ЖИСМОНИЙ ВА АҚЛИЙ ФАОЛЛИК ЎТА МУҲИМ

Исоннинг етук ва баркамол шахс сифатида шаклланиши учун қандай омиллар бор ва бу омиллардан биз ўз ҳаётимизда фойдаланаётирмизми?

Жамиятимизда соғлом турмуш тарзини қарор топтириш, жисмонан ва ақлан етукликка эришиш учун кундалик ҳаётимизда қандай қоида ва меъёрларга амал қилаётирмиз?

Бизнинг бугунги суҳбатдошларимиз спорт соҳаси мураббийлари, суҳбатимиз мавзуси эса айнан юқоридаги саволлар доирасида бўлди.

Баҳром СОАТОВ, 1-сонли БЎСМнинг катта теннис бўйича мураббийси:

- Аввало шуни айтиш керакки, спорт - гўзаллик, эпчиллик, куч-қудрат, булардан ҳам энг муҳими, мустаҳкам соғлик манбаи. Эътибор берган бўлсангиз, спорт билан шуғулланадиган ёшларнинг дунёқараши кенг, фикрда собит, юзида тиниқлик, ҳаракатларида дадиллик бўлади. Бундай ёшлар ўзига ишонади, атрофидагиларнинг ҳурматини қозона олади. Вақтини қандай режалаштиришни яхши билгани учун бундай ёшларимиз турмушимизга ёт бўлган зарарли иллатларга, айниқса, кашандалик, гиёҳвандлик, алькоголизмга ружу қўймайдилар. Спорт билан шуғулланган ёшларнинг эслаб қолиш қобилияти яхши бўлади, агар улар талаба бўлишса, фанларни ўзлаштиришда, ўзи танлаган касб бўйича кўникмаларга эга бўлишда асло қийналмайди.

Хуршид ИСМОИЛОВ, 3-сонли БЎСМнинг стол тенниси бўйича мураббийси:

- Кўпчилик спортга шунчаки бир соҳа сифатида қарайди. Аксинча, спорт – ҳар бир инсон ҳаётининг ажралмас қисми бўлиб қолиши керак. Муҳтарам Президентимиз бекорга мамлакатимизнинг спорт салоҳиятини юксалтиришга жиддий эътибор билан қараётганлари йўқ. Чунки энг аввало спорт - миллатимиз обрў-эътиборининг ошишида муҳим омил бўлибгина қолмай, халқимизнинг, айниқса, ўсиб келаётган ёш авлоднинг ҳам ақлан, ҳам жисмонан етукликка етишувида энг муҳим омил ҳисобланади. Шунинг учун ҳам мамлакатимиз мустақилликка эришгач, спорт-соғломлаштириш ишларига эътибор ҳам, эҳтиёж ҳам кучайди.

Баҳром СОАТОВ:

-Тўғри айтасиз, шунинг учун ҳам собиқ Иттифоқ даврида Манғитдан нарига ўтмаган спортчиларимиз дунёнинг нуфузли спорт ареналарида юртимиз шарафини ҳимоя қилишаяпти. АҚШ, Хитой, Жанубий Корея, Испания, Туркия, Россия, Англия, Германия каби давлатларнинг спортчилари билан бемалол беллаша оладиган амударёлик спортчилар - дзю-до кураши бўйича Европа кубоги ғолиби Элёр Машарипов, бокс бўйича Ўзбекистон кубоги ғолиби Жалолиддин Аминов, Жасур Пўлатовларнинг номини бугун спорт мухлислари жуда яхши билади. Бундай ютуқларга эришиш учун спортчи-ёшларимиз ўсиб-улғайган оила муҳити ҳам муҳим рол ўйнайди.

