Орол маданияти саммити доирасида Чилпиқ тарихий ёдгорлигида концерт дастури ташкил этилди

Орол маданияти саммити доирасида қадимий Чилпиқ тарихий ёдгорлигида илк бор бетакрор мусиқа оҳанглари янгради. Очиқ осмон остида ўтказилган концерт дастури нафақат халқимиз, балки халқаро жамоатчилик қалбидан ҳам муносиб ўрин олди.

Мазкур тадбирлар Ўзбекистон Республикаси Президенти Шавкат Мирзиёевнинг 2025 йил 28 март кунги “Орол маданият саммитини юқори савияда ўтказиш тўғрисида”ги Қарорига асосан ташкил этилди. Қарорда Оролбўйи минтақасида қулай табиий муҳит яратиш, ноёб маданият ва тарихий меросни асраш, халқаро ҳамкорликни кенгайтириш мақсад қилинган. Шу боис, саммит ҳар ўн саккиз ойда — баҳор ёки кузда доимий равишда ўтказиладиган йирик маданий-илмий платформага айланиши кўзда тутилган.

6 апрель куни бўлиб ўтган концерт санъат ва маданият ходимлари, ёш истеъдод соҳиблари томонидан ижро этилган куй-қўшиқлар, моҳир раққосаларнинг чиқишлари билан иштирокчиларда катта таассурот қолдирди. Мусиқа, шеърият ва миллий рақслар уйғунлиги томошабинларга хуш кайфият улашди.

Тадбирда Қорақалпоғистон Республикаси Жўқорғи Кенгеси Раиси Аманбай Оринбаев, туман ҳокими Собир Хўжаметов, ҳоким ўринбосарлари, нуронийлар, туманимиз меҳмонлари ва маҳаллий аҳоли иштирок этди. Тадбир мазмунан бой чиқишлар билан давом этди ва йиғилганларга яна бир карра миллий фахр ва руҳий юксалиш бахш этди.

Концертда халқ артистлари, маданият ходимлари ва туманимиз санъаткорлари ижросида миллий ва замонавий эстрада оҳанглари янгради. Айниқса, хоразмча қўшиқлар кечага ўзгача файз бағишлаб, санъат шинавандаларини жўшқин рақсларга чорлади.

Орол маданияти саммити доирасида ўтказилаётган тадбирлар минтақанинг ноёб маданий меросини танитиш, уни асраб-авайлаш ва келажак авлодга етиб боришда муҳим аҳамият касб этади. Саммит фақат концертлар билан чекланмай, кенг қамровли илмий ва амалий лойиҳаларни ҳам ўз ичига олади.

Жумладан, барқарор ечимлар ва стратегиялар яратишга қаратилган таълим дастури асосида Орол мактаби фаолиятини ташкил этиш, замонавий технологиялар ва анъанавий меъморчилик асосида “Истиқлол” маданият ва истироҳат боғи, боғ ҳудудида жойлашган болалар кутубхонасини қайта барпо этиш, халқаро тадқиқотлар ва фанлараро ҳамкорликни кучайтириш каби йўналишлар белгилаб олинган.

Чилпиқ қўрғонида янграган мусиқа ўтмиш, бугун ва келажакни боғловчи маданий ришталарни яратди. Халқлар ва миллатлар ўртасидаги маданий кўприкка айланган концерт симфоник мусиқа, Шарқ шеърияти ва халқона оҳангларнинг мукаммал уйғунлигини намоён қилди. Қадимий Чилпиқ қўрғонида янграган оҳанглар Оролбўйининг руҳий тикланиши, маданий қайтадан юксалиши ва глобал ҳамжиҳатлик сари ташланган муҳим қадамга айланди.

Шоҳзод Қурбонбоев.