Чойкўл овул фуқаролар йиғини раиси сайлови ўтказилди

Мамлакатимизнинг барча ҳудудларида бўлгани каби, Амударё туманида ҳам фуқаролар йиғини раислигига сайлов жараёнлари уюшқоқлик ва ошкоралик асосида ўтказилмоқда. Умумий ҳисобда мамлакат бўйича 9500дан ортиқ фуқаролар йиғини раиси сайланади. Амударё тумани бўйича эса жами 49 та фуқаролар йиғинларида сайловлар ўтказилмоқда. Ушбу сайловларни ўтказиш мақсадида фуқаролар йиғини раиси сайловини ташкил этишга кўмаклашувчи туман комиссия тузилган. Комиссия таркибига идора ва ташкилотлар раҳбарлари, депутатлар ва жамоатчилик вакиллари жалб этилди. Комиссия қарорига асосан, сайловчиларнинг камида 12 фоизини қамраб олган вакиллар сайловларда иштирок этиши белгиланган. Халқ депутатлари туман Кенгаши қарорига асосан сайловни ташкил этиш ва ўтказиш бўйича махсус тадбирлар режаси тасдиқланган.

Яқинда Чойкўл овулида ҳам фуқаролар йиғини раиси сайлови бўлиб ўтди. Ҳудуддаги маданият маркази биносида ўтказилган сайловда сайловчилар вакилларининг 80 фоиздан ортиғи иштирок этди. Сайлов жараёни ошкоралик, тенглик ва шаффофлик тамойиллари асосида юқори савияда ташкил этилди.

Маҳалла раиси лавозимига қўйилган асосий талабларга кўра, номзод Ўзбекистон фуқароси бўлиши, олий маълумотга эга бўлиши, сайловгача камида 5 йил тегишли ҳудудда доимий яшаган, ташкилотчилик қобилиятига, давлат органлари, нодавлат нотижорат ташкилотлари, тадбиркорлик ёки бошқа хўжалик фаолияти соҳасида иш ва ҳаётий тажрибага ҳамда аҳоли орасида обрў-эътиборга эга шахс бўлиши шарт.

Жойларда фуқаролар йиғинлари қарори билан сайловни ўтказиш бўйича ишчи гуруҳлар тузилган бўлиб, уларнинг таркибига тегишли ҳудудда жойлашган маҳалла, нодавлат нотижорат ва бошқа ташкилотларнинг вакиллари, шунингдек туман кенгаши депутатлари киритилган. Ишчи гуруҳлар тегишли ҳудудда доимий яшовчи фуқароларнинг фикрини инобатга олган ҳолда қонунда белгиланган муддатда раис лавозимига номзодларни кўрсатдилар.

Кейинги босқичда эса туман ҳокими фуқаролар йиғини раиси лавозимига тақдим этилган номзодларнинг ҳужжатларини кўриб чиқиб, ишчи гуруҳларга топшириш учун ушбу номзодлар бўйича ўзининг асослантирилган хулосаларини тегишли комиссияларга юборди.

Қайд этиш жоизки, Ўзбекистон Республикаси Конституциясида фуқароларнинг ўзини ўзи бошқариш органлари давлат ҳокимияти органлари тизимига кирмасдан, маҳаллий аҳамиятга молик масалаларни қонунга мувофиқ равишда мустақил ҳал этиши белгиланган. Давлат эса мазкур органлар фаолияти учун зарур шарт-шароитларни яратади ва уларга қонун билан берилган ваколатларни амалга оширишда кўмаклашади.

Фуқаролар йиғини раиси сайлови “Фуқаролар йиғини раиси сайлови тўғрисида”ги Қонун асосида тартибга солинади. Кейинги йилларда мазкур қонунга маҳалла раислари сайлови тизимини такомиллаштиришга қаратилган бир қатор ўзгартиш ва қўшимчалар киритилган. Жумладан, қонунга киритилган ўзгартишларга асосан, фуқаролар йиғини раисининг ваколат муддати 3 йилдан 5 йилга узайтирилди. Шунингдек, бўшаб қолган лавозим ўринларига ҳам фуқаролар йиғини раислари беш йил муддатга сайланиши белгиланди.

Чойкўл овул фуқаролар йиғинидаги сайловда иштирок этган номзодлар сайловчиларни ўз дастурлари билан таништирди. Сайлов жараёни Ўзбекистон Республикасининг “Фуқаролар йиғини раиси сайлови тўғрисида”ги Қонунининг тегишли моддаларига мувофиқ яширин овоз бериш орқали ўтказилди.

Овоз бериш якунларига кўра шу кунгача мазкур лавозимда ишлаб келаётган Бекзод Айтеков сайловчиларнинг 91 фоиз овозини тўплаган ҳолда Чойкўл овул фуқаролар йиғини раиси этиб сайланди.

Айни пайтда туманимизнинг бошқа овул ва маҳалла фуқаролар йиғинларида ҳам фуқаролар йиғини раиси сайловлари давом этмоқда.

Шоҳзод Қурбонбоев тайёрлади.