.

Шу билан бирга маҳаллаларда хавфсиз муҳитни яратиш, содир этиладиган қонунбузилишларнинг асл омилларини ўз вақтида аниқлаш ва комплекс чора-тадбирлар билан манзилли бартараф этиш орқали жиноятчиликнинг барвақт олдини олиш тизимининг самарадорлигини янада ошириш мақсадида имзоланган “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги Президент қарори ижросини таъминлашда асосий вазифалар белгилаб олинди.

Тадбир мобайнида маҳаллаларда аҳоли турмушининг ижтимоий-иқтисодий шароитларини ўрганиш, ҳуқуқбузарлик содир этишга кўмаклашувчи шарт-шароитларни аниқлаш ва бартараф этиш мақсадида уйма-уй юришларни ташкил этиш бўйича масъулларга тегишли топшириқ ва кўрсатмалар берилди.

Чарос Арслонова, туман ҳокимлигининг Ахборот хизмати раҳбари.