Шаҳодат РАЖАБОВА, 3-сонли БЎСМнинг бадиий гимнастика бўйича мураббийси:

- Инсоннинг ҳам ақлан, ҳам жисмонан шаклланишида фақат спорт билан мунтазам шуғулланишнинг ўзи кифоя қилмайди. Спортчи нафақат ўзининг куч-қудрати, балки, маънан баркамоллиги билан ҳам ғалабаларга замин ҳозирлайди. Маънавий етукликка эса илк қадам оилада қўйилади. Оилада соғлом муҳит қарор топган бўлса, спортчининг ғалаба томон имкониятлари ҳам кенгайиб бораверади. Шу боис, оилаларимизда соғлом турмуш тарзи ҳукмрон бўлса, яъни, ота-она тарбияли, самимий ва хушмуомала бўлишса, уларнинг фарзандлари ҳам ёқимли хулқ-атворга эга, хушфеъл бўлишади. Агар у моҳир спортчи бўлса, албатта рақиби устидан ғалаба қозониш унга осон кечади. Чунки бундай спортчи вужудида жисмоний етуклик билан маънавий етуклик уйғун тарзда ривожланиб боради.

Хуршид ИСМОИЛОВ:

- Бу фикрингизга тўлиқ қўшиламан. Бола спортнинг ўзи ёқтирган тури билан қанчалик жиддий шуғулланмасин, у камол топаётган оила муҳити носоғлом бўлса, унинг уринишлари бефойда. Шунинг учун мен ўз ҳаётини спорт соҳаси билан боғлашга аҳд қилган ёшларнинг ота-оналарига, оила аъзоларига бир гапни қайта-қайта айтгим келади: фарзандингиз эл-юрт, қолаверса, оилангиз шаънини юксалтирувчи етук шахс сифатида шаклланишини истасангиз, энг аввало феълингизни кенг қилинг, ҳаёт инсонга фақат бир марта берилишини унутманг, оилада ва жамиятда чиройли, ораста, фикран соғлом инсонлар сафида бўлишга интилинг.

Ҳамида РАЖАБОВА, стол тенниси бўйича 1-сонли БЎСМ мураббийси:

- Жамиятимизда соғлом турмуш тарзини қарор топтиришда шахс энг аввало фаол бўлиши керак. Жисмонан ва ақлан фаол инсон ҳеч қачон ёмон одатларга берилмайди, кундалик ҳаётида вақтни тўғри режалаштиради. Яъни, меҳнатга ижодий ёндашиш – берилиб ишлашга одатланиш, вақтида, тўғри овқатланиш, тозаликка риоя этиш, ўзини ёмон одатлардан тийиш, нос ва тамаки чекиш, спиртли ичимликдан ўзини сақлаш, кучли жисмоний ва руҳий ҳолатга эришиш, танани ҳаддан ташқари зўриқтиришдан сақлаш, хушфеъл бўлиш ўта муҳим. Тирноқ остидан кир қидирадиган, бўлар-бўлмасга асабийлашиб, суҳбатдошининг жиғига тегадиган одам – билиб қўйингки, жуда тез қарийди ва касалликка чалинувчан бўлади.

Шаҳодат РАЖАБОВА:

- Энг муҳими, инсон ўзини бошқаларга хуш келмайдиган одатлардан тиймоғи керак. Оилада тозалик, яхши таъминланган шарт-шароит бўлса-ю, инсоний меҳр-оқибат, ўзаро ҳурмат, ширин муомала бўлмаса, бундай оилага соғлом турмуш тарзи тамоман ёт. Шу боис, мен юртдошларимизга шундай дер эдим:

- Азизлар, соғлом турмуш тарзи – соғлигимиз гаровигина эмас, балки, оилаларимизнинг файз-у таровати, тинч-осойишталиги, фаровонлиги, ҳам жисмонан, ҳам ақлан камолотга етишмоқликдир. Ва демакки, жисмонан ва маънан баркамол авлод келажаги сари эзгу қадамдир. Буни унутиш – Ватаннинг ва миллатнинг келажагига лоқайдликнинг бир кўринишидир. Шундай эмасми, азизлар!