36-сонли умумтаълим мактабида амалий фанлар ҳафталиги доирасида амалий машғулотлар ўтказилди

Бугунги кунда мактаб таълимида назарий билимлар билан бир қаторда амалий кўникмаларга ҳам алоҳида эътибор қаратилаётгани таълим тизимидаги муҳим ўзгаришлардан далолат беради. Зеро, ҳаётга тайёр инсон — нафақат билимли, балки амалий кўникмага эга шахс ҳамдир.

Яқинда Амударё тумани Мактабгача ва мактаб таълими бўлими тасарруфидаги 36-сонли умумтаълим мактабида амалий фанлар ўқитувчиларининг ташаббуси билан ўқувчиларнинг амалий ва назарий билимларини мустаҳкамлашга қаратилган махсус машғулотлар ўтказилди. Тадбир амалий фанлар метод бирлашмаси раҳбари, технология фани ўқитувчиси Гулчеҳра Хўжамуродова раҳбарлигида ташкил этилди.

Ушбу ҳафталик ўқув-тарбия жараёнининг сифати, ўқитувчиларнинг маҳорати ва ўқувчиларнинг қобилиятини намоён қилган ҳақиқий тадбирга айланди. Тадбирни мактабнинг илмий ишлар бўйича директор ўринбосари Сарвар Қутлимуратов очиб, бу каби ташаббусларнинг аҳамияти ҳақида тўхталиб, амалий машғулотлар ўқувчиларнинг салоҳиятини юзага чиқариш, келажак ҳаётига мустаҳкам пойдевор қўйишда муҳим ўрин тутишини таъкидлади.

Гулчеҳра Хўжамуродова 2003 йилдан буён ушбу мактабда технология фанидан таълим бериб келмоқда. Унинг раҳбарлигида амалий фанлар бўйича бир қатор ютуқларга эришилган. Жумладан, юқори синф ўқувчилари машғулотларда фаол иштирок этиб, чеварликка оид билимларни ўрганиб келишади.

Мактабда технология фани бўйича 7-"А" ва 7-"Б" синф ўқувчи қизлари иштирокида "Моҳир пазандалар" гуруҳи ташкил этилган. Тадбир доирасида мазкур гуруҳ қизлари ўртасида сервис хизмати, салатлар ва таомлар тайёрлаш, эстетик дид ҳамда меҳнат маданияти бўйича беллашувлар ўтказилди. Бу каби машғулотларда қизлар ораста, чаққон ва эпчил бўлишлари, келажакда оилада ўз ўрнини топиши учун катта ҳаётга тайёрланади. Ҳар иккала синф тенг иштирок этгани учун иштирокчилар фахрий ёрлиқлар билан тақдирланди. Қизлар нафақат пазандаликда, балки чиройли гапириш, меҳмоннавозликда ҳам ўз маҳоратларини намоён қилишди. Ушбу машғулотлар уларнинг ҳаётга тайёргарлигида муҳим омил бўлди.

Гулчеҳра Хўжамуродова ўз тўгарагида ўқувчиларга ўйинчоқлар тайёрлаш, тикиш ҳамда пазандалик сирларини ўргатишни давом эттирмоқда.

Яна бир технология фани ўқитувчиси Шуҳрат Жабборов эса 1996 йилдан буён мазкур мактабда фаолият юритиб, ўқувчиларга устачиликни ўргатиб келади. Унинг тўгарагида ўқувчилар турли қўл меҳнати буюмларини ясаш, станоклар билан ишлаш, асбоб-ускуналардан хавфсиз фойдаланишни ўрганмоқда. Бу эса нафақат амалий кўникмаларни, балки меҳнатга муносабатни ҳам шакллантиради.

Мактабнинг яна бир ўқитувчиси Нурбек Камалов 2013 йилдан буён мусиқа маданияти фанидан ўқувчиларга рубоб ва доира чалиш, жонли ижро ва қўшиқ куйлашни ўргатиб келмоқда.

Мактабнинг тасвирий санъат ва чизмачилик фани ўқитувчилари Дилноза Кўчқарова ва Азиза Исмоилова раҳбарлигидаги тўгаракларда 5–6-синф ўқувчилари натюрморт чизиш бўйича ўз маҳоратларини синовдан ўтказишди. Тадбир доирасида ўтказилган танловда 5-“А” синф ўқувчиси Фарангиз Шамуратова 1-ўринни, 6-“А” синфдан Шоҳзода Сабирбоева эса 2-ўринни эгаллаб, рағбатлантирувчи совғалар билан тақдирланди. Бу каби фаолиятлар болаларда санъатга муҳаббат уйғотади, эстетик дидни ривожлантиради.

Жисмоний тарбия фани бўйича ҳам бир қатор машғулотлар ташкил этилди. 32 йиллик тажрибага эга Ҳаким Раҳимов ҳар ҳафтанинг шанба куни гандбол ва қўл тўпи бўйича машғулотлар ўтказади. Унинг сабоқлари ўқувчиларда жисмоний тайёргарлик, тезкорлик ва жамоавийликни ривожлантиради.

Жисмоний тарбия фани ўқитувчиси Муҳайё Умарова гимнастика тўгарагида машғулотлар олиб бориб, ўқувчиларни рағбатлантирди. Шунингдек, Маҳмуд Қурбонбоев эса 6 йилдан буён стол тенниси тўгарагини йўлга қўйган. Маҳмуд Қурбонбоев ва Ихлос Нажимов спортнинг шахмат-шашка тури бўйича мактаб кубоги учун мусобақалар ўтказди.

Жисмоний тарбия фанининг яна бир фаол устози — олий тоифали ўқитувчи Омонбой Қурбонбоев ҳар ҳафтанинг шанба куни мактабнинг футбол жамоаси иштирокида машғулотлар ўтказади. Шу куни спортнинг футбол тури бўйича юқори синф ўқувчилари иштирокида “Мактаб лигаси” ташкил этилди. Шунингдек, 2023 йилда “Умид ниҳоллари” спорт мусобақасида Нукус шаҳрида ўтказилган Қорақалпоғистон чемпионатида стол тенниси бўйича ўқувчилари — Сарвар Раимов ва Зафарбек Юнусовлар 1-ўринни қўлга киритгани унинг машғулотлари самарасини кўрсатади.

Бир сўз билан айтганда, 36-сонли умумтаълим мактабида амалий фанлар ҳафталиги доирасида ўтказилган тадбирлар ўқувчиларнинг билим ва кўникмаларини бойитиш, уларни ҳаётга тайёрлашда муҳим омил бўлди. Ушбу фаолиятлар орқали нафақат назарий, балки амалий жиҳатдан ҳам ўқувчиларда етарли тажриба ва маҳорат шаклланмоқда.

Шоҳзод Қурбонбоев.