“Тинчлик – олий неъмат” мавзусида давра суҳбати ўтказилди

Юртимизда тинчлик ва осойишталикни таъминлаш, ёш авлодни ватанпарварлик руҳида тарбиялаш, уларнинг Ватан ва халқ олдидаги бурчини англашларида ўтказилаётган маънавий-маърифий тадбирлар муҳим аҳамият касб этади. Шу мақсадда яқинда Амударё тумани Мактабгача ва мактаб таълими бўлими тасарруфидаги 36-сонли умумтаълим мактабида “Тинчлик – олий неъмат” мавзусида давра суҳбати ташкил этилди.

Тадбирда Давлат хавфсизлик хизмати Чегара қўшинлари ҳарбий хизматчиси Миржаҳон Мажидов, туманда хизмат ўтаётган бир гуруҳ муддатли ҳарбий хизматчилар ҳамда мактабнинг юқори синф ўқувчилари иштирок этди.

Давра суҳбати давомида сўзга чиққан Миржаҳон Мажидов тинчлик ҳар бир миллат учун энг азиз ва бебаҳо неъмат экани, уни асраш ва муҳофаза қилиш ҳар бир фуқаронинг, айниқса, ҳарбий хизматчиларнинг муқаддас бурчи эканини алоҳида таъкидлади. У шунингдек, чегараларнинг дахлсизлигини таъминлаш, ички хавфсизликни сақлаш борасида олиб борилаётган ишлар, ҳарбий хизматнинг мазмун-моҳияти ҳақида атрофлича маълумот берди.

Тадбирда қатнашган ҳарбий хизматчилар ўз шахсий ҳаёти, ҳарбий қисмдаги тартиб-интизом, юрт ҳимоясидаги масъулият ва ҳарбий тайёргарлик жараёнлари ҳақида ёшларга самимий мулоҳазаларини баён этдилар. Бу мулоқотлар орқали ўқувчилар ҳарбийлар ҳаёти ва хизматининг реал жиҳатлари билан яқиндан танишдилар.

Мактаб ўқувчилари тадбирда Ватан, тинчлик, жасорат ва ватанпарварлик мавзуларида шеърлар ўқидилар. Улар ҳарбийларга самимий миннатдорчилик изҳор этиб, тинч ҳаёт учун ўз ҳурмат ва эҳтиромларини билдирди.

“Тинчлик – олий неъмат” мавзусидаги мазкур давра суҳбати ёш авлоднинг маънавий-маърифий билимларини ошириш, уларда Ватанга садоқат, тинчликнинг қадрига етиш туйғуларини шакллантиришда муҳим ўрин тутди.